ಗುಜರಾತ್: ನ್ಯಾಯಾಲಯದ ಕೊಠಡಿಯಲ್ಲಿಯೇ ನಾಲ್ವರು ಫಿನೈಲ್ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ ಆಘಾತಕಾರಿ ಘಟನೆ ಗುಜರಾತ್ನಲ್ಲಿ ನಡೆದಿದೆ.
ಶೈಲೇಶ್ ಪಾಂಚಾಲ್(52), ಆತನ ಪತ್ನಿ ಜಯಶ್ರೀಬೆನ್(50), ಹಾರ್ದಿಕ್ ಪಟೇಲ್(24) ಮತ್ತು ಮನೋಜ್ ವೈಷ್ಣವ್(41) ಎಂಬುವರು ಆತ್ಮಹತ್ಯೆಗೆ ಯತ್ನಿಸಿದ್ದು, ತಕ್ಷಣವೇ ಅವರನ್ನು ವ್ಯಾನ್ ಮೂಲಕ ಸಮೀಪದ ಸೋಲಾ ಸಿವಿಲ್ ಆಸ್ಪತ್ರೆಗೆ ಸಾಗಿಸಿ ಚಿಕಿತ್ಸೆ ನೀಡಲಾಗಿದೆ. ಸದ್ಯ, ನಾಲ್ವರ ಆರೋಗ್ಯವನ್ನು ಸ್ಥಿರವಾಗಿದ್ದು ಸಾವಿನಿಂದ ಪಾರಾಗಿದ್ದಾರೆ ಎಂದು ವೈದ್ಯರು ತಿಳಿಸಿದ್ದಾರೆ.
ಕಲರ್ ಮರ್ಚೆಂಟ್ ಕೋಆಪರೇಟಿವ್ ಬ್ಯಾಂಕ್ ಜನರಲ್ ಮ್ಯಾನೇಜರ್ ಕಿನ್ನರ ಶಾ ವಿರುದ್ಧ ಬ್ಯಾಂಕ್ ಅವ್ಯವಹಾರ ಪ್ರಕರಣದಲ್ಲಿ ಪಾಂಚಾಲ್ ಕುಟುಂಬದವರು ದೂರುದಾರರಾಗಿದ್ದರು. ಪಾಂಚಾಲ್ ಕುಟುಂಬವರಿಗೆ ಗೊತ್ತಾಗದಂತೆ ತಮ್ಮ ಮನೆಯನ್ನು ಅಡಮಾನವಿಟ್ಟು 1.60 ಕೋಟಿ ಸಾಲ ವಿತರಿಸಿದ್ದಾರೆ ಎಂಬ ಆರೋಪ ಮ್ಯಾನೇಜರ್ ವಿರುದ್ಧ ಕೇಳಿಬಂದಿತ್ತು.
ಹೀಗಾಗಿ ಪಾಂಚಾಲ್ ಕುಟುಂಬದವರು ಜನವರಿ 13ರಂದು ಅಹಮದಾಬಾದ್ನ ಆನಂದನಗರ ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ದಾಖಲಿಸಿದ್ದರು. ಇದರ ನಂತರ ತನ್ನ ಬಂಧನದ ಭೀತಿಯಿಂದ ಮ್ಯಾನೇಜರ್ ನಿರೀಕ್ಷಣಾ ಜಾಮೀನಿಗೆ ಅರ್ಜಿ ಸಲ್ಲಿಸಿದ್ದರು. ನ್ಯಾಯಾಲಯವು ಈ ಜಾಮೀನು ಅರ್ಜಿಯನ್ನು ಪರಿಗಣಿಸಿತ್ತು. ಈ ಕುರಿತ ವಿಚಾರಣೆ ಮುಗಿಯುತ್ತಿದ್ದಂತೆ ನಾಲ್ವರು ನ್ಯಾಯಾಲಯದ ತೀರ್ಪಿನ ವಿರುದ್ಧ ಎದ್ದುನಿಂತು ಘೋಷಣೆ ಕೂಗಿ ಬಾಟಲಿಯಿಂದ ಫಿನೈಲ್ ಕುಡಿದಿದ್ದಾರೆ.(ಏಜೆನ್ಸೀಸ್)