Porn Racket : ಉತ್ತರ ಪ್ರದೇಶದ ನೋಯ್ಡಾದಲ್ಲಿ ಗಂಡ-ಹೆಂಡತಿ ನಡೆಸುತ್ತಿದ್ದ 'ಪೋರ್ನ್ ದಂಧೆ' ಬೆಳಕಿಗೆ ಬಂದಿದೆ. ಈ ದಂಧೆಗೆ ಅಂತಾರಾಷ್ಟ್ರೀಯ ಸಂಪರ್ಕ ಇರುವುದನ್ನು ಸ್ಥಳೀಯ ಪೊಲೀಸ್ ಅಧಿಕಾರಿಗಳು ಪತ್ತೆಹಚ್ಚಿದ್ದಾರೆ.
ಆರೋಪಿ ದಂಪತಿಯನ್ನು ಉಜ್ವಲ್ ಕಿಶೋರ್ ಮತ್ತು ಆತನ ಪತ್ನಿ ನೀಲು ಶ್ರೀವಾಸ್ತವ ಎಂದು ಗುರುತಿಸಲಾಗಿದೆ. ಇಬ್ಬರು ಕಳೆದ 5 ವರ್ಷಗಳಿಂದ ಈ ದಂಧೆಯನ್ನು ನಡೆಸುತ್ತಿದ್ದರು. ಈ ದಂಧೆಗೆ ವಿದೇಶದಿಂದ ಭಾರಿ ಹಣ ಕೂಡ ಬರುತ್ತಿತ್ತು ಎಂದು ತಿಳಿದುಬಂದಿದೆ. ಖತರ್ನಾಕ್ ದಂಪತಿ, ಸೈಪ್ರಸ್ ದೇಶದ ಟೆಕ್ನಿಯಸ್ ಲಿಮಿಟೆಡ್ ಎಂಬ ಕಂಪನಿಯೊಂದಿಗೆ ಸಂಪರ್ಕ ಹೊಂದಿದ್ದರು ಎಂದು ತಿಳಿದುಬಂದಿದೆ.
ಈ ಕಂಪನಿ Xhamster ಮತ್ತು Stripchat ನಂತಹ ಜನಪ್ರಿಯ ವಯಸ್ಕರ ವೆಬ್ಸೈಟ್ಗಳನ್ನು ನಿರ್ವಹಿಸುತ್ತದೆ. ಜಾಹೀರಾತು ಮತ್ತು ಮಾರುಕಟ್ಟೆ ಸಂಶೋಧನೆಗಾಗಿ ವಿದೇಶಿ ಕಂಪನಿಗಳಿಗೆ ಹಣವನ್ನು ವರ್ಗಾಯಿಸಲು ದಂಪತಿ ಸುಳ್ಳು ಉದ್ದೇಶದ ಕೋಡ್ಗಳನ್ನು ಬಳಸಿರುವುದು ಕಂಡುಬಂದಿದೆ.
ಜಾರಿ ನಿರ್ದೇಶನಾಲಯ (ED), ದಂಪತಿಯ ನೋಯ್ಡಾ ಮನೆಯ ಮೇಲೆ ದಾಳಿ ನಡೆಸಿ 15.66 ಕೋಟಿ ರೂಪಾಯಿಗಳ ಅಕ್ರಮ ವಿದೇಶಿ ಹಣವನ್ನು ವಶಪಡಿಸಿಕೊಂಡಿದೆ. ತನಿಖೆಯ ಸಮಯದಲ್ಲಿ, ಪ್ರಮುಖ ಆರೋಪಿ ಉಜ್ವಲ್ ಕಿಶೋರ್ ಈ ಹಿಂದೆ ರಷ್ಯಾದಲ್ಲಿ ಇದೇ ರೀತಿಯ ದಂಧೆಯಲ್ಲಿ ಭಾಗಿಯಾಗಿದ್ದ ಎಂದು ಕಂಡುಬಂದಿದೆ. ಭಾರತಕ್ಕೆ ಸ್ಥಳಾಂತರಗೊಂಡ ನಂತರ, ಆತ ಇಲ್ಲಿಯೂ ಅದೇ ರೀತಿ ಕಾರ್ಯನಿರ್ವಹಿಸುತ್ತಿದ್ದನೆಂದು ಅಧಿಕಾರಿಗಳು ಕಂಡುಕೊಂಡಿದ್ದಾರೆ.
ಈ ಜೋಡಿ ಮಾಡೆಲ್ಗಳನ್ನು ನೇಮಿಸಿಕೊಳ್ಳಲು ಸಾಮಾಜಿಕ ಜಾಲತಾಣ ವೇದಿಕೆಗಳನ್ನು, ಮುಖ್ಯವಾಗಿ ಫೇಸ್ಬುಕ್ ಅನ್ನು ಬಳಸಿದೆ. ಉತ್ತಮ ಸಂಬಳದ ಭರವಸೆಯೊಂದಿಗೆ ಮಾಡೆಲಿಂಗ್ ಅವಕಾಶಗಳನ್ನು ನೀಡಲು ಅವರು ''Echato.com'' ಎಂಬ ಫೇಸ್ಬುಕ್ ಖಾತೆಯನ್ನು ತೆರೆದಿದ್ದರು. ಈ ಜಾಹೀರಾತುಗಳ ಮೂಲಕ ದೆಹಲಿ ಮತ್ತು ಸುತ್ತಮುತ್ತಲಿನ ಪ್ರದೇಶಗಳ ಅನೇಕ ಮಹಿಳೆಯರು ಅವರ ಬಲೆಗೆ ಸಿಲುಕಿದರು.
ನೋಯ್ಡಾದ ದಂಪತಿ ಆಡಿಷನ್ಗಾಗಿ ಪ್ಲಾಟ್ಗೆ ಬಂದ ನಂತರ, ಅವರಿಗೆ ಪೋರ್ನ್ ದಂಧೆಯಲ್ಲಿ ಭಾಗವಹಿಸಲು ಆಮಿಷ ಒಡ್ಡುತ್ತಿದ್ದರು. ಅವರಿಗೆ ತಿಂಗಳಿಗೆ 1 ಲಕ್ಷ ರೂಪಾಯಿಯಿಂದ 2 ಲಕ್ಷದವರೆಗೆ ಸಂಬಳ ನೀಡಲಾಗಿದೆ. ದಾಳಿಯ ಸಮಯದಲ್ಲಿ, ದಂಪತಿ ವಾಸಿಸುತ್ತಿದ್ದ ಫ್ಲಾಟ್ನಲ್ಲಿ ವೃತ್ತಿಪರ ವೆಬ್ಕ್ಯಾಮ್ ಸ್ಟುಡಿಯೋವನ್ನು ಸ್ಥಾಪಿಸಲಾಗಿದೆ ಎಂದು ಅಧಿಕಾರಿಗಳು ಕಂಡುಕೊಂಡಿದ್ದಾರೆ. ವಯಸ್ಕ ವಿಷಯವನ್ನು ಆನ್ಲೈನ್ನಲ್ಲಿ ಸ್ಟ್ರೀಮಿಂಗ್ ಮಾಡುವ ವ್ಯವಸ್ಥೆಗಳು ಸಹ ಇದ್ದವು.
ಮಾಹಿತಿಯ ಪ್ರಕಾರ, ಗ್ರಾಹಕರು ಮಾಡಿದ ಪಾವತಿಯ ಆಧಾರದ ಮೇಲೆ ಮಾಡೆಲ್ಗಳನ್ನು ವಿವಿಧ ವರ್ಗಗಳಾಗಿ ವರ್ಗೀಕರಿಸಲಾಗಿದೆ. ಅವುಗಳೆಂದರೆ, ಅರ್ಧ ಮುಖದ ಶೋಗಳು, ಪೂರ್ಣ ಮುಖದ ಶೋಗಳು ಮತ್ತು ಸಂಪೂರ್ಣ ನಗ್ನ ಶೋಗಳು. ಈ ಸೇವೆಗಳನ್ನು ಪ್ರವೇಶಿಸಲು, ಗ್ರಾಹಕರು ಮೊದಲು ಟೋಕನ್ ಖರೀದಿಸಬೇಕು. ಈ ಆದಾಯದ 75 ಪ್ರತಿಶತ ದಂಪತಿಗೆ ಮತ್ತು 25 ಪ್ರತಿಶತ ಮಾಡೆಲ್ಗಳಿಗೆ ಹೋಗುತ್ತದೆ. ಆರಂಭದಲ್ಲಿ, ಅವರು ಗ್ರಾಹಕರಿಂದ ಕ್ರಿಪ್ಟೋ ಕರೆನ್ಸಿ ಮೂಲಕ ಪಾವತಿಗಳನ್ನು ಪಡೆದರು.
ಟೆಕ್ನಿಯಸ್ ಲಿಮಿಟೆಡ್ ಮೂಲಕ 7 ಕೋಟಿ ರೂ.ಗಳನ್ನು ವರ್ಗಾಯಿಸಲಾದ ನೆದರ್ಲ್ಯಾಂಡ್ಸ್ನಲ್ಲಿ ಬ್ಯಾಂಕ್ ಖಾತೆಯನ್ನು ಇಡಿ ಕಂಡುಹಿಡಿದಿದೆ. ಭಾರತದಲ್ಲಿ ಅಂತಾರಾಷ್ಟ್ರೀಯ ಡೆಬಿಟ್ ಕಾರ್ಡ್ಗಳನ್ನು ಬಳಸಿಕೊಂಡು ಈ ಹಣವನ್ನು ಹಿಂಪಡೆಯಲಾಗಿದೆ. ಈ ದಂಧೆಯಲ್ಲಿ ಸಾವಿರಾರು ಮಹಿಳೆಯರು ಭಾಗಿಯಾಗಿರಬಹುದು ಎಂದು ಅಧಿಕಾರಿಗಳು ಅನುಮಾನಿಸಿದ್ದಾರೆ. (ಏಜೆನ್ಸೀಸ್)