- ತಲೆಯ ಮೇಲೆ ಮರದ ಭಾರ, ನಾಲಿಗೆಯ ಮೇಲೆ ಇಂಗ್ಲಿಷ್ ವೈಯ್ಯಾರ: ಕೇರಳದ 'ಸೌದೆ ಮಾರಿ'ಯ ಆತ್ಮವಿಶ್ವಾಸಕ್ಕೆ ದೇಶವೇ ಫಿದಾ!
- "ಕೆಲಸ ಮಾಡಿದರೆ ನೀವೂ ಸ್ಟ್ರಾಂಗ್ ಆಗ್ತೀರಿ": ಬೆವರಿಳಿಸುವ ಕಾಯಕದ ನಡುವೆ ಇಂಗ್ಲಿಷ್ನಲ್ಲಿ ಸದ್ದು ಮಾಡಿದ ಮಹಿಳೆ!
- ಕೇರಳ ಸಾಕ್ಷರತೆಗೆ ಸಾಟಿಯಿಲ್ಲ: ಹರಿದ ಸೀರೆಯುಟ್ಟ ಮಹಿಳೆಯ ನಿರರ್ಗಳ ಇಂಗ್ಲಿಷ್ ಕಂಡು ವ್ಲಾಗರ್ ಶಾಕ್!
ತಿರುವನಂತಪುರಂ: "ಕಷ್ಟಗಳು ಮನುಷ್ಯನನ್ನು ಕುಗ್ಗಿಸಬಾರದು, ಬದಲಿಗೆ ಗಟ್ಟಿಗೊಳಿಸಬೇಕು" ಎಂಬುದಕ್ಕೆ ಕೇರಳದ ಈ ಮಹಿಳೆ ಸಾಕ್ಷಿಯಾಗಿದ್ದಾರೆ.
ಹೌದು, ತಲೆಯ ಮೇಲೆ ಭಾರಿ ತೂಕದ ಸೌದೆಯ ಹೊರೆಯನ್ನು ಹೊತ್ತು, ಕಿಂಚಿತ್ತೂ ದಣಿವಿಲ್ಲದೆ ನಿರರ್ಗಳವಾಗಿ ಇಂಗ್ಲಿಷ್ ಮಾತನಾಡುತ್ತಿರುವ ಈಕೆಯ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ(YouTuber) ಸಂಚಲನ ಮೂಡಿಸಿದೆ. ಕೇವಲ ಸಾಕ್ಷರತೆಯಲ್ಲ, ಬದುಕಿನ ಬಗೆಗಿನ ಆಕೆಯ ಸಕಾರಾತ್ಮಕ ದೃಷ್ಟಿಕೋನಕ್ಕೆ ನೆಟ್ಟಿಗರು ಜೈಹೋ ಎನ್ನುತ್ತಿದ್ದಾರೆ.
ಯುಟ್ಯೂಬರ್ ಜೊತೆಗಿನ ಆ ಚಟಾಕಿ ಮಾತು!
ಕೇರಳದ ಸುಂದರ ಹಸಿರಿನ ನಡುವೆ ಪ್ರಯಾಣಿಸುತ್ತಿದ್ದ ಟ್ರಾವೆಲ್ ವ್ಲಾಗರ್ ಒಬ್ಬರಿಗೆ ಈ ಮಹಿಳೆ ಎದುರಾಗಿದ್ದಾರೆ. ಭಾರಿ ಗಾತ್ರದ ಮರದ ತುಂಡುಗಳನ್ನು ತಲೆಯ ಮೇಲೆ ಹೊತ್ತು ಬರುತ್ತಿದ್ದ ಆಕೆಯನ್ನು ಕಂಡು ವ್ಲಾಗರ್ ಕ್ಯಾಮೆರಾ ಆನ್ ಮಾಡಿದ್ದಾರೆ. ದೂರದಿಂದಲೇ ವ್ಲಾಗರ್ ಅನ್ನು ಗಮನಿಸಿದ ಆಕೆ, "ನೀವು ಯುಟ್ಯೂಬರ್ (YouTuber) ಆಗಿದ್ದೀರಾ?" ಎಂದು ಇಂಗ್ಲಿಷ್ನಲ್ಲಿ ಕೇಳುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.
"ನಾನು ಸ್ಟ್ರಾಂಗ್ ಅಲ್ಲ, ಕೆಲಸವೇ ನನ್ನನ್ನು ಸ್ಟ್ರಾಂಗ್ ಮಾಡಿದೆ!"
ವ್ಲಾಗರ್ ಆಕೆಯ ಶಕ್ತಿಯನ್ನು ಕಂಡು, "ನೀವು ನಿಜಕ್ಕೂ ತುಂಬಾ ಬಲಿಷ್ಠ ಮಹಿಳೆ" ಎಂದು ಹೊಗಳಿದಾಗ, ಆಕೆ ನೀಡಿದ ಉತ್ತರ ಇಡೀ ವಿಡಿಯೋದ ಹೈಲೈಟ್. "ನಾನು ಬಲಿಷ್ಠಳಲ್ಲ. ನೀವು ಪ್ರತಿದಿನ ಕೆಲಸ ಮಾಡಿದರೆ, ನೀವೂ ಕೂಡ ಬಲಿಷ್ಠರಾಗುತ್ತೀರಿ" ಎಂದು ಅತ್ಯಂತ ಸರಳವಾಗಿ ಜೀವನದ ದೊಡ್ಡ ಪಾಠವನ್ನು ಆಕೆ ಇಂಗ್ಲಿಷ್ನಲ್ಲಿ ವಿವರಿಸಿದ್ದಾರೆ. ತಲೆಯ ಮೇಲೆ ಅಷ್ಟು ಭಾರವಿದ್ದರೂ ಮುಖದಲ್ಲಿ ಮಂದಹಾಸ ಮಾಸಿರಲಿಲ್ಲ.
ಸಿಂಗಾಪುರಕ್ಕೆ ನನ್ನನ್ನೂ ಕರೆದೊಯ್ಯುತ್ತೀರಾ?
ವ್ಲಾಗರ್ ತಾನು ಸಿಂಗಾಪುರಕ್ಕೆ ಪ್ರಯಾಣ ಬೆಳೆಸುತ್ತಿರುವುದಾಗಿ ಹೇಳಿದಾಗ, ಆಕೆ ತಮಾಷೆಯಾಗಿ "ನನ್ನನ್ನೂ ನಿಮ್ಮ ಜೊತೆ ಕರೆದೊಯ್ಯುತ್ತೀರಾ? ಈ ಸೌದೆಯನ್ನೆಲ್ಲಾ ನಿಮ್ಮ ಸೈಕಲ್ ಮೇಲೆ ಹಾಕಿ ನಾವಿಬ್ಬರೂ ಜೊತೆಯಾಗಿ ಹೋಗೋಣ" ಎಂದು ಹೇಳಿ ನಕ್ಕಿದ್ದಾರೆ. ಆಕೆಯ ಈ ವಿನೋದಪ್ರಜ್ಞೆ ಮತ್ತು ಬದುಕಿನ ಸಂಕಷ್ಟಗಳ ನಡುವೆಯೂ ಇರುವ ಉತ್ಸಾಹ ನೋಡುಗರ ಕಣ್ಣಾಲಿಗಳನ್ನು ಒದ್ದೆ ಮಾಡಿದೆ.
ಕೇರಳದ ಸಾಕ್ಷರತೆಗೆ ಹಿಡಿದ ಕನ್ನಡಿ
ವಿಡಿಯೋದ ಕೊನೆಯಲ್ಲಿ ವ್ಲಾಗರ್ ಆಕೆಯ ಇಂಗ್ಲಿಷ್ ಜ್ಞಾನವನ್ನು ಕಂಡು ಬೆರಗಾಗಿ ಮೆಚ್ಚುಗೆ ಸೂಚಿಸಿದಾಗ, ಆಕೆ ತನಗೆ ಇಂತಹ ಹೊಗಳಿಕೆಗಳು ಪದೆ ಪದೆ ಸಿಗುತ್ತಿರುತ್ತವೆ ಎಂದು ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ. "ನಾನು ಕೇರಳದಲ್ಲೇ ಹುಟ್ಟಿದ್ದೇನೆ, ಇಲ್ಲೇ ಸಾಯುತ್ತೇನೆ" ಎನ್ನುವ ಮೂಲಕ ತನ್ನ ಮಣ್ಣಿನ ಮೇಲಿರುವ ಪ್ರೀತಿಯನ್ನು ವ್ಯಕ್ತಪಡಿಸಿದ್ದಾರೆ. ಈ ವಿಡಿಯೋಗೆ ಸಾಮಾಜಿಕ ಜಾಲತಾಣಗಳಲ್ಲಿ "ಕೇರಳ ಸಾಕ್ಷರತೆ" (Kerala Literacy) ಎಂದು ಶೀರ್ಷಿಕೆ ನೀಡಲಾಗಿದ್ದು, ಲಕ್ಷಾಂತರ ಜನರು ಇದನ್ನು ವೀಕ್ಷಿಸಿದ್ದಾರೆ.
ನೆಟ್ಟಿಗರ ಪ್ರತಿಕ್ರಿಯೆ
ಆಕೆಯ ಇಂಗ್ಲಿಷ್ ಉಚ್ಚಾರಣೆ ಎಷ್ಟೋ ಸುಶಿಕ್ಷಿತರಿಗಿಂತ ಉತ್ತಮವಾಗಿದೆ ಎಂದು ಒಬ್ಬರು ಕಾಮೆಂಟ್ ಮಾಡಿದ್ದಾರೆ.ಕಷ್ಟದ ನಡುವೆಯೂ ಇಷ್ಟು ದೊಡ್ಡ ಸಕಾರಾತ್ಮಕ ಮನೋಭಾವ ಹೊಂದಿರುವುದು ನಿಜಕ್ಕೂ ಸ್ಫೂರ್ತಿದಾಯಕ ಎಂದು ಮತ್ತೊಬ್ಬರು ಬರೆದಿದ್ದಾರೆ. ಕೆಲಸವೇ ಮನುಷ್ಯನನ್ನು ಗಟ್ಟಿಗೊಳಿಸುತ್ತದೆ ಎಂಬ ಆಕೆಯ ಮಾತು ಶ್ರೇಷ್ಠವಾದುದು" ಎಂದು ಅನೇಕರು ಆಕೆಯ ವ್ಯಕ್ತಿತ್ವಕ್ಕೆ ಮಾರುಹೋಗಿದ್ದಾರೆ,(ಏಜೆನ್ಸೀಸ್).