ನ್ಯೂಯಾರ್ಕ್: ಮಾಧ್ಯಮ ವ್ಯವಹಾರದ ದಂತಕಥೆ ಎಂದೇ ಪ್ರಸಿದ್ಧಿ ಪಡೆದಿರುವ, 14 ಬಿಲಿಯನ್ ಆಸ್ತಿಯೊಂದಿಗೆ ಜಗತ್ತಿನ ಸಿರಿವಂತರ ಪಟ್ಟಿಯಲ್ಲಿ ಸೇರ್ಪಡೆಗೊಂಡಿರುವ 10 ಮಕ್ಕಳ ತಂದೆ, 91 ವರ್ಷದ ರೂಪರ್ಟ್ ಮುರ್ಡೋಕ್ ತಮ್ಮ ನಾಲ್ಕನೆಯ ಪತ್ನಿಗೆ ಡಿವೋರ್ಸ್ ನೀಡುವ ಮೂಲಕ ಸುದ್ದಿಯಾಗಿದ್ದಾರೆ. ಇವರು ಫಾಕ್ಸ್ ಕಾರ್ಪೊರೇಷನ್, ಫಾಕ್ಸ್ ನ್ಯೂಸ್ ಚಾನೆಲ್ನ ಮೂಲ ಕಂಪನಿ ಮತ್ತು ವಾಲ್ ಸ್ಟ್ರೀಟ್ ಜರ್ನಲ್ನ ನ್ಯೂಸ್ ಕಾರ್ಪ್ ಒಡೆಯ.
ಆರು ವರ್ಷಗಳ ಹಿಂದೆ ಇವರು ನಟಿ ಜೆರ್ರಿ ಹಾಲ್ ಅವರನ್ನು ಮದುವೆಯಾಗಿದ್ದರು. ಇದಕ್ಕೂ ಮುನ್ನ ಮದುವೆಯಾದ ಮೂವರಿಗೆ ವಿಚ್ಛೇದನ ನೀಡಿ ಇವರನ್ನು ನಾಲ್ಕನೇ ಪತ್ನಿಯನ್ನಾಗಿ ಮಾಡಿಕೊಂಡಿದ್ದರು. 2016ರ ಮಾರ್ಚ್ನಲ್ಲಿ ಮಧ್ಯ ಲಂಡನ್ನಲ್ಲಿ ನಡೆದ ಸಮಾರಂಭದಲ್ಲಿ ಈ ಮದುವೆ ನಡೆದಿತ್ತು. 65 ವರ್ಷದ ಜೆರ್ರಿ ಹಾಲ್ ಮದುಮಗಳಾಗಿ ಬಂದಿದ್ದರು. ಆದರೆ ಇದೀಗ ವಿಚ್ಛೇದನ ಕೊಟ್ಟಿದ್ದಾರೆ. ಇದಕ್ಕೆ ಕಾರಣವಿನ್ನೂ ಬಹಿರಂಗಗೊಳ್ಳಲಿಲ್ಲ.
1956ರಲ್ಲಿ ಇವರ ಮೊದಲ ಮದುವೆಯಾಗಿತ್ತು. ಪೆಟ್ರೀಷಿಯಾ ಬುಕರ್ ಅವರೊಂದಿಗೆ ನಡೆದಿದ್ದ ಈ ಮದುವೆ 1967ಗೆ ಅಂತ್ಯಗೊಂಡಿತ್ತು. ನಂತರ ಮುರ್ಡೋಕ್ ಅವರು ಅನ್ನಾ ಮಾರಿಯಾ ಟೋರ್ವ್ ಅವರನ್ನು ಅದೇ ವರ್ಷ ಮದುವೆಯಾದರು, 1999ರಂದು ವಿಚ್ಛೇದನ ನೀಡಿದರು. ಅದೇ ಸಅಲಿನಲ್ಲಿ ವೆಂಡಿ ಡೆಂಗ್ ಅವರನ್ನು ಮೂರನೆಯ ಪತ್ನಿಯಾಗಿಸಿಕೊಂಡರು. 2016ರಲ್ಲಿ ಅವರಿಗೂ ಡಿವೋರ್ಸ್ ನೀಡಿ ಜೆರ್ರಿ ಅವರನ್ನು ಮದುವೆಯಾಗಿದ್ದರು. ಈ ಎಲ್ಲಾ ಮದುವೆಗಳಿಂದ ಇವರಿಗೆ ಒಟ್ಟು 10 ಮಕ್ಕಳು ಇದ್ದಾರೆ.
ಆಸ್ಟ್ರೇಲಿಯಾದಿಂದ ಬಂದ ಮುರ್ಡೋಕ್, 1952 ರಲ್ಲಿ ತನ್ನ ತಂದೆಯ ಮರಣದ ನಂತರ ನ್ಯೂಸ್ ಲಿಮಿಟೆಡ್ನ ನಿರ್ದೇಶಕರಾದರು. ಆಸ್ಟ್ರೇಲಿಯಾದ ಸಣ್ಣ ಸಂಸ್ಥೆಯೊಂದರ ನಿರ್ದೇಶಕರಾಗಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದ ಮುರ್ಡೋಕ್ ಇಂದು ವಿಶ್ವದ ಎರಡನೇ ಅತಿದೊಡ್ಡ ಮಾಧ್ಯಮ ಸಮೂಹವಾದ ನ್ಯೂಸ್ ಕಾರ್ಪ್ನ ಅಧ್ಯಕ್ಷರಾಗಿದ್ದಾರೆ. 2020 ರ ಹೊತ್ತಿಗೆ, ಮುರ್ಡೋಕ್ ಸುಮಾರು 50 ದೇಶಗಳಲ್ಲಿ 800 ಕ್ಕೂ ಹೆಚ್ಚು ಕಂಪನಿಗಳ ಮಾಲೀಕರಾಗಿದ್ದಾರೆ.