ನವದೆಹಲಿ: ಆಫ್ರಿಕಾದ ಸುಡಾನ್ ರಾಜಧಾನಿ ಖತ್ರೌಮ್ ಉದ್ಯಾನವನದಲ್ಲಿ ಅಪೌಷ್ಠಿಕತೆಯಿಂದ ನರಳುತ್ತಿರುವ ಆಫ್ರಿಕನ್ ಸಿಂಹಗಳ ಉಳಿವಿಗಾಗಿ ಸಾಮಾಜಿಕ ಜಾಲತಾಣದಲ್ಲಿ ಬಹುದೊಡ್ಡ ಅಭಿಯಾನವೊಂದನ್ನು ಕೈಗೊಳ್ಳಲಾಗಿದೆ.
ಸಿಂಹಗಳೆಲ್ಲವು ಅಲ್ ಖುರೇಶಿ ಉದ್ಯಾನವನದಲ್ಲಿದ್ದು, ಸಾಕಷ್ಟು ಆಹಾರ ಮತ್ತು ಔಷಧವಿಲ್ಲದೆ ನಿತ್ರಾಣ ಸ್ಥಿತಿಯಲ್ಲಿವೆ.
ಒಸ್ಮಾನ್ ಸಲಿಹ್ ಎಂಬ ಫೇಸ್ಬುಕ್ ಬಳಕೆದಾರ ಅನೇಕ ಫೋಟೋಗಳನ್ನು ಶೇರ್ ಮಾಡಿಕೊಂಡಿದ್ದು, ಅದರಲ್ಲಿ ಅಪೌಷ್ಠಿಕತೆಯಿಂದ ನರಳುತ್ತಿರುವ ಸಿಂಹಗಳ ದೃಶ್ಯವನ್ನು ನೋಡಬಹುದಾಗಿದೆ. ಎಷ್ಟರಮಟ್ಟಿಗೆ ಎಂದರೆ ಅಸ್ಥಿಪಂಜರ ಕಾಣುವ ಮಟ್ಟಿಗೆ ಸಿಂಹಗಳು ಬಡಕಲಾಗಿವೆ. ಅಲ್ಲದೆ, ಅನೇಕ ಸಂಘ ಸಂಸ್ಥೆಗಳನ್ನು ನೆರವು ನೀಡುವಂತೆ ಫೇಸ್ಬುಕ್ನಲ್ಲಿ ಮನವಿ ಮಾಡಿಕೊಳ್ಳಲಾಗಿದೆ.
ಸಾಮಾಜಿಕ ಜಾಲತಾಣದಲ್ಲಿ ಸಿಂಹಗಳ ಫೋಟೋ ವೈರಲ್ ಆಗಿದ್ದು, ಅನೇಕ ಸ್ವಯಂಸೇವಕರು ಉದ್ಯಾನವನಕ್ಕೆ ಭೇಟಿ ನೀಡುತ್ತಿದ್ದಾರೆ. ಅದರಲ್ಲೂ ಅನೇಕರು ತಾಜಾ ಮಾಂಸ, ಔಷಧಗಳು ಹಾಗೂ ರೋಗ ನಿರೋಧಕಗಳನ್ನು ತರುತ್ತಿದ್ದಾರೆ. ಹಲವು ದಿನಗಳವರೆಗೆ ಭಾರಿ ಸಂಕಷ್ಟವನ್ನು ಅನುಭವಿಸಿದ್ದ ಸಿಂಹಗಳು ಇದೀಗ ಸಹಜ ಸ್ಥಿತಿಯತ್ತ ಮರಳುತ್ತಿದ್ದಾವೆ ಎಂದು ಉದ್ಯಾವನ ಅಧಿಕಾರಿಗಳು ಮತ್ತು ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ.
ಅಪೌಷ್ಠಿಕತೆಯಿಂದ ನರಳುತ್ತಿರುವ ಆಫ್ರಿಕನ್ ಸಿಂಹಗಳ ಫೋಟೋ ಸೆರೆಹಿಡಿದು ಫೇಸ್ಬುಕ್ನಲ್ಲಿ ಶೇರ್ ಮಾಡಿಕೊಂಡ ಸಲಿಹ್ ಅವರ ಕಾಳಜಿಗೆ ಅಭಿನಂದನೆಗಳ ಮಹಾಪೂರ ಹರಿದುಬರುತ್ತಿದೆ. (ಏಜೆನ್ಸೀಸ್)