ಅಂದು ನನಗೆ ಇಡಿ ಭಯ ಅಂದಿದ್ರಿ, ಇಂದು ನೀವೇಕೆ ದೆಹಲಿಗೆ ಹೋದ್ರಿ?: ಸಿಎಂ ವಿಜಯ್‌ಗೆ ಎಂ.ಕೆ. ಸ್ಟಾಲಿನ್ ತಿರುಗೇಟು! MK Stalin

ತಮ್ಮ ಪಕ್ಷದ ಕಾರ್ಯಕರ್ತರು ಮತ್ತು ಬೆಂಬಲಿಗರ ಬೃಹತ್ ಸಮಾವೇಶವನ್ನುದ್ದೇಶಿಸಿ ಮಾತನಾಡಿದ ಎಂ.ಕೆ. ಸ್ಟಾಲಿನ್, ಹಿಂದೆ ತಾವು ಮುಖ್ಯಮಂತ್ರಿಯಾಗಿದ್ದಾಗ ದೆಹಲಿಗೆ ಹೋದಾಗಲೆಲ್ಲಾ ವಿಜಯ್ ಮಾಡುತ್ತಿದ್ದ ಕಟು ಟೀಕೆಗಳನ್ನು ನೆನಪಿಸುವ ಮೂಲಕ ಹಾಲಿ ಸಿಎಂಗೆ ಅವರದೇ ಶೈಲಿಯಲ್ಲಿ ತಿರುಗೇಟು ನೀಡಿದ್ದಾರೆ.

ಹಿಂದೆ ನಾನು ಮುಖ್ಯಮಂತ್ರಿಯಾಗಿದ್ದ ಅವಧಿಯಲ್ಲಿ ಅಧಿಕೃತ ಕೆಲಸಗಳಿಗಾಗಿ ದೇಶದ ರಾಜಧಾನಿ ದೆಹಲಿಗೆ ಪ್ರಯಾಣ ಬೆಳೆಸಿದಾಗಲೆಲ್ಲಾ, ಇಂದಿನ ಮುಖ್ಯಮಂತ್ರಿ ನನ್ನ ವಿರುದ್ಧ ಸಾಲು ಸಾಲು ಆರೋಪಗಳನ್ನು ಮಾಡುತ್ತಿದ್ದರು. ಜಾರಿ ನಿರ್ದೇಶನಾಲಯದ (ED) ತನಿಖೆ ಮತ್ತು ಪ್ರಕರಣಗಳಿಂದ ಪಾರಾಗಲು ನಾನು ದೆಹಲಿಗೆ ಓಡುತ್ತಿದ್ದೇನೆ ಎಂದು ಸಾರ್ವಜನಿಕವಾಗಿ ಹೀಯಾಳಿಸುತ್ತಿದ್ದರು. ಅಷ್ಟೇ ಅಲ್ಲದೆ, ವೈಯಕ್ತಿಕ ಮತ್ತು ರಾಜಕೀಯ ಲಾಭಕ್ಕಾಗಿ ಡಿಎಂಕೆ ಪಕ್ಷವು ಕೇಂದ್ರದ ಬಿಜೆಪಿ ಸರ್ಕಾರದ ಮುಂದೆ ಶರಣಾಗಿದೆ ಎಂದು ಸುಳ್ಳು ಕಥೆಗಳನ್ನು ಹೆಣೆಯುತ್ತಿದ್ದರು ಎಂದು ಸ್ಟಾಲಿನ್ ಹಳೆಯ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ.

ಪ್ರಸ್ತುತ ತಮಿಳುನಾಡು ರಾಜಕೀಯ ಚಿತ್ರಣ ಬದಲಾಗಿದ್ದು, ನಟ ಪ್ರಮುಖ ರಾಜಕಾರಣಿಯಾಗಿ ಸಿಎಂ ಗದ್ದುಗೆ ಏರಿರುವ ವಿಜಯ್ ಅವರ ಇತ್ತೀಚಿನ ದೆಹಲಿ ಪ್ರವಾಸವನ್ನು ಉಲ್ಲೇಖಿಸಿದ ಸ್ಟಾಲಿನ್, ಅದೇ ಪ್ರಶ್ನೆಗಳನ್ನು ವಿಜಯ್ ಅವರತ್ತಲೇ ತಿರುಗಿಸಿದ್ದಾರೆ. ಈಗ ನೀವೇ ಖುದ್ದಾಗಿ ದೆಹಲಿಗೆ ಹೋಗಿ ಬಂದಿದ್ದೀರಲ್ಲಾ, ಹಾಗಾದರೆ ನಿಮ್ಮ ಈ ಪ್ರವಾಸದ ರಹಸ್ಯವೇನು ಎಂದಿದ್ದಾರೆ. ಅಲ್ಲದೆ, ಕರೂರ್ ಸಿಬಿಐ ಪ್ರಕರಣದ ತನಿಖೆಯಿಂದ ತಪ್ಪಿಸಿಕೊಳ್ಳಲು ನೀವು ದೆಹಲಿ ನಾಯಕರ ಶರಣು ಹೋದರೇ, ಕೇಂದ್ರದ ಬಿಜೆಪಿ ಸರ್ಕಾರವನ್ನು ಟೀಕಿಸಲು ನೀವು ಇಷ್ಟೊಂದು ಹಿಂಜರಿಯುತ್ತಿರುವುದರ ಹಿಂದೆ ನಿಮ್ಮ ಸರ್ಕಾರಕ್ಕೆ ಕಷ್ಟ ಬರಬಹುದು ಎಂಬ ಭಯವೇ ಕಾರಣವೇ ಎಂದು ಸ್ಟಾಲಿನ್ ಪ್ರಶ್ನಿಸಿದ್ದಾರೆ.

ಸಿಎಂ ವಿಜಯ್ ಅವರ ರಾಜಕೀಯ ನಿಲುವುಗಳಲ್ಲಿ ಸ್ಥಿರತೆಯಿಲ್ಲ ಮತ್ತು ಅವರ ಮಾತುಗಳಲ್ಲೇ ದ್ವಂದ್ವಗಳಿವೆ ಎಂಬುದನ್ನು ಜನರ ಮುಂದೆ ಬಯಲು ಮಾಡುವುದೇ ತಮ್ಮ ಈ ಹೇಳಿಕೆಯ ಮುಖ್ಯ ಉದ್ದೇಶ ಎಂದು ಸ್ಟಾಲಿನ್ ಸ್ಪಷ್ಟಪಡಿಸಿದ್ದಾರೆ. ಅಲ್ಲದೆ, ಹಿಂದೆ ಡಿಎಂಕೆ ನಾಯಕತ್ವದ ವಿರುದ್ಧ ವಿಜಯ್ ಮತ್ತು ಅವರ ಬೆಂಬಲಿಗರು ಬಳಸುತ್ತಿದ್ದ ಆರೋಪಗಳ ಅಸ್ತ್ರಗಳೇ, ಇಂದು ತಿರುಗುಬಾಣವಾಗಿ ಅವರ ವಿರುದ್ಧವೇ ಬಂದು ನಿಂತಿವೆ ಎಂದು ಮಾಜಿ ಸಿಎಂ ವಾದಿಸಿದ್ದಾರೆ.

ಇಷ್ಟೆಲ್ಲಾ ವಾಗ್ದಾಳಿ ನಡೆಸಿದ ಹೊರತಾಗಿಯೂ ಮಾಜಿ ಸಿಎಂ ಸ್ಟಾಲಿನ್ ತಾವೊಬ್ಬ ಪ್ರಬುದ್ಧ ರಾಜಕಾರಣಿ ಎಂಬುದನ್ನು ಸಾಬೀತುಪಡಿಸಿದರು. ಮುಖ್ಯಮಂತ್ರಿಯೊಬ್ಬರು ಅಧಿಕೃತ ಸರ್ಕಾರಿ ಕಾರ್ಯಕ್ರಮಗಳು ಮತ್ತು ರಾಜ್ಯದ ಅಭಿವೃದ್ಧಿ ಕೆಲಸಗಳಿಗಾಗಿ ನವದೆಹಲಿಗೆ ಭೇಟಿ ನೀಡುವುದು ಅವರ ಕರ್ತವ್ಯದ ಒಂದು ಭಾಗವಾಗಿರುತ್ತದೆ. ಪ್ರತಿಯೊಂದು ಪ್ರವಾಸವನ್ನೂ ರಾಜಕೀಯ ಕನ್ನಡಕ ಹಾಕಿಕೊಂಡು ನೋಡುವುದು ಸರಿಯಲ್ಲ. ಕೇವಲ ರಾಜಕೀಯ ವಿರೋಧವಿದೆ ಎಂದ ಮಾತ್ರಕ್ಕೆ, ಸಿಎಂ ದೆಹಲಿ ಪ್ರವಾಸದ ಬಗ್ಗೆ ನಾನು ಕೀಳುಮಟ್ಟದ ವೈಯಕ್ತಿಕ ನಿಂದನೆಗಳನ್ನು ಮಾಡಲು ಹೋಗುವುದಿಲ್ಲ. ಆ ಮೂಲಕ ನನ್ನ ರಾಜಕೀಯ ಗುಣಮಟ್ಟವನ್ನು ನಾನು ಎಂದಿಗೂ ತಗ್ಗಿಸಿಕೊಳ್ಳುವುದಿಲ್ಲ ಎಂದು ಸ್ಟಾಲಿನ್ ಮಾರ್ಮಿಕವಾಗಿ ನುಡಿದಿದ್ದಾರೆ.

ತಮಿಳುನಾಡಿನಲ್ಲಿ ಮುಂಬರುವ ಸಾರ್ವತ್ರಿಕ ಹಾಗೂ ವಿಧಾನಸಭಾ ಚುನಾವಣೆಗಳ ಹಿನ್ನೆಲೆಯಲ್ಲಿ ಈ ಬೆಳವಣಿಗೆ ಭಾರಿ ಮಹತ್ವ ಪಡೆದುಕೊಂಡಿದೆ. ಮುಖ್ಯಮಂತ್ರಿ ಜೋಸೆಫ್ ವಿಜಯ್ ನೇತೃತ್ವದ ಆಡಳಿತಾರೂಢ ಟಿವಿಕೆ ಮತ್ತು ಪ್ರಮುಖ ವಿಪಕ್ಷವಾದ ಡಿಎಂಕೆ ನಡುವಿನ ಈ ರಾಜಕೀಯ ಸಮರವು ದಿನದಿಂದ ದಿನಕ್ಕೆ ಹೊಸ ಆಯಾಮಗಳನ್ನು ಪಡೆದುಕೊಳ್ಳುತ್ತಿದೆ. ಕೇಂದ್ರದ ಬಿಜೆಪಿ ಮತ್ತು ಒಕ್ಕೂಟ ಸರ್ಕಾರದೊಂದಿಗೆ ಯಾರಿಗೆ ಎಂತಹ ಸಂಬಂಧವಿದೆ ಎಂಬ ಬಗ್ಗೆ ಉಭಯ ಪಕ್ಷಗಳು ನಡೆಸುತ್ತಿರುವ ಈ ಕೆಸರೆರಚಾಟ ತಮಿಳುನಾಡು ರಾಜಕೀಯ ರಂಗವನ್ನು ಮತ್ತಷ್ಟು ಕಾವೇರಿಸುವಂತೆ ಮಾಡಿದೆ,(ಏಜೆನ್ಸೀಸ್).