ಬೆಂಗಳೂರು: ಆನ್ಲೈನ್ನಲ್ಲಿ ಬಟ್ಟೆ ಖರೀದಿಸಿದ್ದ ಯುವತಿಗೆ ಹಣ ವಾಪಸ್ ನೀಡುವ ಸೋಗಿನಲ್ಲಿ ದೂರವಾಣಿ ಕರೆ ಮಾಡಿ 44 ಸಾವಿರ ರೂಪಾಯಿಯನ್ನು ಸೈಬರ್ ಕಳ್ಳರು ದೋಚಿದ್ದಾರೆ.
ಹೆಣ್ಣೂರಿನ 28 ವರ್ಷದ ಯುವತಿ ವಂಚನೆಗೆ ಒಳಗಾದವರು. ಆ.2ರಂದು ಆನ್ಲೈನ್ ಶಾಪಿಂಗ್ ನಲ್ಲಿ ಯುವತಿ, ಹಣ ಪಾವತಿ ಮಾಡಿ ಲೆಹೆಂಗಾ ಖರೀದಿಸಿದ್ದರು. ಅದಾದ ಮಾರನೇ ದಿನ ಕರೆ ಮಾಡಿದ ವ್ಯಕ್ತಿಯೊಬ್ಬ, ‘ನೀವು ಬುಕ್ ಮಾಡಿದ ಬಟ್ಟೆ ಸದ್ಯಕ್ಕೆ ಇಲ್ಲದಿರುವುದರಿಂದ ನಿಮ್ಮ ಹಣ ವಾಪಸ್ ನೀಡುತ್ತೇವೆ. ನಿಮ್ಮ ಮೊಬೈಲ್ಗೆ ಬರುವ ಒಟಿಪಿ ಹೇಳಿ’ ಎಂದು ತಿಳಿಸಿದ್ದ.
ಒಟಿಪಿ ಹೇಳುತ್ತಿದಂತೆ ಯುವತಿ ಬ್ಯಾಂಕ್ ಖಾತೆಯಿಂದ 44 ಸಾವಿರ ರೂ. ಬೇರೊಂದು ಖಾತೆಗೆ ವರ್ಗಾವಣೆ ಮಾಡಿಕೊಂಡು ಕರೆ ಕಟ್ ಮಾಡಿದ್ದಾರೆ. ಪ್ರಶ್ನೆ ಮಾಡಲು ವಾಪಸ್ ಕರೆ ಮಾಡಿದಾಗ ಸಂಪರ್ಕಕ್ಕೆ ಸಿಕ್ಕಿಲ್ಲ. ಕೊನೆಗೆ ಠಾಣೆಗೆ ದೂರು ನೀಡಿದ್ದಾರೆ. ಈ ಮೇರೆಗೆ ತನಿಖೆ ಕೈಗೊಂಡಿರುವುದಾಗಿ ಪೂರ್ವ ವಿಭಾಗ ಸಿಇಎನ್ ಪೊಲೀಸರು ತಿಳಿಸಿದ್ದಾರೆ.