| ವಿಜಯವಾಣಿ ವಿಶೇಷ ಗುಂಡ್ಲುಪೇಟೆ
ಊಟಿ ಜಿಲ್ಲಾಡಳಿತ ನಿಗದಿಪಡಿಸಿರುವ ಇ-ಪಾಸ್ ಇಲ್ಲದ ಪ್ರವಾಸಿಗರನ್ನು ಮಧುಮಲೈ ಅರಣ್ಯ ಪ್ರವೇಶದ್ವಾರದಲ್ಲಿ ತಡೆಯಲಾಗುತ್ತಿದ್ದು, ಪಾಸ್ ಪಡೆಯಲು ಪ್ರವಾಸಿಗರು ಪರದಾಡುತ್ತಿದ್ದಾರೆ.
ಸಾಲು ಸಾಲು ರಜೆ, ಶನಿವಾರ, ಭಾನುವಾರ ಮತ್ತು ವರ್ಷದ ಕೊನೇ ಹಿನ್ನೆಲೆಯಲ್ಲಿ ಊಟಿಗೆ ಹೆಚ್ಚಿನ ಪ್ರವಾಸಿಗರು ಹೊರಟಿದ್ದಾರೆ. ಪಾಸ್ ಇಲ್ಲದವರನ್ನು ತಮಿಳುನಾಡಿನ ಒಳಗೆ ಬಿಟ್ಟುಕೊಳ್ಳದ ಪರಿಣಾಮ ತೊಂದರೆ ಎದುರಿಸುತ್ತಿದ್ದಾರೆ.
ಕರೊನಾ ನಿಯಂತ್ರಣಕ್ಕೆ ಊಟಿ ಜಿಲ್ಲಾಡಳಿತ ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದೆ. ಬಂಡೀಪುರ ರಾಷ್ಟ್ರೀಯ ಉದ್ಯಾನವನದ ಮೂಲಕ ಹಾದು ಹೋಗುವ ಪ್ರವಾಸಿಗರನ್ನು ಕೆಕ್ಕನಹಳ್ಳ ಸಮೀಪ ತಪಾಸಣೆ ಮಾಡಲಾಗುತ್ತಿದೆ. ಈ ಬಗ್ಗೆ ಪೂರ್ಣ ಮಾಹಿತಿ ಇರುವವರು ಪ್ರವಾಸಕ್ಕೆ ಹೊರಡುವ ಮೊದಲೇ ಪಾಸ್ ಪಡೆದುಕೊಳ್ಳುತ್ತಿದ್ದಾರೆ. ಕೋವಿಡ್ ಪರೀಕ್ಷೆ ವರದಿ ಹಾಗೂ ಇ-ಪಾಸ್ ಇರುವ ಪ್ರವಾಸಿಗರನ್ನು ಮಾತ್ರ ಬಿಟ್ಟುಕೊಳ್ಳುತ್ತಿದ್ದು ಉಳಿದವರಿಗೆ ಪ್ರವೇಶ ನಿರಾಕರಿಸಲಾಗುತ್ತಿದೆ.
ನೆರೆಯ ಹಂಗಳ ಹಾಗೂ ಪಟ್ಟಣದ ಕೆಲವು ಕಂಪ್ಯೂಟರ್ ಸೆಂಟರ್ನಲ್ಲಿ ಇ-ಪಾಸ್ ಮಾಡಿಕೊಡಲಾಗುತ್ತಿದೆ. ತಮ್ಮ ಮುಂದಿನ ಪ್ರಯಾಣಕ್ಕೆ ಪಾಸ್ ಪಡೆದುಕೊಳ್ಳುವ ಸಲುವಾಗಿ ಪ್ರವಾಸಿಗರು ಮುಗಿಬೀಳುತ್ತಿರುವುದರಿಂದ ಚೆಕ್ಪೋಸ್ಟ್ ಹಾಗೂ ಕಂಪ್ಯೂಟರ್ ಸೆಂಟರ್ಗಳ ಎದುರು ಪ್ರವಾಸಿಗರ ವಾಹನಗಳು ಸಾಲುಗಟ್ಟಿ ನಿಲ್ಲುತ್ತಿವೆ. ಇದರಿಂದ ಸರಕು ಸಾಗಣೆ ವಾಹನಗಳ ಸಂಚಾರಕ್ಕೆ ಅಡಚಣೆ ಉಂಟಾಗುತ್ತಿದೆ.
ಹಗಲು ದರೋಡೆ: ಇ-ಪಾಸ್ ಪಡೆಯಲು ಆಧಾರ್, ಮೊಬೈಲ್ ಸಂಖ್ಯೆ ಹಾಗೂ ಅಗತ್ಯ ಮಾಹಿತಿಯನ್ನು ಅಪ್ಲೋಡ್ ಮಾಡಿ ಅದರ ಪ್ರಿಂಟ್ಔಟ್ ತೆಗೆದುಕೊಡಲು 250-300 ರೂ. ವಸೂಲಿ ಮಾಡುವ ಕಂಪ್ಯೂಟರ್ ಸೆಂಟರ್ನವರು ಹಗಲು ದರೋಡೆ ಮಾಡುತ್ತಿದ್ದಾರೆ. ಆದರೂ ಅನಿವಾರ್ಯವಾಗಿ ಕೇಳಿದಷ್ಟು ಹಣ ಕೊಡಲೇಬೇಕಾಗಿದೆ ಎಂದು ಪ್ರವಾಸಿಗರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಇ-ಪಾಸ್ ಇಲ್ಲದವರಿಗೆ ತಮಿಳುನಾಡು ಪ್ರವೇಶ ನಿರಾಕರಿಸುತ್ತಿರುವ ಹಿನ್ನೆಲೆಯಲ್ಲಿ ಮೇಲುಕಾಮನಹಳ್ಳಿ ಚೆಕ್ಪೋಸ್ಟ್ನಲ್ಲಿ ಪಾಸ್ ಇರುವವರನ್ನು ಮಾತ್ರ ಮುಂದೆ ಬಿಡಲಾಗುತ್ತಿದೆ. ಆನ್ಲೈನ್ ಮೂಲಕ ಇ-ಪಾಸ್ ಪಡೆದುಕೊಂಡ ನಂತರ ಪ್ರವಾಸ ಮುಂದುವರಿಸುವಂತೆ ಸೂಚನೆ ನೀಡಲಾಗುತ್ತಿದೆ.
| ಎನ್.ಪಿ.ನವೀನ್ಕುಮಾರ್
ಆರ್ಎಫ್ಒ, ಗೋಪಾಲಸ್ವಾಮಿ ಬೆಟ್ಟ ವಲಯ