Black Tea : ಬ್ಲ್ಯಾಕ್ ಟೀನಲ್ಲಿ ವಿಷ ಬೆರೆಸಿ ಆಪ್ತ ಸ್ನೇಹಿತನನ್ನೇ ಕೊಲೆ ಮಾಡಲು ಯತ್ನಿಸಿದ ಆಘಾತಕಾರಿ ಘಟನೆ ಕೇರಳದ ಮಲಪ್ಪುರಂನಲ್ಲಿ ನಡೆದಿದೆ.
ಸಂತ್ರಸ್ತನನ್ನು ಸುಂದರನ್ ಎಂದು ಗುರುತಿಸಲಾಗಿದೆ. ಕೊಲೆಗೆ ಯತ್ನಿಸಿದ ಆರೋಪದ ಮೇಲೆ ಕಲಪಟ್ಟುಕುನ್ನು ಮೂಲದ ಅಜಯ್ ಎಂಬಾತನನ್ನು ಬಂಧಿಸಲಾಗಿದೆ. ಸಂತ್ರಸ್ತ ಸುಂದರನ್ ಟ್ಯಾಪಿಂಗ್ ಕೆಲಸಗಾರ. ಯಾವುದೋ ಒಂದು ವಿಚಾರಕ್ಕೆ ಇಬ್ಬರ ನಡುವೆ ಜಗಳ ನಡೆಯಿತು. ಇದೇ ಜಗಳ ದ್ವೇಷಕ್ಕೆ ತಿರುಗಿ ಕೊಲೆ ಮಾಡಲು ಯತ್ನಿಸುವ ಮಟ್ಟಕ್ಕೆ ಬೆಳೆದಿದೆ.
ಪ್ರತಿದಿನ ಬೆಳಗ್ಗೆ ಕೆಲಸಕ್ಕೆ ಹೋಗುವಾಗ ಫ್ಲಾಸ್ಕ್ನಲ್ಲಿ ಬ್ಲ್ಯಾಕ್ ಟೀ ಹಾಕಿಕೊಂಡು ಸುಂದರನ್ ಹೋಗುತ್ತಿದ್ದ. ಅದೇ ರೀತಿ ಆಗಸ್ಟ್ 10 ರಂದು, ಆತ ಎಂದಿನಂತೆ ಕೆಲಸಕ್ಕೆ ಹೋದಾಗ, ಒಂದು ಫ್ಲಾಸ್ಕ್ನಲ್ಲಿ ಬ್ಲ್ಯಾಕ್ ಟೀ ತೆಗೆದುಕೊಂಡು ಹೋಗಿದ್ದಾನೆ. ಕೆಲಸದ ಮಧ್ಯದಲ್ಲಿ ಅದನ್ನು ಕುಡಿದಾಗ, ರುಚಿಯಲ್ಲಿ ವ್ಯತ್ಯಾಸ ಕಂಡುಬಂದಿದೆ.
ಚಹಾದಲ್ಲಿ ಬೇರೆ ಏನಾದರೂ ಮಿಶ್ರಣವಾಗಿರಬಹುದು ಅಂತ ಅದನ್ನು ಸುರಿದಿದ್ದಾನೆ. ಮರುದಿನದಿಂದ ಆತ ಪ್ಲಾಸ್ಟಿಕ್ ಬಾಟಲಿಯಲ್ಲಿ ಬ್ಲ್ಯಾಕ್ ಟೀ ತೆಗೆದುಕೊಂಡು ಹೋಗಲು ಪ್ರಾರಂಭಿಸಿದ್ದಾನೆ. ಆದರೆ, ಆಗಸ್ಟ್ 14 ರಂದು ಮತ್ತೊಮ್ಮೆ ಚಹಾದ ರುಚಿ ವಿಭಿನ್ನವಾಗಿರುವುದನ್ನು ಸುಂದರನ್ ಗಮನಿಸಿದ್ದಾನೆ.
ಬಳಿಕ ಬಾಟಲಿಯಿಂದ ಟೀ ಅನ್ನು ಸುರಿದು ಪರೀಕ್ಷಿಸಿದಾಗ, ಅದರ ಬಣ್ಣ ಬದಲಾವಣೆ ಆಗಿರುವುದು ಕಂಡುಬಂದಿದೆ. ಇದರಿಂದ ಅನುಮಾನಗೊಂಡ ಸುಂದರನ್ ಪೊಲೀಸರಿಗೆ ದೂರು ದಾಖಲಿಸಿದರು. ನಂತರದ ತನಿಖೆಯಲ್ಲಿ ವಿಷ ಬೆರೆಸಲಾಗಿದೆ ಮತ್ತು ಅದರ ಹಿಂದೆ ಅಜಯ್ ಇದ್ದಾನೆ ಎಂದು ಗೊತ್ತಾಗಿದೆ.
ಅಜಯ್ನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದ ನಂತರ ಆರೋಪಿ ಅಪರಾಧವನ್ನು ಒಪ್ಪಿಕೊಂಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ. ಸದ್ಯ ಆರೋಪಿಯನ್ನು ಬಂಧಿಸಲಾಗಿದೆ. (ಏಜೆನ್ಸೀಸ್)