ಜಿರೋ ಟ್ಯಾಕ್ಸ್ ಮ್ಯಾಜಿಕ್: ಅಮೆರಿಕಕ್ಕೆ ಶೂನ್ಯ ಸುಂಕದಲ್ಲಿ ರಫ್ತಾಗಲಿವೆ ಭಾರತದ ಈ ಪ್ರಮುಖ ವಸ್ತುಗಳು
ನವದೆಹಲಿ: ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಭಾರತದ ಮೇಲಿದ್ದ ದಂಡನಾತ್ಮಕ ಸುಂಕಗಳನ್ನು(Zero Tax) ರದ್ದುಗೊಳಿಸಿದ ಬೆನ್ನಲ್ಲೇ, ಕೇಂದ್ರ ಸಚಿವ ಪಿಯೂಷ್ ಗೋಯಲ್ ಅವರು ಈ ಒಪ್ಪಂದದ ಲಾಭಗಳ ಬಗ್ಗೆ ಮಹತ್ವದ ಮಾಹಿತಿ ಹಂಚಿಕೊಂಡಿದ್ದಾರೆ. ಈ ಒಪ್ಪಂದವು ಭಾರತೀಯ ರಫ್ತುದಾರರಿಗೆ ಸುವರ್ಣ ಯುಗವನ್ನು ತರಲಿದೆ ಎಂದು ಬಣ್ಣಿಸಿದ್ದಾರೆ.
ಸಚಿವ ಪಿಯೂಷ್ ಗೋಯಲ್ ಹೇಳಿದ್ದೇನು..?
ಭಾರತೀಯ ಉತ್ಪನ್ನಗಳಿಗೆ ಅಮೆರಿಕದ ಬಾಗಿಲು ಮುಕ್ತ: ಅಮೆರಿಕವು ಭಾರತದ ಮೇಲಿದ್ದ ಶೇ. 25 ಹೆಚ್ಚುವರಿ ಸುಂಕವನ್ನು ತೆಗೆದುಹಾಕಿರುವುದರಿಂದ, ಭಾರತೀಯ ರಫ್ತುದಾರರಿಗೆ ಅಮೆರಿಕದ 30 ಟ್ರಿಲಿಯನ್ ಡಾಲರ್ ಮೌಲ್ಯದ ಬೃಹತ್ ಮಾರುಕಟ್ಟೆ ಈಗ ಸುಲಭವಾಗಿ ಲಭ್ಯವಾಗಲಿದೆ. ಇದು ಭಾರತದ ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳಿಗೆ ಲಾಟರಿ ಹೊಡೆದಂತೆ ಎಂದು ಹೇಳಿದ್ದಾರೆ.
ಕೃಷಿ ರಫ್ತು ಹೆಚ್ಚಳ: ಭಾರತದ ರೈತರು ಬೆಳೆದ ಉತ್ಪನ್ನಗಳಿಗೆ ಅಮೆರಿಕದಲ್ಲಿ ಹೆಚ್ಚಿನ ಬೇಡಿಕೆ ಬರಲಿದೆ. ಭಾರತವು ಅಮೆರಿಕದ ಕೆಲವು ಕೃಷಿ ಉತ್ಪನ್ನಗಳಿಗೆ ರಿಯಾಯಿತಿ ನೀಡಿದ್ದರೂ, ಬದಲಿಗೆ ಭಾರತೀಯ ಕೃಷಿ ಮತ್ತು ಕೈಗಾರಿಕಾ ವಲಯಕ್ಕೆ ಅದಕ್ಕಿಂತ ಹತ್ತು ಪಟ್ಟು ಹೆಚ್ಚಿನ ಲಾಭ ಸಿಗಲಿದೆ ಎಂದು ಗೋಯಲ್ ಸಮರ್ಥಿಸಿಕೊಂಡಿದ್ದಾರೆ.
ಉದ್ಯೋಗ ಸೃಷ್ಟಿ: ಈ ಒಪ್ಪಂದದಿಂದಾಗಿ ಭಾರತದಲ್ಲಿ ಉತ್ಪಾದನೆ ಹೆಚ್ಚಾಗಲಿದೆ, ಇದು ಲಕ್ಷಾಂತರ ಯುವಕರಿಗೆ ಮತ್ತು ವಿಶೇಷವಾಗಿ ಜವಳಿ ಕ್ಷೇತ್ರದಲ್ಲಿ ಕೆಲಸ ಮಾಡುವ ಮಹಿಳೆಯರಿಗೆ ಹೆಚ್ಚಿನ ಉದ್ಯೋಗಾವಕಾಶಗಳನ್ನು ನೀಡಲಿದೆ ಎಂದು ಪಿಯೂಷ್ ಗೋಯಲ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಯಾವೆಲ್ಲಾ ಉತ್ಪನ್ನಗಳಿಗೆ ಸುಂಕ ಮುಕ್ತಿ..?
ಸಚಿವ ಪಿಯೂಷ್ ಗೋಯಲ್ ಅವರ ಪ್ರಕಾರ, ಈ ಕೆಳಗಿನ ಪ್ರಮುಖ ವಲಯಗಳ ಉತ್ಪನ್ನಗಳು ಅಮೆರಿಕದಲ್ಲಿ ಸುಂಕ ರಹಿತ ಅಥವಾ ಅಲ್ಪ ಸುಂಕದ ಲಾಭ ಪಡೆಯಲಿವೆ.
ಕೃಷಿ ಮತ್ತು ಆಹಾರ ಉತ್ಪನ್ನಗಳು:
ಭಾರತದ ರೈತರು ಬೆಳೆದ ಈ ಕೆಳಗಿನ ವಸ್ತುಗಳಿಗೆ ಅಮೆರಿಕದಲ್ಲಿ ಯಾವುದೇ ಆಮದು ಸುಂಕ ಇರುವುದಿಲ್ಲ.
ಮಸಾಲೆ ಪದಾರ್ಥಗಳು: ವಿವಿಧ ರೀತಿಯ ಸಾಂಬಾರ ಪದಾರ್ಥಗಳು
ಹಣ್ಣುಗಳು: ಮಾವು, ಬಾಳೆಹಣ್ಣು, ಪೇರಲ, ಆವಕಾಡೊ, ಕಿವಿ, ಪಪ್ಪಾಯಿ ಮತ್ತು ಅನಾನಸ್.
ತರಕಾರಿಗಳು: ಅಣಬೆ, ತರಕಾರಿ ಬೇರುಗಳು.
ಧಾನ್ಯಗಳು: ಬಾರ್ಲಿ, ವಿವಿಧ ಧಾನ್ಯಗಳು ಮತ್ತು ಬೀಜಗಳು.
ಎಣ್ಣೆ ಪದಾರ್ಥಗಳು: ತೆಂಗಿನ ಎಣ್ಣೆ, ಕೊಬ್ರಿ, ತರಕಾರಿ ಮೇಣ.
ಇತರೆ: ಬೇಕರಿ ಉತ್ಪನ್ನಗಳು, ಕೋಕೋ ಉತ್ಪನ್ನಗಳು, ಸಿಟ್ರಸ್ ಜ್ಯೂಸ್ ಮತ್ತು ಗೋಡಂಬಿ.
2. ಕೈಗಾರಿಕಾ ಮತ್ತು ತಂತ್ರಜ್ಞಾನ ಉತ್ಪನ್ನಗಳು:
ಸ್ಮಾರ್ಟ್ಫೋನ್ಗಳು: ಭಾರತದಲ್ಲಿ ತಯಾರಾದ ಮೊಬೈಲ್ ಫೋನ್ಗಳಿಗೆ ಶೂನ್ಯ ಸುಂಕ ಮುಂದುವರಿಯಲಿದೆ.
ಔಷಧ ವಲಯ: ಭಾರತದ 'ಜೆನೆರಿಕ್' ಔಷಧಗಳು ಮತ್ತು ಔಷಧೀಯ ಪದಾರ್ಥಗಳಿಗೆ ಶೂನ್ಯ ಸುಂಕದ ಲಾಭ ಸಿಗಲಿದೆ.
ವಿಮಾನ ಬಿಡಿಭಾಗಗಳು: ಅಲ್ಯೂಮಿನಿಯಂ ಮತ್ತು ಸ್ಟೀಲ್ ಮೇಲಿದ್ದ ಹಳೆಯ ಸುಂಕಗಳನ್ನು ತೆಗೆದುಹಾಕಲಾಗಿದ್ದು, ವಿಮಾನದ ಬಿಡಿಭಾಗಗಳಿಗೆ ರಿಯಾಯಿತಿ ಸಿಗಲಿದೆ.
3. ಆಭರಣ ಮತ್ತು ಅಮೂಲ್ಯ ಲೋಹಗಳು
ವಜ್ರ ಮತ್ತು ರತ್ನಗಳು: ವಜ್ರೋದ್ಯಮಕ್ಕೆ ಶೂನ್ಯ ಸುಂಕದ ದೊಡ್ಡ ಕೊಡುಗೆ ಸಿಕ್ಕಿದೆ.
ಲೋಹಗಳು: ಪ್ಲಾಟಿನಂ ಮತ್ತು ಬೆಲೆಬಾಳುವ ನಾಣ್ಯಗಳು.
4. ಶೇ. 18ಕ್ಕೆ ಇಳಿಕೆಯಾದ ಇತರ ಪ್ರಮುಖ ಉತ್ಪನ್ನಗಳು
ಕೆಲವು ವಲಯಗಳಲ್ಲಿ ಈ ಹಿಂದೆ ಶೇ. 50ರಷ್ಟಿದ್ದ ಸುಂಕವನ್ನು ಈಗ ಶೇ. 18ಕ್ಕೆ ಇಳಿಸಲಾಗಿದೆ:
ಜವಳಿ: ಸಿದ್ಧ ಉಡುಪುಗಳು ಮತ್ತು ರೇಷ್ಮೆ ಉತ್ಪನ್ನಗಳು.
ಚರ್ಮೋದ್ಯಮ: ಪಾದರಕ್ಷೆಗಳು ಮತ್ತು ಚರ್ಮದ ಬ್ಯಾಗ್ಗಳು.
ಗೃಹೋಪಯೋಗಿ: ಪ್ಲಾಸ್ಟಿಕ್, ರಬ್ಬರ್ ಉತ್ಪನ್ನಗಳು, ಹ್ಯಾಂಡ್ ಲೂಮ್ ಮತ್ತು ಕರಕುಶಲ ವಸ್ತುಗಳು.
ರೈತರಿಗೆ ಮತ್ತು ಉದ್ಯಮಿಗಳಿಗೆ ಸಿಗುವ ಲಾಭ
ಈ ಒಪ್ಪಂದದಿಂದಾಗಿ ಭಾರತದ ಹತ್ತಿ ಬೆಳೆಗಾರರು, ನೇಕಾರರು ಮತ್ತು ಚರ್ಮೋದ್ಯಮದ ಕಾರ್ಮಿಕರಿಗೆ ಹೆಚ್ಚಿನ ಉದ್ಯೋಗಾವಕಾಶಗಳು ಸೃಷ್ಟಿಯಾಗಲಿವೆ. ರಷ್ಯಾದಿಂದ ತೈಲ ಖರೀದಿಯ ವಿಚಾರದಲ್ಲಿ ಅಮೆರಿಕದ ಜೊತೆ ಉಂಟಾಗಿದ್ದ ಬಿಕ್ಕಟ್ಟು ಈಗ ಸುಗಮವಾಗಿ ಬಗೆಹರಿದಿರುವುದು ಆರ್ಥಿಕತೆಗೆ ಪೂರಕವಾಗಿದೆ.
ಈ ಒಪ್ಪಂದವು ಕೇವಲ ವ್ಯಾಪಾರಕ್ಕೆ ಸೀಮಿತವಾಗಿಲ್ಲ, ಬದಲಿಗೆ ಇದು ಭಾರತ ಮತ್ತು ಅಮೆರಿಕ ನಡುವಿನ ರಕ್ಷಣಾ ಮತ್ತು ತಂತ್ರಜ್ಞಾನ ಸಹಕಾರದ ಹೊಸ ಅಧ್ಯಾಯಕ್ಕೆ ನಾಂದಿ ಹಾಡಿದೆ,(ಏಜೆನ್ಸೀಸ್).