ರಾಜಮಂಡ್ರಿ (ಆಂಧ್ರ ಪ್ರದೇಶ): ಆಂಧ್ರಪ್ರದೇಶದ ರಾಜಮಂಡ್ರಿಯಲ್ಲಿ ಇಬ್ಬರು ವಿದ್ಯಾರ್ಥಿನಿಯರು ಕ್ಲಾಸ್ರೂಮಿನಲ್ಲಿಯೇ ಮದುವೆಯಾಗಿರುವ ಸುದ್ದಿ ಇದೀಗ ಜಾಲತಾಣದಲ್ಲಿ ಭಾರಿ ಸದ್ದು ಮಾಡುತ್ತಿದೆ. ಆಂಧ್ರಪ್ರದೇಶದಲ್ಲಿ ಕೆಲವು ಶಾಲೆಗಳು ಆರಂಭವಾದ ದಿನದಂದು ಈ ಘಟನೆ ನಡೆದಿದ್ದು, ಈ ಮದುವೆ ಫೋಟೋ ಎಲ್ಲೆಡೆ ಹರಿದಾಡುತ್ತಿದೆ. ಈ ಸಂಬಂಧ ಇದಾಗಲೇ ಈ ಇಬ್ಬರು ಅಪ್ರಾಪ್ತರನ್ನು ಪ್ರಾಂಶುಪಾಲರು ಟಿ.ಸಿ ಕೊಟ್ಟು ಶಾಲೆಯಿಂದ ಹೊರಕ್ಕೆ ಆಗಿರುವುದೂ ನಡೆದಿದೆ. ಕಳೆದ ತಿಂಗಳು 17 ರಂದು ಈ ವಿವಾಹ ನಡೆದಿದ್ದು, ಅದರ ಫೋಟೋ ಇದೀಗ ವೈರಲ್ ಆಗಿದೆ.
ಈ ಇಬ್ಬರು ಸಹಪಾಠಿಗಳು 17 ವರ್ಷದವರು ಎಂದು ತಿಳಿದುಬಂದಿದೆ. ಕ್ಲಾಸ್ರೂಂ ಒಳಗೆ ಬಾಲಕ ಬಾಲಕಿಗೆ ಮಂಗಳಸೂತ್ರ ಕಟ್ಟಿ, ಹಣೆಗೆ ಸಿಂಧೂರ ಹಚ್ಚಿದ್ದ. ಮದುವೆಯ ನಂತರ ಇವರು ಫೋಟೋ ಕ್ಲಿಕ್ಕಿಸಿಕೊಂಡಿದ್ದರಿಂದ ಘಟನೆ ಬೆಳಕಿಗೆ ಬಂದಿದೆ. ಮಾತ್ರವಲ್ಲದೇ ಬಾಲಕಿಯ ಸ್ನೇಹಿತೆ ವಿಡಿಯೊ ಮಾಡಿ, ತನ್ನ ಇತರ ಸ್ನೇಹಿತರೊಂದಿಗೆ ವಿಡಿಯೋವನ್ನು ಹಂಚಿಕೊಂಡಿದ್ದಾಳೆ.
ಆದರೆ ಇದೀಗ ಈ ಪ್ರಕರಣಕ್ಕೆ ಇದೀಗ ಭಾರಿ ಟ್ವಿಸ್ಟ್ ಸಿಕ್ಕಿದ್ದು, ಅಪ್ರಾಪ್ತರ ಮದುವೆಯಾಗಿರುವ ಕಾರಣ, ಈ ಮದುವೆಯನ್ನು ಅನೂರ್ಜಿತ ಮಾಡಲಾಗಿದೆ. ಹಿಂದೂ ವೈವಾಹಿಕ ಕಾಯ್ದೆಯ ಅಡಿ ಅಪ್ರಾಪ್ತರ ವಿವಾಹವು ವಿವಾಹವಲ್ಲ, ಅದಕ್ಕೆ ಕಾನೂನಿನಡಿ ಯಾವುದೇ ಮಾನ್ಯತೆ ಇಲ್ಲ. ಆದ್ದರಿಂದ ಈ ಮದುವೆಯನ್ನೂ ಅಧಿಕಾರಿಗಳು ಅಮಾನ್ಯ ಮಾಡಿದ್ದಾರೆ.
ಸದ್ಯ ಇವರಿಬ್ಬರ ವಿರುದ್ಧ ಕೇಸ್ ದಾಖಲಾಗಿದೆ. ಈ ವಿಷಯ ಸುದ್ದಿಯಾಗುತ್ತಿದ್ದಂತೆಯೇ ತಮ್ಮ ಮಗಳನ್ನು ಮನೆಯೊಳಕ್ಕೆ ಕರೆದುಕೊಳ್ಳಲು ಪಾಲಕರು ಹಿಂದೇಟು ಹಾಕುತ್ತಿದ್ದಾರೆ. ಮನೆಯಲ್ಲಿ ಆಕೆಗೆ ಪ್ರವೇಶ ನೀಡಲಿಲ್ಲ. ಆದ್ದರಿಂದ ಮಕ್ಕಳ ಆಯೋಗದಲ್ಲಿ ಬಾಲಕಿಗೆ ಆಶ್ರಯ ನೀಡಲಾಗಿದೆ. ಅವಳನ್ನು ಕೌನ್ಸೆಲಿಂಗ್ಗೆ ಕಳುಹಿಸಲಾಗಿದೆ ಎಂದು ಆಂದ್ರಪ್ರದೇಶದ ಮಹಿಳಾ ಆಯೋಗದ ಅಧ್ಯಕ್ಷ ವಾಸಿರೆಡ್ಡಿ ಪದ್ಮಾ ಹೇಳಿದ್ದಾರೆ.
ಈಗ ಅತ್ತ ಶಾಲೆಯಲ್ಲೂ ದಾಖಲು ಮಾಡಿಕೊಳ್ಳುತ್ತಿಲ್ಲ, ಇತ್ತ ಬಾಲಕಿಗೆ ಮನೆಯಲ್ಲಿಯೂ ಪ್ರವೇಶವಿಲ್ಲ. ಆಗಿರುವ ಮದುವೆಯೂ ಅನೂರ್ಜಿತವಾಗಿದೆ, ಸಾಲದು ಎಂಬುದಕ್ಕೆ ಮಾಡಿರುವ ತಪ್ಪಿಗಾಗಿ ಕೋರ್ಟ್ ಅಲೆದಾಡಬೇಕಾಗಿದೆ. ಸದ್ಯ ಬಾಲಕನ ಬಗ್ಗೆ ಇದುವರೆಗೆ ತಿಳಿದುಬಂದಿಲ್ಲ.