"ಅಯೋಗ್ಯ' ಯಶಸ್ಸಿನ ಬಳಿಕ ಸತೀಶ್ ನೀನಾಸಂ, ರಚಿತಾ ರಾಮ್ ಮತ್ತು ನಿರ್ದೇಶಕ ಮಹೇಶ್ ಮತ್ತೆ ಒಂದಾಗಿದ್ದು, ಸದ್ಯ "ಅಯೋಗ್ಯ 2' ಮೂಲಕ ಸದ್ದು ಮಾಡುತ್ತಿದ್ದಾರೆ. ಕೆಲ ದಿನಗಳ ಹಿಂದಷ್ಟೇ ಚಿತ್ರದ ಮೊದಲ "ಮುದ್ದು ಮುದ್ದು ಪುಟ್ಟಲಕ್ಷ್ಮೀ' ಸಾಂಗ್ ಬಿಡುಗಡೆಯಾಗಿದ್ದು, ಯೂಟ್ಯೂಬ್ನಲ್ಲಿ 50 ಲಕ್ಷಕ್ಕೂ ಅಧಿಕ ವೀಕ್ಷಣೆಗಳನ್ನು ಪಡೆದು ವೈರಲ್ ಆಗಿದೆ. ಬುಧವಾರ (ಜು. 8) ಆ ಯಶಸ್ಸನ್ನು ಕೇಕ್ ಕಟ್ ಮಾಡುವುದರೊಂದಿಗೆ ಆಚರಿಸಿದೆ ಚಿತ್ರತಂಡ, ಅದರ ಜತೆಗೆ ನಾಯಕ ಸತೀಶ್ ನೀನಾಸಂರನ್ನು ಪರಿಚಯಿಸುವ "ಅಣ್ಣ ಬಂದ್ರೆ' ಎಂಬ ಮಾಸ್ ಪೆಪ್ಪಿ ಸಾಂಗ್ ರಿಲೀಸ್ ಮಾಡಿದೆ. ಅರ್ಜುನ್ ಜನ್ಯ ಸಂಗೀತ, "ಭರ್ಜರಿ' ಚೇತನ್ ಕುಮಾರ್ ಸಾಹಿತ್ಯ ಮತ್ತು "ಟಗರು ಬಂತು ಟಗರು' ಖ್ಯಾತಿಯ ಅಂತೋಣಿ ದಾಸನ್ ಧ್ವನಿಯಲ್ಲಿ ಮೂಡಿಬಂದಿದೆ. ಮಾಸ್ಟರ್ ಸಂತೋಷ್ ನೃತ್ಯ ನಿರ್ದೇಶನದಲ್ಲಿ ನೂರಾರು ಡಾನ್ಸರ್ಗಳ ನಡುವೆ ಸತೀಶ್ ಕೂಡ ಭರ್ಜರಿಯಾಗೇ ಸ್ಟೆಪ್ಸ್ ಹಾಕಿದ್ದಾರೆ. ನಿರ್ದೇಶಕ ಮಹೇಶ್, ""ಅಯೋಗ್ಯ' ಚಿತ್ರದ ಆಡಿಯೋ ಹಕ್ಕುಗಳು ₹9 ಲಕ್ಷಕ್ಕೆ ಬಿಕರಿಯಾಗಿದ್ದವು. ಇದೀಗ, "ಅಯೋಗ್ಯ 2' ಚಿತ್ರದ ಹಾಡುಗಳನ್ನು ನೋಡಿ, ಕೇಳಿ ಆನಂದ್ ಆಡಿಯೋದವರು ಒಳ್ಳೆ ಮೊತ್ತ ಅರ್ಥಾತ್ ₹2 ಕೋಟಿಗೆ ಖರೀದಿಸಿದ್ದಾರೆ. "ಅಯೋಗ್ಯ' ಕಥೆ ಎಲ್ಲಿಗೆ ಮುಗಿದಿತ್ತೋ, ಈ ಸೀಕ್ವೆಲ್ ಅದರ ಮರುದಿನದಿಂದಲೇ ಪ್ರಾರಂಭವಾಗುತ್ತದೆ. ಹಳೆಯ ಪಾತ್ರಗಳ ಜತೆಗೆ ಕೆಲ ಹೊಸ ಪಾತ್ರಗಳೂ ಬರುತ್ತವೆ. "ಅಯೋಗ್ಯ' ಕ್ಲೆಮ್ಯಾಕ್ಸ್ನಲ್ಲಿ ಗ್ರಾಮ ಪಂಚಾಯ್ತಿ ಸದಸ್ಯನಾಗುವ ಸಿದ್ದೇಗೌಡ, ಮುಂದೆ ಏನೆಲ್ಲ ಸವಾಲುಗಳನ್ನು ಎದುರಿಸುತ್ತಾನೆ ಎಂಬುದೇ ಈ ಸೀಕ್ವೆಲ್ ಒನ್ಲೈನ್' ಎಂದು ಮಾಹಿತಿ ನೀಡುತ್ತಾರೆ. ಸತೀಶ್, ರಚಿತಾ ಜತೆ ರವಿಶಂಕರ್, ಸಾಧು ಕೋಕಿಲ,ತಬಲ ನಾಣಿ, ಸುಂದರರಾಹ್, ಶಿವರಾಜ್ ಕೆ.ಆರ್. ಪೇಟೆ, ಅರುಣ ಬಾಲರಾಜ್, ಗಿರಿ ಶಿವಣ್ಣ, ಮಂಜು ಪಾವಗಡ ಪ್ರಮುಖ ತಾರಾಗಣದಲ್ಲಿದ್ದಾರೆ. ಮಾಸ್ ಚಿತ್ರಗಳಿಗೆ ಹೆಸರಾದ ಮಾಸ್ತಿ ಉಪ್ಪಾರಳ್ಳಿ ಸಂಭಾಷಣೆ, "ಶಾಖಾಹಾರಿ' ಖ್ಯಾತಿಯ ವಿಶ್ವಜಿತ್ ರಾವ್ ಛಾಯಾಗ್ರಹಣ, ಸುರೇಶ್ ಆಮುರ್ಗಂ ಸಂಕಲನ ಮತ್ತು ಅರ್ಜುನ್ ರಾಜ್ ಸಾಹಸದಲ್ಲಿ "ಅಯೋಗ್ಯ 2' ಮೂಡಿಬಂದಿದ್ದು, ಇದೇ ಆ.7ರಂದು ರಾಜ್ಯಾದ್ಯಂತ ತೆರೆಗೆ ಬರಲಿದೆ.
ಸತೀಶ್ ಪುತ್ರಿ ಡೆಬ್ಯೂ
"ಅಣ್ಣ ಬಂದ್ರೆ' ಹಾಡಿನ ಮೂಲಕ ಸತೀಶ್ ನೀನಾಸಂ ಪುತ್ರಿ ಮನಸ್ವಿತಾ ಕೂಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ್ದಾರೆ. ಹಾಡಿನಲ್ಲಿ ಕೆಲ ಕಾಲ ಅಪ್ಪನಂತೆಯೇ ಕಾಸ್ಟ್ಯೂಮ್ ಧರಿಸಿ, ಅವರ ಜತೆಗೆ ಕುಣಿದು ಕುಪ್ಪಳಿಸಿದ್ದಾರೆ. ಈ ಹಾಡಿನ ಮೂಲಕ ಇದೇ ಮೊದಲ ಬಾರಿಗೆ ಬಿಗ್ ಸ್ಕ್ರೀನ್ಗೆ ಮನಸ್ವಿತಾ ಬಿಗ್ ಸ್ಕ್ರೀನ್ಗೆ ಎಂಟ್ರಿ ಕೊಟ್ಟಿರುವುದು ವಿಶೇಷ.