ನವದೆಹಲಿ: ಟೀಮ್ ಇಂಡಿಯಾದ ಮಾಜಿ ಆಟಗಾರ ಯುವರಾಜ್ ಸಿಂಗ್ ( Yuvraj Singh) ತಾವು ಕ್ಯಾನ್ಸರ್ ವಿರುದ್ಧ ಹೋರಾಡಿದ ಭೀಕರ ದಿನಗಳನ್ನು ಇತ್ತೀಚಿನ ಸಂದರ್ಶನವೊಂದರಲ್ಲಿ ಮೆಲುಕು ಹಾಕಿದ್ದಾರೆ.
2011ರ ವಿಶ್ವಕಪ್ ವೇಳೆ ಅನುಭವಿಸಿದ ನೋವು ಮತ್ತು ನಂತರದ ಚಿಕಿತ್ಸೆಯ ಬಗ್ಗೆ ಭಾವುಕರಾಗಿ ಮಾತನಾಡಿದ ಯುವರಾಜ್ ಸಿಂಗ್, ನಾನು ಮೂರರಿಂದ ಆರು ತಿಂಗಳಿಗಿಂತ ಹೆಚ್ಚು ಕಾಲ ಬದುಕುವುದಿಲ್ಲ. ಕ್ಯಾನ್ಸರ್ ಗೆಡ್ಡೆ ನನ್ನ ಶ್ವಾಸಕೋಶ ಮತ್ತು ಹೃದಯದ ನಡುವೆ ಇದೆ ಎಂದು ವೈದ್ಯರು ಹೇಳಿದರು. ನಾನು ಕಿಮೊಥೆರಪಿಗೆ ಹೋಗದಿದ್ದರೆ, ನನಗೆ ಹೃದಯಾಘಾತದ ಅಪಾಯವೂ ಇರುತ್ತದೆ ಎಂದು ವೈದ್ಯರು ನನಗೆ ಎಚ್ಚರಿಕೆ ನೀಡಿದರು. ಟೆಸ್ಟ್ ಕ್ರಿಕೆಟ್ ಆಡಲು ಆಸ್ಟ್ರೇಲಿಯಾ ಪ್ರವಾಸ ಮಾಡಬೇಕಿದ್ದಾಗಲೇ ನಾನು ಕ್ಯಾನ್ಸರ್ ಚಿಕಿತ್ಸೆಗಾಗಿ ಅಮೆರಿಕಕ್ಕೆ ಹೋಗಬೇಕಾಯಿತು. ನಾನು ಸುಮಾರು ಏಳು ವರ್ಷಗಳ ಕಾಲ ಕಾಯುತ್ತಿದ್ದೆ. ಸುಮಾರು 40 ಟೆಸ್ಟ್ಗಳ ಕಾಲ ಬೆಂಚ್ಗೆ ಸೀಮಿತವಾದ ನಂತರ, ನನಗೆ ಅವಕಾಶ ಸಿಕ್ಕಿತು. ಟೆಸ್ಟ್ನಲ್ಲಿ ನನ್ನ ಸ್ಥಾನವನ್ನು ಗಟ್ಟಿಗೊಳಿಸಲು ನಾನು ಬಯಸಿದ್ದೆ. ಆದರೆ ಕ್ಯಾನ್ಸರ್ ಚಿಕಿತ್ಸೆಗಾಗಿ ಅಮೆರಿಕಕ್ಕೆ ಹೋಗಬೇಕಾಯಿತು. ನನ್ನ ಮುಂದೆ ಬೇರೆ ಆಯ್ಕೆ ಇರಲಿಲ್ಲ ಎಂದಿದ್ದಾರೆ.
ನಾನು 2011-2012 ರಲ್ಲಿ ಅಮೆರಿಕದಲ್ಲಿ ಕಿಮೊಥೆರಪಿಗೆ ಒಳಗಾಗಿದ್ದೆ. ಆಗ ವೈದ್ಯರ ಮಾತುಗಳು ನನ್ನಲ್ಲಿ ಧೈರ್ಯ ತುಂಬಿದವು. ನಾನು ಕ್ಯಾನ್ಸರ್ ಅನ್ನು ಜಯಿಸಿ ಆಸ್ಪತ್ರೆಯಿಂದ ಆರೋಗ್ಯವಾಗಿ ಹೊರಬರುತ್ತೇನೆ ಎಂದು ಡಾ. ಐನ್ಹಾರ್ನ್ ಹೇಳಿದರು. ಆ ಮಾತುಗಳು ನನಗೆ ಶಕ್ತಿ ತುಂಬಿದವು. ನಾನು ಕ್ಯಾನ್ಸರ್ನಿಂದ ಚೇತರಿಸಿಕೊಂಡಾಗ, ನಾನು ಮತ್ತೆ ಕ್ರಿಕೆಟ್ ಆಡಬಹುದೆಂದು ಅವರು ಹೇಳಿದಾಗ, ಅದು ನನಗೆ ಪುನರ್ಜನ್ಮದಂತೆ ಭಾಸವಾಯಿತು ಎಂದು ಹೇಳುತ್ತಾ ಭಾವುಕರಾಗಿದ್ದಾರೆ.
ಕ್ಯಾನ್ಸರ್ನಂತಹ ಮಾರಕ ಕಾಯಿಲೆಯನ್ನು ಗೆದ್ದು ಬಂದಿದ್ದಲ್ಲದೆ, ಮತ್ತೆ ಮೈದಾನಕ್ಕೆ ಮರಳಿ ಅಂತರಾಷ್ಟ್ರೀಯ ಕ್ರಿಕೆಟ್ ಆಡಿದ್ದು ಯುವರಾಜ್ ಅವರ ಅಪ್ರತಿಮ ಸಾಧನೆ.
ಯುವರಾಜ್ ಸಿಂಗ್ ಅವರ ಈ ಸ್ಫೂರ್ತಿದಾಯಕ ಕಥೆ ಇಂದಿಗೂ ಅನೇಕರಿಗೆ ಜೀವನದಲ್ಲಿ ಧೈರ್ಯ ತುಂಬುತ್ತಿದೆ. ಕ್ಯಾನ್ಸರ್ ವಿರುದ್ಧ ಜಯ ಸಾಧಿಸಿದ ನಂತರ ಅವರು 'YouWeCan' ಎಂಬ ಫೌಂಡೇಶನ್ ಮೂಲಕ ಅನೇಕ ಕ್ಯಾನ್ಸರ್ ರೋಗಿಗಳಿಗೆ ನೆರವಾಗುತ್ತಿದ್ದಾರೆ.