ಬ್ರಿಸ್ಬೇನ್: ಚಾಣಾಕ್ಷ ಗಿಳಿಯೊಂದು ಮನೆಯಲ್ಲಿ ಸಂಭವಿಸಿದ ಭೀಕರ ಅಗ್ನಿ ಅವಘಡದಿಂದ ತನ್ನ ಮಾಲೀಕನ ಪ್ರಾಣ ಉಳಿಸಿರುವ ಮನಮುಟ್ಟುವ ಘಟನೆ ದೂರದ ಆಸ್ಟ್ರೇಲಿಯಾದ ಬ್ರಿಸ್ಬೇನ್ನಲ್ಲಿ ನಡೆದಿದೆ.
ಆಂಟನ್ ನುಯೇನ್ ಬಚಾವ್ ಆದ ಮಾಲೀಕ. ಬ್ರಿಸ್ಬೇನ್ನ ಕಾಂಗರೋ ನಗರದ ಸ್ಯಾಲ್ಸ್ಟೋನ್ ಸ್ಟ್ರೀಟ್ನಲ್ಲಿರುವ ಮನೆಗೆ ಇದ್ದಕ್ಕಿಂದ್ದಂತೆ ಬೆಂಕಿ ಕಾಣಿಸಿಕೊಂಡಿತ್ತು. ತಕ್ಷಣ ಅದನ್ನು ಗಮಿಸಿದ ಗಿಳಿ ಬೆಂಕಿ ಕೆನ್ನಾಲಿಗೆ ಹರಡುತ್ತಿದ್ದಂತೆ ಪದೇಪದೆ ಮಾಲೀಕನ ಹೆಸರನ್ನು ಕೂಗಿ ಎಚ್ಚರಿಸಿದಾಗ ಆಂಟನ್ ಅವಘಡದಿಂದ ಬಚಾವ್ ಆಗಿದ್ದಾರೆ.
ನಾನು ಮಲಗಿದ್ದೆ. ನಿರಂತರವಾಗಿ ಎರಿಕ್ (ಗಿಳಿಯ ಹೆಸರು) ಕೂಗುವುದನ್ನು ಕೇಳಿ ಎಚ್ಚರವಾಯಿತು. ಬಳಿಕ ಹೊಗೆಯ ವಾಸನೆ ಮೂಗಿಗೆ ಬಡಿಯಿತು. ತಕ್ಷಣ ಎರಿಕ್ ಬಾಚಿಕೊಂಡು ಬಾಗಿಲು ತೆರೆದೆ. ಮನೆಯ ಹಿಂಭಾಗದಲ್ಲಿ ಬೆಂಕಿಯ ಜ್ವಾಲೆಯನ್ನು ನೋಡಿದೆ. ತಕ್ಷಣ ನನ್ನ ಬ್ಯಾಗ್ ಎತ್ತಿಕೊಂಡ ಅಲ್ಲಿಂದ ಹೊರಗಡೆ ಬಂದೆ ಎಂದು ಆಂಟನ್ ಹೇಳಿದ್ದಾರೆ.
ಇದಾದ ಬಳಿಕ ಆಂಟನ್ ಅಗ್ನಿಶಾಮಕ ಸಿಬ್ಬಂದಿಗೆ ಕರೆ ಮಾಡಿದ್ದಾರೆ. ಸ್ಥಳಕ್ಕೆ ಧಾವಿಸಿದ ಸಿಬ್ಬಂದಿ ಬೆಂಕಿಯನ್ನು ನಂದಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಅಲ್ಲದೆ, ಗಿಳಿಯ ಸಾಹಗಾಥೆ ಕೇಳಿ ಅಚ್ಚರಿಗೊಂಡರು. ಅಗ್ನಿಶಾಮಕ ಅಧಿಕಾರಿ ಕ್ಯಾಮ್ ಥಾಮಸ್ ಮೆಚ್ಚುಗೆ ಸಹ ವ್ಯಕ್ತಪಡಿಸಿದ್ದಾರೆ. (ಏಜೆನ್ಸೀಸ್)