ಬೀಜಿಂಗ್: ಚೀನಾದಲ್ಲಿ ಕರೊನಾ ಸೋಂಕಿನ ಪ್ರಕರಣಗಳು ಏರಿಕೆಯಾಗಿ ಆತಂಕ ಹೆಚ್ಚಾಗುತ್ತಿರುವುದರ ನಡುವೆಯೇ ವೈರಸ್ನ ಹೊಸ ಉಪ-ಪ್ರಭೇದವೊಂದು ಪತ್ತೆಯಾಗಿದೆ. ಹೊಸ ಉಪ-ತಳಿಯು ಒಮಿಕ್ರಾನ್ನ ಬಿಎ.1.1 ಶಾಖೆಯಿಂದ ರೂಪುಗೊಂಡಿದೆ ಎಂದು ‘ಗ್ಲೋಬಲ್ ಟೈಮ್್ಸ’ ವರದಿ ಮಾಡಿದೆ. ದೇಶದಲ್ಲಿ ಒಂದೇ ದಿನ 13,000ಕ್ಕೂ ಅಧಿಕ ಹೊಸ ಪ್ರಕರಣಗಳು ದೃಢಪಟ್ಟಿವೆ.
ಹೊಸ ಉಪ-ತಳಿ ಒಬ್ಬ ಕರೊನಾ ರೋಗಿಯಲ್ಲಿ ಪತ್ತೆಯಾಗಿದೆ. ಶಾಂಘೈಯಿಂದ 70 ಕಿಲೋ ಮೀಟರ್ಗಿಂತ ಕಡಿಮೆ ದೂರದಲ್ಲಿರುವ ನಗರವೊಂದರ ಕೋವಿಡ್-19ರ ಲಘು ಲಕ್ಷಣದ ರೋಗಿಯಿಂದ ಹೊಸ ವೈರಸ್ಅನ್ನು ಪ್ರತ್ಯೇಕಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಆದರೆ ಚೀನಾದಲ್ಲಿ ಕರೊನಾಕ್ಕೆ ಕಾರಣವಾಗಿರುವ ಇತರ ವೈರಸ್ಗಳಿಗೆ ಅಥವಾ ಜಿಐಎಸ್ಎಐಡಿಗೆ ಸಲ್ಲಿಸಲಾಗಿರುವ ವೈರಸ್ಗಳಿಗೆ ಇದು ತಾಳೆಯಾಗುವುದಿಲ್ಲ. ಜಿಐಎಸ್ಎಐಡಿ ಒಂದು ಜಾಗತಿಕ ಜಾಲವಾಗಿದ್ದು ವಿಶ್ವದಾದ್ಯಂತದ ವಿಜ್ಞಾನಿಗಳು ತಾವು ಸೀಕ್ವೆನ್ಸ್ ಮಾಡಿದ ಕರೊನಾ ವೈರಸ್ಗಳ ಮಾಹಿತಿಗಳನ್ನು ವಿನಿಮಯ ಮಾಡಿಕೊಳ್ಳುತ್ತಾರೆ. ಉತ್ತರ ಚೀನಾದ ಡಾಲಿಯನ್ ನಗರದಲ್ಲಿ ಶುಕ್ರವಾರ ಕಂಡುಬಂದ ಒಂದು ಪ್ರಕರಣ ಕೂಡ ದೇಶೀಯವಾಗಿ ಪತ್ತೆಯಾದ ಯಾವುದೇ ಕರೊನಾ ವೈರಸ್ಗೆ ತಾಳೆಯಾಗುತ್ತಿಲ್ಲ.
ಸ್ವೀಡನ್ನಲ್ಲಿ ನಾಲ್ಕನೇ ಡೋಸ್ಗೆ ಸಲಹೆ: ಸ್ವೀಡನ್ನಲ್ಲಿ 65 ವರ್ಷ ಮೇಲ್ಪಟ್ಟ ಎಲ್ಲ ರಿಗೂ ಕರೊನಾ ಲಸಿಕೆಯ 4ನೇ ಡೋಸ್ ನೀಡಲು ಶಿಫಾರಸು ಮಾಡಲಾಗಿದೆ.
ಮಿಲಿಟರಿ ಆರೋಗ್ಯ ಸಿಬ್ಬಂದಿ ರವಾನೆ: ಸೋಂಕಿನ ಏರಿಕೆಯಿಂದ ಬಳಲುತ್ತಿರುವ ಶಾಂಘೈಗೆ 2,000 ಮಿಲಿಟರಿ ವೈದ್ಯಕೀಯ ಸಿಬ್ಬಂದಿ ಸಹಿತ ಒಟ್ಟು 10,000ಕ್ಕೂ ಹೆಚ್ಚು ಆರೋಗ್ಯ ಕಾರ್ಯಕರ್ತರನ್ನು ಚೀನಾ ಸರ್ಕಾರ ರವಾನಿಸಿದೆ.
ಉಪ ಪ್ರಧಾನಿ ಭೇಟಿ: ದೇಶದ ಕರೊನಾ ಹಾಟ್ಸ್ಪಾಟ್ ಶಾಂಘೈಗೆ ಉಪ ಪ್ರಧಾನಿ ಸನ್ ಚುನ್ಲಾನ್ ಭೇಟಿ ನೀಡಿದ್ದಾರೆ. ಆದಷ್ಟು ಬೇಗ ಸೋಂಕಿನ ಆಸ್ಪೋಟವನ್ನು ನಿಯಂತ್ರಿಸುವಂತೆ ಅವರು ಅಧಿಕಾರಿಗಳಿಗೆ ಸೂಚಿಸಿದರು. ದೇಶದ ಆರ್ಥಿಕ ರಾಜಧಾನಿಯಲ್ಲಿ ಶನಿವಾರ 8,000ಕ್ಕೂ ಅಧಿಕ ಕೇಸ್ಗಳು ವರದಿಯಾಗಿದ್ದವು. ಸೋಂಕು ಹರಡುವುದನ್ನು ತಡೆಯುವ ಕ್ರಮದ ಅಂಗವಾಗಿ ಶಾಂಘೈಯಲ್ಲಿ ಸಾಮೂಹಿಕ ಪರೀಕ್ಷೆಯ ಹೊಸ ಸುತ್ತನ್ನು ಸೋಮವಾರ ಆರಂಭಿಸಲಾಗಿದೆ.
ಒಮಿಕ್ರಾನ್ ಮಕ್ಕಳಿಗೆ ಮಾರಕವಲ್ಲ: ಐದು ವರ್ಷಕ್ಕಿಂತ ಕೆಳಗಿನ ಮಕ್ಕಳಿಗೆ ಒಮಿಕ್ರಾನ್ ಪ್ರಭೇದವು ಡೆಲ್ಟಾ ಪ್ರಭೇದಕ್ಕಿಂತ ಕಡಿಮೆ ಅಪಾಯಕಾರಿ ಎಂದು ಹೊಸ ಅಧ್ಯಯನವೊಂದು ಹೇಳಿದೆ. ‘ಜೆಎಎಂಎ ಪೀಡಿಯಾಟ್ರಿಕ್ಸ್’ ಪತ್ರಿಕೆಯಲ್ಲಿ ಈ ಸಂಶೋಧನಾ ವರದಿ ಪ್ರಕಟವಾಗಿದೆ.
ಭಾರತದಲ್ಲಿ ಮೂರಂಕಿಗಿಳಿದ ಕೇಸ್: ಭಾರತದಲ್ಲಿ ಕರೊನಾ ಸಾಂಕ್ರಾಮಿಕತೆ ಬಹುತೇಕವಾಗಿ ಕ್ಷೀಣಿಸಿದ್ದು ಸೋಮವಾರ ಬೆಳಿಗ್ಗೆ ವರೆಗಿನ 24 ಗಂಟೆ ಅವಧಿಯಲ್ಲಿ ಒಂದು ಸಾವಿರಕ್ಕಿಂತ ಕಡಿಮೆ ಹೊಸ ಪ್ರಕರಣಗಳು ವರದಿಯಾಗಿವೆ. 715 ದಿನಗಳಲ್ಲಿ ಇದು ಅತ್ಯಂತ ಕಡಿಮೆ ದೈನಿಕ ಪ್ರಕರಣವಾಗಿದೆ. 2020 ಏಪ್ರಿಲ್ 18ರಂದು ದೇಶದಲ್ಲಿ 991 ಕೇಸ್ಗಳು ದೃಢಪಟ್ಟಿದ್ದವು. ದೇಶದಲ್ಲಿ ಸೋಂಕಿತರ ಒಟ್ಟು ಸಂಖ್ಯೆ 4,30,29,044 ಆಗಿದೆ. ಒಟ್ಟು ಬಲಿಯಾದವರ ಒಟ್ಟು ಸಂಖ್ಯೆ 5,21,358 ಆಗಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿದೆ. ಸಕ್ರಿಯ ಪ್ರಕರಣಗಳು 714 ದಿನಗಳಲ್ಲಿ ಅತಿ ಕಡಿಮೆ ಎನ್ನಿಸಿದ 13,000ಕ್ಕಿಂತ ಕಡಿಮೆಗೆ ಕುಸಿದಿದೆ. ಸಕ್ರಿಯ ಪ್ರಕರಣದ ಪ್ರಮಾಣ ಶೇಕಡ 0.03 ಹಾಗೂ ಚೇತರಿಕೆ ದರ ಶೇಕಡ 98.76 ಆಗಿದೆ.