ಜೈಪುರ: ರಾಜಸ್ಥಾನದ ಕರೌಲಿ ಜಿಲ್ಲೆಯ ಹಿಂಡೌನ್ ನಗರದಲ್ಲಿ ಜೈನ ಸ್ವಾಮೀಜಿಯೊಬ್ಬರು ಗರ್ಭಿಣಿ ಮೇಲೆ ಅತ್ಯಾಚಾರ ಎಸಗಿದ ಆರೋಪದಲ್ಲಿ ಬಂಧಿತರಾಗಿದ್ದಾರೆ. ಇವರು ತಂಗಿದ್ದ ಕೋಣೆಯಲ್ಲಿ ಪತ್ತೆಯಾದ ಬ್ಯಾಗ್ಗಳನ್ನು ವಶಪಡಿಸಿಕೊಂಡಿದ್ದ ಪೊಲೀಸರು ಶನಿವಾರ ಅದನ್ನು ತೆರೆದು ನೋಡಿದಾಗ ಅದರಲ್ಲಿ ಕಾಂಡೋಮ್ ಪ್ಯಾಕೆಟ್ಗಳು ಮತ್ತು ನೀಲಿಚಿತ್ರಗಳಿದ್ದ 33 ಪೆನ್ಡ್ರೈವ್ಗಳು, ಎರಡು ಲ್ಯಾಪ್ಟಾಪ್ಗಳು, 19 ಮೊಬೈಲ್ ಫೋನ್ಗಳು ಮತ್ತು 4 ಹಾರ್ಡ್ಡಿಸ್ಕ್ಗಳು ಪತ್ತೆಯಾಗಿವೆ.
ಜೋಧಪುರದ ಮೂಲದ ಜೈನ ಸ್ವಾಮೀಜಿ ಆಚಾರ್ಯ ಸುಕುಮಲ್ ನಂದಿ (38) ಬಂಧಿತರು. ಇವರು ಹಿಂಡೌನ್ ಪಟ್ಟಣದ ಮೋಹನ್ನಗರ ಬಡಾವಣೆಯಲ್ಲಿ ಜೈನ ಬಸದಿಯಲ್ಲಿ ನೆಲೆಸಿದ್ದರು.
ಗುರುವಾರದಂದು ಗರ್ಭಿಣಿ ತನ್ನ ನಾದಿನಿ ಹಾಗೂ ಪತಿಯೊಂದಿಗೆ ಆಚಾರ್ಯ ನಂದಿ ಅವರ ದರ್ಶನಕ್ಕೆ ಬಂದಿದ್ದಳು. ಈ ಸಂದರ್ಭದಲ್ಲಿ ಆಕೆಯ ನಾದಿನಿ ಒಬ್ಬಳೆ ಸಿಕ್ಕಾಗ ಸ್ವಾಮೀಜಿ ಅತ್ಯಾಚಾರ ಎಸಗಲು ಯತ್ನಿಸಿದ್ದರು. ಆದರೆ, ಆಕೆ ಅವರ ಹಿಡಿತದಿಂದ ತಪ್ಪಿಸಿಕೊಂಡಿದ್ದಳು ಎನ್ನಲಾಗಿದೆ. ಇದಾದ ಬಳಿಕ ಗರ್ಭಿಣಿಯನ್ನು ಏಕಾಂತದಲ್ಲಿ ಭೇಟಿಯಾಗುವಂತೆ ಸ್ವಾಮೀಜಿ ಸೂಚಿಸಿದ್ದರು ಎನ್ನಲಾಗಿದೆ.
ಆಕೆ ಸ್ವಾಮೀಜಿಯ ಕೋಣೆಗೆ ಹೋದಾಗ, ಸ್ವಾಮೀಜಿ ಆಕೆಯ ಮೇಲೆ ಅತ್ಯಾಚಾರ ಎಸಗಿದ್ದರು. ಅಲ್ಲದೆ, ಈ ವಿಷಯವನ್ನು ಹೊರಗೆ ಬಾಯ್ಬಿಟ್ಟರೆ ತಮ್ಮ ಪ್ರಭಾವವನ್ನು ಬಳಸಿಕೊಂಡು ಇಡೀ ಕುಟುಂಬವನ್ನೇ ಸರ್ವನಾಶ ಮಾಡುವುದಾಗಿ ಬೆದರಿಸಿದ್ದರು.
ಇಷ್ಟಾದರೂ ಆಕೆ ಮನೆಗೆ ಮರಳಿದ ಬಳಿಕ ನಡೆದ ಘಟನೆಯನ್ನು ಮನೆಯವರಿಗೆ ತಿಳಿಸಿದ್ದರು. ಇದರಿಂದ ಸಿಟ್ಟಿಗೆದ್ದ ಅವರೆಲ್ಲರೂ ಈ ಬಗ್ಗೆ ಪ್ರಶ್ನಿಸಲು ಜೈನ ಬಸದಿಗೆ ಬಂದಾಗ ಸ್ವಾಮೀಜಿ ತಮ್ಮ ಕೋಣೆಯಲ್ಲಿ ತಮ್ಮನ್ನೇ ಬಂಧಿಯಾಗಿಸಿಕೊಂಡಿದ್ದರು. ಕೊನೆಗೆ ಪೊಲೀಸರ ನೆರವು ಪಡೆದು ಬಾಗಿಲು ಒಡೆದು ಒಳಹೋಗಿ ಅವರನ್ನು ಬಂಧಿಸಲಾಗಿತ್ತು ಎಂದು ಭರತ್ಪುರ ರೇಂಜ್ನ ಡಿಐಜಿ ಲಕ್ಷ್ಮಣ್ ಗೌರ್ ತಿಳಿಸಿದ್ದಾರೆ.
ಸ್ವಾಮೀಜಿ ಇದ್ದ ಕೋಣೆಯ ತಪಾಸಣೆ ನಡೆಸಿದ್ದ ವಿಧಿವಿಜ್ಞಾನ ಪ್ರಯೋಗಾಲಯದ ಸಿಬ್ಬಂದಿ ಮತ್ತು ಪೊಲೀಸರ ತಂಡ, ಕೋಣೆಯಲ್ಲಿದ್ದ ದೊಡ್ಡ ಬ್ಯಾಗ್ ಅನ್ನು ವಶಪಡಿಸಿಕೊಂಡಿದ್ದರು. ಅದರಲ್ಲಿ ಕಾಂಡೋಮ್ ಪ್ಯಾಕೆಟ್ಗಳು, ಪೆನ್ಡ್ರೈವ್ಗಳು, ಹಾರ್ಡ್ಡಿಸ್ಕ್ ಮತ್ತು ಲ್ಯಾಪ್ಟಾಪ್ಗಳು ಪತ್ತೆಯಾಗಿದ್ದಾಗಿ ಹೇಳಿದ್ದಾರೆ.
ಪೆನ್ಡ್ರೈವ್ಗಳು ಮತ್ತು ಹಾರ್ಡ್ಡಿಸ್ಕ್ಗಳನ್ನು ಪರಿಶೀಲಿಸಿದಾಗ ಅದರಲ್ಲಿ ನೀಲಿಚಿತ್ರಗಳು ಇರುವುದು ಪತ್ತೆಯಾಯಿತು. ಇದೀಗ ಸ್ವಾಮೀಜಿಯನ್ನು 15 ದಿನಗಳ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿರುವುದಾಗಿ ತಿಳಿಸಿದ್ದಾರೆ.