ನವದೆಹಲಿ: ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ, ಭಾರತದಲ್ಲಿ ಇನ್ನುಮುಂದೆ N2 ಮತ್ತು N3 ವರ್ಗಗಳಿಗೆ ಸೇರಿದ ಟ್ರಕ್ಗಳಲ್ಲಿ ಹವಾನಿಯಂತ್ರಿತ ಕ್ಯಾಬಿನ್ ಇರುವುದನ್ನು ಕಡ್ಡಾಯ ಮಾಡುವ ಕುರಿತಾಗಿ ಇದ್ದ ಕರಡು ಅಧಿಸೂಚನೆಯನ್ನು ಅನುಮೋದಿಸಿದ್ದಾರೆ ಎಂಬ ಸುದ್ದಿಯನ್ನು ಹಂಚಿಕೊಂಡಿದ್ದಾರೆ.
ಈ ಪ್ರಕಟಣೆಯನ್ನು ಹಲವಾರು ಸಾಮಾಜಿಕ ಮಾಧ್ಯಮ ಹ್ಯಾಂಡಲ್ಗಳಲ್ಲಿ ಸಚಿವರು ಹಂಚಿಕೊಂಡಿದ್ದಾರೆ. “N2 ಮತ್ತು N3 ವರ್ಗಗಳಿಗೆ ಸೇರಿದ ಟ್ರಕ್ಗಳ ಕ್ಯಾಬಿನ್ಗಳಲ್ಲಿ ಹವಾನಿಯಂತ್ರಣ ವ್ಯವಸ್ಥೆಗಳನ್ನು ಅಳವಡಿಸುವುದನ್ನು ಕಡ್ಡಾಯಗೊಳಿಸುವ ಕರಡು ಅಧಿಸೂಚನೆಯನ್ನು ಅನುಮೋದಿಸಲಾಗಿದೆ. ರಸ್ತೆ ಸುರಕ್ಷತೆಯನ್ನು ಖಾತ್ರಿಪಡಿಸುವಲ್ಲಿ ಟ್ರಕ್ ಚಾಲಕರು ನಿರ್ಣಾಯಕ ಪಾತ್ರವನ್ನು ವಹಿಸುತ್ತಾರೆ"ಎಂದು ಅವರು ಹೇಳಿದ್ದಾರೆ.
ಜೂನ್ನಲ್ಲಿ ಕೇಂದ್ರ ಸಚಿವ ಗಡ್ಕರಿ, ಟ್ರಕ್ ಡ್ರೈವರ್ಗಳ ಜೀವನವನ್ನು ಸುಲಭಗೊಳಿಸಲು ಮತ್ತು ಸುರಕ್ಷತೆಯನ್ನು ಉತ್ತೇಜಿಸುವ ಪ್ರಯತ್ನದಲ್ಲಿ 2025ರಿಂದ ಭಾರತೀಯ ಟ್ರಕ್ಗಳು ಗುಣಮಟ್ಟದ ಎಸಿ ಫಿಟ್ಮೆಂಟ್ ಅನ್ನು ಪಡೆಯುತ್ತವೆ ಎಂದು ಘೋಷಿಸಿದ್ದರು.
ಇತ್ತೀಚಿನ ಪ್ರಕಟಣೆಯ ಪ್ರಕಾರ ಭಾರತದಲ್ಲಿ ಮಾರಾಟವಾಗುವ ಟ್ರಕ್ಗಳ ಬೆಲೆಯ ಮೇಲೆ AC ಸಣ್ಣ ಪರಿಣಾಮ ಬೀರಬಹುದು ಎಂದು ಉದ್ಯಮ ತಜ್ಞರು ಹೇಳಿದ್ದಾರೆ. ಹೊಸ ಟ್ರಕ್ಗಳ ಬೆಲೆ 10,000 do 25,000 ರೂ. ವರೆಗೆ ಹೆಚ್ಚಾಗಬಹುದು ಎನ್ನಲಾಗಿದೆ
N2 ಮತ್ತು N3 ಟ್ರಕ್ ವಿಭಾಗಗಳು ಭಾರತದಲ್ಲಿ ವಾಣಿಜ್ಯ ವಾಹನಗಳನ್ನು ಅವುಗಳ ಒಟ್ಟು ವಾಹನ ತೂಕದ (GVW) ರೇಟಿಂಗ್ಗಳ ಆಧಾರದ ಮೇಲೆ ವರ್ಗೀಕರಿಸಲು ಬಳಸಲಾಗುವ ಟ್ರಕ್ ವರ್ಗಗಳಾಗಿವೆ. ಈ ವರ್ಗಗಳು ದೇಶದಲ್ಲಿ ಕಾರ್ಯನಿರ್ವಹಿಸುವ ವಿವಿಧ ರೀತಿಯ ಟ್ರಕ್ಗಳಿಗೆ ತೂಕದ ನಿರ್ಬಂಧಗಳು, ಪರವಾನಗಿ ಅಗತ್ಯತೆಗಳು ಮತ್ತು ನಿಬಂಧನೆಗಳನ್ನು ಸ್ಥಾಪಿಸಲು ಸಹಾಯ ಮಾಡುತ್ತದೆ.
N2 ವರ್ಗವು 3,500 ಕಿಲೋಗ್ರಾಂಗಳಿಂದ 12,000 ಕಿಲೋಗ್ರಾಂಗಳವರೆಗಿನ ಒಟ್ಟು ವಾಹನ ತೂಕದ (GVW) ರೇಟಿಂಗ್ ಇರುವ ಟ್ರಕ್ಗಳನ್ನು ಒಳಗೊಂಡಿದೆ. ಈ ವರ್ಗವು ಸಾಮಾನ್ಯವಾಗಿ ಲಘು ವಾಣಿಜ್ಯ ವಾಹನಗಳಾಗಿದ್ದು ಸರಕುಗಳ ಸಾಗಣೆಗೆ ಬಳಸುವ ಸಣ್ಣ ಟ್ರಕ್ಗಳನ್ನು ಒಳಗೊಂಡಿರುತ್ತದೆ. N2 ಟ್ರಕ್ಗಳು ಗಾತ್ರದಲ್ಲಿ ತುಲನಾತ್ಮಕವಾಗಿ ಚಿಕ್ಕದಾಗಿದ್ದು ಸಾಮಾನ್ಯವಾಗಿ ನಗರದೊಳಗಿನ ಅಥವಾ ಅಲ್ಪಾವಧಿಯ ಸಾಗಾಟದ ಉದ್ದೇಶಗಳಿಗಾಗಿ ಬಳಸಲಾಗುತ್ತದೆ.
N3 ವರ್ಗವು 12,000 ಕಿಲೋಗ್ರಾಂಗಳಿಗಿಂತ ಹೆಚ್ಚಿನ ಒಟ್ಟು ವಾಹನ ತೂಕದ (GVW) ರೇಟಿಂಗ್ ಹೊಂದಿರುವ ಟ್ರಕ್ಗಳನ್ನು ಒಳಗೊಂಡಿದೆ. ಈ ಟ್ರಕ್ಗಳನ್ನು ದೀರ್ಘ-ಪ್ರಯಾಣದ ಸಾರಿಗೆಗಾಗಿ ಮತ್ತು ಹೆಚ್ಚಿನ ಲೋಡ್ಗಳನ್ನು ಸಾಗಿಸಲು ವಿನ್ಯಾಸಗೊಳಿಸಲಾದ ಹೆವಿ-ಡ್ಯೂಟಿ ವಾಹನಗಳಾಗಿ ನಿರೂಪಿಸಲಾಗಿದೆ. N3 ವರ್ಗದಲ್ಲಿ, ಟ್ರಾಕ್ಟರ್-ಟಿಲ್ಲರ್ಗಳು, ಡಂಪ್ ಟ್ರಕ್ಗಳು ಮತ್ತು ಹೆವಿ-ಡ್ಯೂಟಿ ಕಾರ್ಯಾಚರಣೆಗಳಿಗೆ ಬಳಸುವ ಇತರ ದೃಢವಾದ ಟ್ರಕ್ಗಳನ್ನು ಒಳಗೊಂಡಿರುತ್ತವೆ. ಅದಲ್ಲದೇ ಮಧ್ಯಮ ಮತ್ತು ಭಾರೀ ವಾಣಿಜ್ಯ ವಾಹನಗಳನ್ನು (MCV ಗಳು ಮತ್ತು HCV ಗಳು) ಈ ವರ್ಗದಲ್ಲಿ ಕಾಣಬಹುದು. (ಏಜೆನ್ಸೀಸ್)