ಕೋಲ್ಕತಾ: ಬಾಲಿವುಡ್ ನಟರಾದ ಸುಶಾಂತ್ ಸಿಂಗ್ ರಜಪೂತ್ ಹಾಗೂ ಶ್ರೀದೇವಿಯವರ ಸಾವಿನ ಕುರಿತಾದ ಅಧ್ಯಯನವನ್ನು ಮೌಲಾನಾ ಅಬುಲ್ ಕಲಾಂ ಆಜಾದ್ ಯೂನಿವರ್ಸಿಟಿ ಆಫ್ ಟೆಕ್ನಾಲಜಿ (ಮಕಾಟ್) ವಿಶ್ವವಿದ್ಯಾಲಯದ ಪಠ್ಯಕ್ರಮದಲ್ಲಿ ಅಳವಡಿಸಲಾಗಿದೆ.
ಈ ಇಬ್ಬರೂ ತಾರೆಯರ ಸಾವಿನ ಕುರಿತು ಇದಾಗಲೇ ವರದಿಗಳು ಬಂದಿದ್ದರೂ, ಸಾವಿನ ರಹಸ್ಯ ಮಾತ್ರ ರಹಸ್ಯವಾಗಿಯೇ ಉಳಿದಿದೆ. ಈ ವಿಷಯದ ಕುರಿತ ಅಧ್ಯಯನವನ್ನು ಮಕಾಟ್ ವಿದ್ಯಾರ್ಥಿಗಳು ಕಲಿಯಲಿದ್ದಾರೆ. ಪದವಿ ಮತ್ತು ಸ್ನಾತಕೋತ್ತರ ಕೋರ್ಸ್ಗಳಲ್ಲಿ ವಿಧಿವಿಜ್ಞಾನ ವಿಷಯದ ಅಧ್ಯಯನ ನಡೆಸುವವರಿಗೆ ಪೂರ್ವ ಭಾರತದಲ್ಲಿರುವ ಏಕೈಕ ಸರ್ಕಾರಿ ಸಂಸ್ಥೆಯಾಗಿದೆ ಮಕಾಟ್. ಸುಶಾಂತ್ ಸಿಂಗ್ ರಜಪೂತ್ ಮತ್ತು ಶ್ರೀದೇವಿ ಅವರ ಸಾವಿನ ಪ್ರಕರಣಗಳನ್ನು ಪಠ್ಯಕ್ರಮದಲ್ಲಿ ಕೇಸ್ ಸ್ಟಡಿಯನ್ನಾಗಿ ಮಾಡಿಕೊಳ್ಳಲಾಗಿದೆ.
ವಿಧಿವಿಜ್ಞಾನ ವಿಷಯದ ಅಧ್ಯಯನ ನಡೆಸುವವರಿಗೆ ಇಂಥ ಪ್ರಕರಣಗಳ ಕೇಸ್ ಸ್ಟಡಿಗಳ ಅಗತ್ಯವಿದೆ. ಆದರೆ ಕೆಲವೊಂದು ಘಟನೆಗಳು ತಾರ್ಕಿಕ ಅಂತ್ಯ ಕಾಣುತ್ತಿಲ್ಲ. ಇವುಗಳನ್ನು ಉದಾಹರಣೆಯಾಗಿಟ್ಟುಕೊಂಡು ವಿದ್ಯಾರ್ಥಿಗಳೇ ತಾರ್ಕಿಕ ವಿವರಣೆ ನೀಡುವಂತೆ ಮಾಡುವುದು ಪಠ್ಯಕ್ರಮದ ಉದ್ದೇಶ. ಕೆಲ ವರ್ಷಗಳಲ್ಲಿ ಅಪರಾಧ ಮಾದರಿಗಳು ಮತ್ತು ಪ್ರತಿಕ್ರಿಯೆ ಶೈಲಿ ಬದಲಾಗಿರುವ ಹಿನ್ನೆಲೆಯಲ್ಲಿ ಬಹು ಚರ್ಚಿತವಾಗಿರುವ ಈ ಎರಡು ಸಾವಿನ ಪ್ರಕರಣಗಳನ್ನು ವಿದ್ಯಾರ್ಥಿಗಳ ಕೇಸ್ ಸ್ಟಡಿಯನ್ನಾಗಿ ಬಳಸಿಕೊಳ್ಳಲಾಗಿದೆ ಎಂದು ವಿಶ್ವವಿದ್ಯಾನಿಲಯದ ವಿಧಿವಿಜ್ಞಾನ ವಿಭಾಗದ ಪ್ರಾಧ್ಯಾಪಕ ಸುಜಯ್ ಮಿತ್ರ ಹೇಳಿದ್ದಾರೆ.
ಎರಡು ದಶಕಗಳ ಹಿಂದೆ ಯಾವುದೇ ಸಾವಿನ ಬಗ್ಗೆ ಇಷ್ಟು ಚರ್ಚೆಯಾಗುತ್ತಿರಲಿಲ್ಲ. ಇದೀಗ ಕೆಲವೊಂದು ಸಾವುಗಳು ಬಹಳ ಕುತೂಹಲಕ್ಕೆ ಕಾರಣವಾಗುತ್ತಿವೆ. ಖಿನ್ನತೆ ಕೂಡ ಇದರಲ್ಲಿ ಒಂದು. ಸುಶಾಂತ್ ಅವರ ಪ್ರಕರಣದಲ್ಲಿ ಖಿನ್ನತೆ ಎಂಬುದು ಥಳಕು ಹಾಕಿದ್ದರೆ ಶ್ರೀದೇವಿ ಅವರ ಪ್ರಕರಣದಲ್ಲಿ ಸಹಜಸಾವು ಎಂದು ಬಿಂಬಿತವಾಗಿದೆ. ಇಂಥ ಸಾವಿನ ಪ್ರಕರಣಗಳನ್ನು ವಿಧಿವಿಜ್ಞಾನ ವಿಷಯವನ್ನು ಅಧ್ಯಯನ ಮಾಡುವವರಿಗೆ ಅಗತ್ಯವಿದೆ ಎನ್ನುತ್ತಾರೆ ಪ್ರಾಧ್ಯಾಪಕರು.
ಶ್ರೀದೇವಿಯವರು 2018ರ ಫೆಬ್ರುವರಿ 24ರಂದು ಮೃತಪಟ್ಟಿದ್ದರೆ, ಸುಶಾಂತ್ ಕಳೆದ ಜೂನ್ 14ರಂದು ಮೃತಪಟ್ಟಿದ್ದಾರೆ. ಇವರಿಬ್ಬರ ಸಾವಿನ ಬಗ್ಗೆ ಅನೇಕ ಸಂಶಯಗಳು ಇವೆ.