Commonwealth Games: ಜಾವೆಲಿನ್​ ಥ್ರೋ ಫೈನಲ್​ಗೇರಿದ ನೀರಜ್​, ರೋಹಿತ್​, ಯಶ್​ವೀರ್​

ಗುರುವಾರ ನಡೆದ ಅರ್ಹತಾ ಸುತ್ತಿನಲ್ಲಿ ತೀವ್ರ ಚಳಿಯ ವಾತಾವರಣದಲ್ಲಿ ನೀರಜ್​ ಚೋಪ್ರಾ ನಿರೀಕ್ಷಿತ ನಿರ್ವಹಣೆ ತೋರದಿದ್ದರೂ, ಗರಿಷ್ಠ 79.61 ಮೀ. ಎಸೆತದೊಂದಿಗೆ 5ನೇ ಸ್ಥಾನಿಯಾಗಿ ಫೈನಲ್​ಗೇರಿದರು. ರೋಹಿತ್​ ಯಾದವ್​ ಗರಿಷ್ಠ 78.37 ಮೀ. ಮತ್ತು ಯಶ್​ವೀರ್​ ಸಿಂಗ್​ ಗರಿಷ್ಠ 78.36 ಮೀ. ಎಸೆತದೊಂದಿಗೆ ಕ್ರಮವಾಗಿ 9 ಮತ್ತು 10ನೇ ಸ್ಥಾನಿಯಾಗಿ ಅಗ್ರ 12 ಸ್ಪರ್ಧಿಗಳ ಫೈನಲ್​ಗೆ ಪ್ರವೇಶಿಸಿದರು.

2018ರ ಚಾಂಪಿಯನ್​ ನೀರಜ್​ ಎ ಗ್ರೂಪ್​ನಲ್ಲಿ ಪ್ರತಿ ಸುತ್ತಿನಲ್ಲೂ ಕೊನೆಯದಾಗಿ ಎಸೆದರು. ಮೊದಲ ಯತ್ನದಲ್ಲಿ 76.28 ಮೀ. ಎಸೆದ ಅವರು, 2ನೇ ಯತ್ನದಲ್ಲಿ 79.61 ಮೀ. ಎಸೆದರು. ಫೈನಲ್​ ಅರ್ಹತೆ ಖಚಿತವಾಗಿದ್ದರಿಂದ ಅವರು ಕೊನೇ ಎಸೆತವನ್ನು ಎಸೆಯಲಿಲ್ಲ. ಮಳೆಯಿಂದಾಗಿ ತಾಪಮಾನ 18 ಡಿಗ್ರಿ ಸೆಲ್ಸಿಯಸ್​ಗೆ ತಗ್ಗಿದ್ದರಿಂದ ಎಲ್ಲ ಎಸೆತಗಾರರು, ಫೈನಲ್​ಗೆ ನೇರಪ್ರವೇಶದ ಮಾನದಂಡವಾಗಿದ್ದ 84 ಮೀ. ತಲುಪಲು ಶಕ್ತರಾಗಲಿಲ್ಲ. ನಾಲ್ವರಷ್ಟೇ 80 ಮೀ. ಗಡಿ ದಾಟಿದರು.

ಶ್ರೀಲಂಕಾದ ರುಮೇಶ್​ ತರಂಗ ಪಥಿರಗೆ ಸರ್ವಾಧಿಕ 82.84 ಮೀ. ಎಸೆತದೊಂದಿಗೆ ಅಗ್ರಸ್ಥಾನಿಯಾಗಿ ಫೈನಲ್​ಗೇರಿದರೆ, ಗ್ರೆನೇಡಾದ ಆಂಡರ್​ಸನ್​ ಪೀಟರ್ಸ್​ (81.29 ಮೀ.) 2ನೇ ಸ್ಥಾನಿಯಾದರು. ದಕ್ಷಿಣ ಆಫ್ರಿಕಾದ ಡೌ ಸ್ಮಿತ್​ (80.64 ಮೀ.) ಮತ್ತು ಇಂಗ್ಲೆಂಡ್​ನ ಬೆನ್​ ಈಸ್ಟ್​ (80.38 ಮೀ) 80 ಮೀ. ಗಡಿ ದಾಟಿದ ಇನ್ನಿಬ್ಬರು ಸ್ಪರ್ಧಿಗಳು. ಒಲಿಂಪಿಕ್ಸ್​ ಹಾಗೂ ಕಾಮನ್ವೆಲ್ತ್​ ಗೇಮ್ಸ್​ ಹಾಲಿ ಚಾಂಪಿಯನ್​ ಪಾಕಿಸ್ತಾನದ ಅರ್ಷದ್​ ನದೀಂ ಗರಿಷ್ಠ 78.63 ಮೀ. ಎಸೆತದೊಂದಿಗೆ 7ನೇ ಸ್ಥಾನಿಯಾಗಿ ಫೈನಲ್​ಗೇರಿದರು. 2ನೇ ಎಸೆತದಲ್ಲಿ ಫೌಲ್​ ಮಾಡಿದ ಅವರು, 3ನೇ ಎಸೆತದಲ್ಲಿ 75.65 ಮೀ. ಎಸೆಯಲಷ್ಟೇ ಶಕ್ತರಾದರು. ಶುಕ್ರವಾರ ರಾತ್ರಿ ಫೈನಲ್​ ನಡೆಯಲಿದೆ.