ನಾಗ್ಪುರ: ಸೈದ್ಧಾಂತಿಕ ಭಿನ್ನಾಭಿಪ್ರಾಯ ಮತ್ತು ವಿರೋಧ ಬೇರೆ ಬೇರೆ. ಆದರೆ ಒಂದಾಗಿ ಬಾಳಬೇಕಾದವರು ಸಮಾಜದಲ್ಲಿ ವೈಯಕ್ತಿಕ ದ್ವೇಷಕ್ಕೆ ಇಳಿಯಬಾರದು ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘ (ಆರ್ಎಸ್ಎಸ್)ದ ಸರಕಾರ್ಯವಾಹ ದತ್ತಾತ್ರೇಯ ಹೊಸಬಾಳೆ ಹೇಳಿದರು.
ನಾಗ್ಪುರದಲ್ಲಿ ದತ್ತಾಜಿ ದಿದೋಲ್ಕರ್ ಅವರ ಜನ್ಮ ಶತಮಾನೋತ್ಸವ ಸಮಾರಂಭದಲ್ಲಿ ಸಭೆಯನ್ನುದ್ದೇಶಿಸಿ ಮಾತನಾಡಿದ ಹೊಸಬಾಳೆ ಅವರು ದಿದೋಲ್ಕರ್ ಅವರು ಆರ್ಎಸ್ಎಸ್ ಮುಖಂಡರಲ್ಲಿ ಒಬ್ಬರಾಗಿದ್ದರು ಮತ್ತು ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ನ ಸ್ಥಾಪಕ ಸದಸ್ಯರಾಗಿದ್ದರು. ಎಲ್ಲರೊಂದಿಗೂ ಸೌಹಾರ್ದಯುತ ಸಂಬಂಧ ಹೊಂದಿದ್ದು, ಇತರರ ಅಭಿಪ್ರಾಯಗಳನ್ನು ಗೌರವಿಸುತ್ತಿದ್ದರು ಎಂದರು.
ಸೈದ್ಧಾಂತಿಕ ಭಿನ್ನಾಭಿಪ್ರಾಯವೇ ಬೇರೆ, ಆದರೆ ಸಮಾಜದಲ್ಲಿ ವೈಯಕ್ತಿವಾಗಿ ವಿರೋಧ ಇರಬಾರದು. ನಾವು ಪರಸ್ಪರ ದ್ವೇಷ ಸಾಧಿಸದೆ ಮಾನವೀಯತೆ ಮತ್ತು ನ್ಯಾಯದ ತತ್ವಗಳ ಮೇಲೆ ಸರಳ ಜೀವನ ನಡೆಸಬೇಕು ಎಂದ ಹೊಸಬಾಳೆ ಅವರು ಭಾರತೀಯ ಮಜ್ದೂರ್ ಸಂಘದ ಸಂಸ್ಥಾಪಕ ದತ್ತೋಪಂಥ ಠೇಂಗಡಿಯವರು ಅನೇಕ ಕಮ್ಯುನಿಸ್ಟ್ ನಾಯಕರೊಂದಿಗೆ ಅತ್ಯಂತ ಆತ್ಮೀಯ ಸಂಬಂಧ ಹೊಂದಿದ್ದರು. ಸೈದ್ಧಾಂತಿಕ ಭಿನ್ನಾಭಿಪ್ರಾಯ ವೈರತ್ವಕ್ಕೆ ಕಾರಣವಾಗಬಾರದು. ಯಾರೂ ಸಮಾಜದಲ್ಲಿ ದ್ವೇಷದಿಂದ ಬದುಕುವುದನ್ನು ಕಲಿಸುವುದಿಲ್ಲ. ದತ್ತಾಜಿಯಂಥವರು ನಮಗೆ ಇಂಥ ವಿಶಾಲ ಹೃದಯದಿಂದ ಬದುಕುವುದನ್ನು ಕಲಿಸಿಕೊಟ್ಟರು ಎಂದು ತಿಳಿಸಿದರು.
ಸಮಾರಂಭದಲ್ಲಿ ಕೇಂದ್ರ ಸಚಿವ ನಿತಿನ್ ಗಡ್ಕರಿ ಉಪಸ್ಥಿತರಿದ್ದು, ಆರ್ಎಸ್ಎಸ್ ಆರಂಭಿಕ ದಿನಗಳಲ್ಲಿ ದತ್ತಾಜಿಯವರ ಒಡನಾಟವನ್ನು ಸ್ಮರಿಸಿಕೊಂಡರು.