ಹೈದರಾಬಾದ್: ಆಸಿಡ್ ದಾಳಿಯನ್ನು, ಅತ್ಯಾಚಾರ ಬೆದರಿಕೆಯನ್ನು ಮತ್ತು ಪಬ್ಲಿಕ್ನಲ್ಲಿ ಬರುವ ಕಾಮೆಂಟ್ ಅನ್ನು ಎದುರಿಸುವ ತಾಳ್ಮೆ ನನ್ನಲ್ಲಿ ಇಲ್ಲ. ಅಪ್ಪ-ಅಮ್ಮ ನಾನು ಈ ರೀತಿ ಹೇಳುತ್ತಿರುವುದಕ್ಕೆ ಕ್ಷಮಿಸಿ. ನನ್ನಿಂದ ಉಳಿಯಲು ಸಾಧ್ಯವಾಗುತ್ತಿಲ್ಲ. ಇದಿಷ್ಟು 2018ರ ಮಿಸ್ ತೆಲಂಗಾಣ ವಿಜೇತೆ ಹಸಿನಿ ಅವರು ಬರೆದಿದ್ದ ನೋವಿನ ಮಾತುಗಳು. ಮೊನ್ನೆಯಷ್ಟೇ ಆತ್ಮಹತ್ಯೆಗೆ ಯತ್ನಿಸಿದ್ದ ಹಸಿನಿ ಇದೀಗ ಮತ್ತೊಮ್ಮೆ ಆತ್ಮಹತ್ಯೆ ಪ್ರಯತ್ನ ಮಾಡಿದ್ದಾರೆ.
ಚಿಕ್ಕ ವಯಸ್ಸಿನಿಂದಲೂ ಮಾಡೆಲಿಂಗ್ ಅನ್ನು ತುಂಬಾ ಪ್ರೀತಿಸುತ್ತಿದ್ದೆ ಎಂದು ಹಸಿನಿ ಹೇಳಿದ್ದಾರೆ. ಮೊನ್ನೆಯಷ್ಟೇ ಹಸಿನಿ ಅವರು ಲೈವ್ ವಿಡಿಯೋ ಹರಿಬಿಟ್ಟು ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಯತ್ನಿಸಿದ್ದರು. ವಿಡಿಯೋ ನೋಡಿದ ಆಕೆಯ ಫ್ರೆಂಡ್ಸ್ ತಕ್ಷಣ ಪೊಲೀಸ್ ಕಂಟ್ರೋಲ್ ರೂಮ್ ನಂ. 100ಕ್ಕೆ ಕರೆ ಮಾಡಿ ಮಾಹಿತಿ ನೀಡಿದ್ದರು. ತಕ್ಷಣ ಕಾರ್ಯಪ್ರವೃತ್ತರಾದ ನಾರಾಯಣಗುಡ ಪೊಲೀಸರು ಆಕೆಯ ಸ್ಥಳಕ್ಕೆ ಧಾವಿಸಿ, ಸಾವಿನ ದವಡೆಯಿಂದ ಪಾರು ಮಾಡಿದ್ದರು. ಹೈದರಾಬಾದ್ನ ಹಿಮಾಯತ್ನಗರದ 6ನೇ ರಸ್ತೆಯಲ್ಲಿರುವ ಅವರ ಅಪಾರ್ಟ್ಮೆಂಟ್ನಲ್ಲಿ ಘಟನೆ ನಡೆದಿತ್ತು. ರಕ್ಷಣೆಯ ಬೆನ್ನಲ್ಲೇ ಆಕೆಯನ್ನು ಹೈದರ್ಗುಡದಲ್ಲಿರುವ ಅಪೊಲೊ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಚಿಕಿತ್ಸೆ ಕೊಡಿಸಲಾಗಿತ್ತು.
ಇದೀಗ ಹಸಿನಿ ಮತ್ತೊಮ್ಮೆ ಆತ್ಮಹತ್ಯೆಗೆ ಯತ್ನಿಸಿದ್ದಾರೆ. ಕೃಷ್ಣಾ ಜಿಲ್ಲೆ ಕಂಚಿಕಚಾರ್ಲ ಬಳಿಯ ಕೀಸರ ಸೇತುವೆಯಿಂದ ಮುನ್ನೇರು ನದಿಗೆ ಹಾರಲು ಶುಕ್ರವಾರ ಯತ್ನಿಸಿದ್ದಾರೆ. ಕೃಷ್ಣ ಜಿಲ್ಲೆಯ ವಿರುಲಪಾಡು ವಲಯದ ನಿವಾಸಿಯಾಗಿರುವ ಹಸಿನಿ, ಹೈದರಾಬಾದ್ನ ಹಿಮಾಯತ್ನಗರದಲ್ಲಿರು ಅಪಾರ್ಟ್ಮೆಂಟ್ನಲ್ಲಿ ವಾಸವಿದ್ದರು. ಶುಕ್ರವಾರ ನದಿಗೆ ಹಾರುವುದನ್ನು ನೋಡಿದ ಸ್ಥಳೀಯರು ಆಕೆಯನ್ನು ರಕ್ಷಿಸಿ ಸಮೀಪದ ನಂದಿಗಾಮ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ.
ಮಾಡೆಲ್ ಆಗಿರುವ ಹಸಿನಿ, 2018ರಲ್ಲಿ ಮಿಸ್ ತೆಲಂಗಾಣ ಕಿರೀಟವನ್ನು ಮುಡಿಗೇರಿಸಿಕೊಂಡಿದ್ದಾರೆ. ಇತ್ತೀಚೆಗಷ್ಟೇ ಯುವಕನೊಬ್ಬನ ವಿರುದ್ಧ ಹಸಿನಿ, ಲೈಂಗಿಕ ದೌರ್ಜನ್ಯ ನೀಡಿದ್ದಾನೆಂದು ಆರೋಪಿಸಿ ಜುಬಿಲಿ ಹಿಲ್ಸ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು.
ಸದ್ಯ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಹಸಿನಿ ಆತ್ಮಹತ್ಯೆಗೆ ಕಾರಣ ಏನೆಂದು ಹುಡುಕುವ ಪ್ರಯತ್ನದಲ್ಲಿದ್ದಾರೆ. ಯುವಕನ ವಿರುದ್ಧ ದೂರು ದಾಖಲಿಸಿದ ಕೆಲವೇ ದಿನಗಳಲ್ಲಿ ಆಕೆ ಆತ್ಮಹತ್ಯೆಗೆ ಯತ್ನಿಸಿರುವುದು ಅನುಮಾನಕ್ಕೆ ಎಡೆಮಾಡಿಕೊಟ್ಟಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ. (ಏಜೆನ್ಸೀಸ್)