ನವದೆಹಲಿ: ಪ್ರತಿಷ್ಠಿತ ಪ್ರಶಸ್ತಿ ಎನಿಸಿಕೊಂಡಿರುವ ಆಸ್ಕರ್ಗೆ 2023ರ ನಾಮಿನೇಷನ್ ಪಟ್ಟಿ ಬಿಡುಗಡೆ ಆಗಿದ್ದು, 'ಆರ್ಆರ್ಆರ್' ಆರ್ಭಟ ಇಲ್ಲೂ ಮುಂದುವರಿದಿದೆ. ಅಂದರೆ, 'ಆರ್ಆರ್ಆರ್' ಸಿನಿಮಾ ಕೂಡ ಸೇರಿದಂತೆ ಮೂರು ಭಾರತೀಯ ಸಿನಿಮಾಗಳು 2023ರ ಆಸ್ಕರ್ ನಾಮಿನೇಷನ್ ಪಟ್ಟಿಯಲ್ಲಿ ಸ್ಥಾನ ಪಡೆದುಕೊಂಡಿವೆ.
ಅಮೆರಿಕದ ಕ್ಯಾಲಿಫೋರ್ನಿಯಾ ಬೇವರ್ಲಿ ಹಿಲ್ಸ್ನ ಸ್ಯಾಮುಯೆಲ್ ಗೋಲ್ಡ್ವಿನ್ ಚಿತ್ರಮಂದಿರದಲ್ಲಿ ಇಂದು ಆಯೋಜಿಸಲಾಗಿದ್ದ ಸಮಾರಂಭದಲ್ಲಿ ಈ ನಾಮಿನೇಷನ್ ಪಟ್ಟಿ ಬಿಡುಗಡೆ ಮಾಡಲಾಗಿದೆ. ಇದರಲ್ಲಿ ಭಾರತೀಯ ಸಿನಿಮಾಗಳಾದ 'ಆರ್ಆರ್ಆರ್', 'ಆಲ್ ದ್ಯಾಟ್ ಬ್ರೀಥ್ಸ್' ಮತ್ತು 'ದ ಎಲಿಫೆಂಟ್ ವಿಷ್ಪರ್ಸ್' ಸ್ಥಾನ ಪಡೆದಿದ್ದು, ಭಾರತಕ್ಕೆ ಆಸ್ಕರ್ ಪ್ರಶಸ್ತಿಯ ನಿರೀಕ್ಷೆ ಹುಟ್ಟಿಸಿವೆ.
'ಆರ್ಆರ್ಆರ್'ನ 'ನಾಟು ನಾಟು' ಗೀತೆಗೆ ಈ ಸಲದ ಗೋಲ್ಡನ್ ಗ್ಲೋಬ್ ಪ್ರಶಸ್ತಿ ಸಿಕ್ಕಿದ ಬೆನ್ನಿಗೇ ಅದು ಬೆಸ್ಟ್ ಒರಿಜಿನಲ್ ಸಾಂಗ್ ಕೆಟಗರಿಯಲ್ಲಿ ಆಸ್ಕರ್ಗೆ ನಾಮಿನೇಟ್ ಆಗಿದೆ. ಹಾಗೆಯೇ ಬೆಸ್ಟ್ ಡಾಕ್ಯುಮೆಂಟರಿ ಫೀಚರ್ ಫಿಲ್ಮ್ ಕೆಟಗರಿಯಲ್ಲಿ 'ಆಲ್ ದ್ಯಾಟ್ ಬ್ರೀಥ್ಸ್' ಮತ್ತು ಬೆಸ್ಟ್ ಡಾಕ್ಯುಮೆಂಟರಿ ಶಾರ್ಟ್ ಫಿಲ್ಮ್ ವಿಭಾಗದಲ್ಲಿ 'ದ ಎಲಿಫೆಂಟ್ ವಿಷ್ಪರ್ಸ್' ನಾಮಿನೇಟ್ ಆಗಿದೆ. ಆಸ್ಕರ್ಗೆ ನಾಮಿನೇಟ್ ಆಗಬಹುದಾದ ಅಂತಿಮ 300 ಸಿನಿಮಾಗಳ ಪಟ್ಟಿಯಲ್ಲಿದ್ದ 'ಕಾಂತಾರ', 'ವಿಕ್ರಾಂತ್ ರೋಣ' ನಾಮಿನೇಷನ್ಗೆ ತಲುಪದ್ದರಿಂದ ಕನ್ನಡದ ಯಾವ ಚಿತ್ರವೂ ನಾಮಿನೇಷನ್ನಲ್ಲಿ ಇಲ್ಲದಂತಾಗಿದೆ.