ಅಮರಾವತಿ: ಆಂಧ್ರಪ್ರದೇಶದ ಮುದ್ದಿನೆಪಲ್ಲಿ ಗ್ರಾಮದಲ್ಲಿ ನಡೆದ ಮದುವೆ ಸಮಾರಂಭದಲ್ಲಿ ಉಪಸ್ಥಿತರಿದ್ದ ಅತಿಥಿಗಳಿಗೆ ಅಡುಗೆಯವರು ಪಿಪಿಇ ಕಿಟ್ ಧರಿಸಿ ಊಟ ಬಡಿಸಿದ ವಿಡಿಯೋ ಭಾರಿ ವೈರಲ್ ಆಗಿದೆ.
ಕೋವಿಡ್-19 ಪಿಡುಗಿನ ಹಿನ್ನೆಲೆಯಲ್ಲಿ ತಾಲೂಕು ಆಡಳಿತದ ಅನುಮತಿ ಪಡೆದ ವಧು ಮತ್ತು ವರನ ಮನೆಯವರು ಜು.22ರಂದು ವಿವಾಹ ಸಮಾರಂಭ ಏರ್ಪಡಿಸಿದ್ದರು. ಸೋಂಕು ಹರಡದಂತೆ ಸಂಪೂರ್ಣ ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಂಡಿದ್ದರು. ಅಲ್ಲದೆ, ಕೋವಿಡ್-19ರ ಎಲ್ಲ ಮುನ್ನೆಚ್ಚರಿಕೆ ಕ್ರಮ ಕೈಗೊಂಡು ಮದುವೆಯಲ್ಲಿ ಪಾಲ್ಗೊಳ್ಳುವ ಅತಿಥಿಗಳಿಗೆ ಊಟೋಪಚಾರ ಮಾಡಬೇಕು ಎಂದು ಕೃಷ್ಣ ಜಿಲ್ಲೆಯ ಗುಡಿವಾಡಾದ ಕೋಟಿ ಕೇಟರರ್ಸ್ಗೆ ಸೂಚಿಸಲಾಗಿತ್ತು.
ಇದನ್ನೂ ಓದಿ: ಬಿಹಾರದಲ್ಲಿ ಮಿತ್ರಪಕ್ಷಗಳನ್ನು ಒಟ್ಟಾಗಿ ಕರೆದೊಯ್ಯಲಿದೆ ಬಿಜೆಪಿ: ಸುಳಿವು ನೀಡಿದ್ರು ಅಧ್ಯಕ್ಷ ಜೆಪಿ ನಡ್ಡಾ
ಈ ಹಿನ್ನೆಲೆಯಲ್ಲಿ ಕೋಟಿ ಕೇಟರರ್ಸ್ ಅಡುಗೆ ಕೆಲಸಕ್ಕೆ ಬಂದಿದ್ದ ಎಲ್ಲ ನೌಕರರ ದೈಹಿಕ ತಾಪಮಾನ ಪರೀಕ್ಷಿಸಿದ್ದಲ್ಲದೆ, ಸ್ಯಾನಿಟೈಸರ್ಗಳನ್ನು ಬಳಸಿದ್ದರು. ಊಟ ಬಡಿಸಲೆಂದೇ 12 ಜನರಿಗೆ ಪಿಪಿಇ ಕಿಟ್ ಕೊಟ್ಟಿದ್ದರು. ಇದನ್ನು ಧರಿಸಿದ ಅವರು ಅತಿಥಿಗಳೆಲ್ಲರಿಗೂ ಊಟ ಬಡಿಸಿದ್ದು ವಿಶೇಷವಾಗಿತ್ತು. ಊಟದ ಸರತಿ ಸಾಲಿನಲ್ಲಿ ಕೂಡ ದೈಹಿಕ ಅಂತರ ಇರುವಂತೆ ಕೇಟರರ್ಸ್ ಟೇಬಲ್ಗಳನ್ನು ಜೋಡಿಸಿದ್ದು ಇದರ ಮತ್ತೊಂದು ವಿಶೇಷವಾಗಿತ್ತು.
ಊಟ ಬಡಿಸುವುದು ಮುಗಿದ ನಂತರದಲ್ಲಿ ಅಡುಗೆಯವರು ಧರಿಸಿದ್ದ ಪಿಪಿಇ ಕಿಟ್ಗಳನ್ನು ವೈಜ್ಞಾನಿಕವಾಗಿ ವಿಲೇವಾರಿ ಮಾಡಲಾಯಿತು. ಅಲ್ಲಿಯೂ ಕೂಡ ಸುರಕ್ಷತೆಯ ಕಾಳಜಿ ತೋರಲಾಯಿತು ಎಂದು ಮದುವೆ ಕಾರ್ಯಕ್ರಮದ ಆಯೋಜಕರು ಮಾಹಿತಿ ನೀಡಿದ್ದಾರೆ.