ಬಂಗಾಳದಲ್ಲಿ ಯೋಗಿ ವ್ಯೂಹ: ರಸ್ತೆ ನಮಾಜ್, ಗೋಹತ್ಯೆ ಹಾಗೂ ಮೈಕ್​ಗಳಿಗೆ ಬ್ರೇಕ್! ದೀದಿ ನಿರ್ಧಾರ ಉಲ್ಟಾ ಪಲ್ಟಾ ಮಾಡಿದ ಸಿಎಂ ಸುವೇಂದು! Suvendu following Yogi path

ಧಾರ್ಮಿಕ ಸ್ಥಳಗಳಲ್ಲಿ ಧ್ವನಿವರ್ಧಕಗಳ ನಿಷೇಧ, ರಸ್ತೆಗಳಲ್ಲಿ ಸಾರ್ವಜನಿಕ ನಮಾಜ್ ತಡೆ ಹಾಗೂ ಬಕ್ರೀದ್ ವೇಳೆ ಸಾರ್ವಜನಿಕವಾಗಿ ಗೋಹತ್ಯೆ ಮಾಡುವುದರ ವಿರುದ್ಧ ಕಠಿಣ ಕಾನೂನು ಜಾರಿಗೊಳಿಸುವ ಮೂಲಕ ಸುವೇಂದು ಅಧಿಕಾರಿ ಇಡೀ ದೇಶದ ಗಮನ ಸೆಳೆದಿದ್ದಾರೆ.

ಉತ್ತರ ಪ್ರದೇಶದಲ್ಲಿ ಯೋಗಿ ಅವರು ಅಧಿಕಾರಕ್ಕೆ ಬಂದ ತಕ್ಷಣ ಅಪರಾಧಿಗಳ ವಿರುದ್ಧ ನಾಲ್ಕು ಹಂತದ ಕಠಿಣ ಸೂತ್ರಗಳನ್ನು ಜಾರಿಗೆ ತಂದಿದ್ದರು. ಪ್ರಭಾವಿ ಅಪರಾಧಿಗಳಿಗೆ ಯಾವುದೇ ರಿಯಾಯಿತಿ ನೀಡದಿರುವುದು, ಬುಲ್ಡೋಜರ್ ಪ್ರಯೋಗ, ಮತ್ತು ಎನ್‌ಕೌಂಟರ್‌ಗಳ ವೇಗವನ್ನು ಹೆಚ್ಚಿಸುವ ಮೂಲಕ ಯುಪಿಯಲ್ಲಿ ಅಪರಾಧ ಮುಕ್ತ ಆಡಳಿತ ತಂದಿದ್ದರು. ಈಗ ಬಂಗಾಳದಲ್ಲೂ ಅದೇ ಮಾದರಿಯ ಎನ್‌ಕೌಂಟರ್ ಮತ್ತು ಬುಲ್ಡೋಜರ್ ಸಂಸ್ಕೃತಿ ಆರಂಭವಾಗಿದೆ. ಜೈಲಿನಿಂದ ಕೋರ್ಟ್‌ಗೆ ವಿಚಾರಣೆಗೆ ಹೋಗುವಾಗಲೂ ಅಪರಾಧಿಗಳು ಎನ್‌ಕೌಂಟರ್ ಭೀತಿಯಿಂದ ನಡುಗುವಂತಹ ವಾತಾವರಣವನ್ನು ಸುವೇಂದು ಸರ್ಕಾರ ಸೃಷ್ಟಿಸಿದೆ.

ಸ್ವಾತಂತ್ರ್ಯದ ನಂತರ ರಾಜಕೀಯ ಲಾಭ ಹಾಗೂ ವೋಟ್ ಬ್ಯಾಂಕ್ ರಾಜಕಾರಣಕ್ಕಾಗಿ ಬಂಗಾಳದ ಯಾವುದೇ ಸರ್ಕಾರಗಳು ಗೋಹತ್ಯೆ ತಡೆ ಕಾನೂನನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಿರಲಿಲ್ಲ. ಮಮತಾ ಆಡಳಿತದಲ್ಲಿ ಸಾಂಸ್ಥಿಕ ರೂಪ ಪಡೆದುಕೊಂಡಿದ್ದ ಗೋ ಕಳ್ಳಸಾಗಣೆಯ ವಿರುದ್ಧ ಸುವೇಂದು ಈಗ ಹಳೆಯ ಕಾನೂನನ್ನು ಮಾರ್ಪಡಿಸಿ ಅತ್ಯಂತ ಕಠಿಣ ಶಿಕ್ಷೆಯ ನಿಯಮವನ್ನು ತಂದಿದ್ದಾರೆ. ಬಕ್ರೀದ್ ಹಬ್ಬದ ಸಂದರ್ಭದಲ್ಲಿ ಸಾರ್ವಜನಿಕವಾಗಿ ಗೋಹತ್ಯೆ ಮಾಡುವುದನ್ನು ಸಂಪೂರ್ಣವಾಗಿ ಅಪರಾಧೀಕರಿಸಲಾಗಿದೆ. ಆರಂಭದಲ್ಲಿ ಮುಸ್ಲಿಂ ಸಮುದಾಯದಿಂದ ತೀವ್ರ ವಿರೋಧ ವ್ಯಕ್ತವಾದರೂ, ಕೋಲ್ಕತ್ತಾದ ಐತಿಹಾಸಿಕ ನಾಖೋಡಾ ಮಸೀದಿಯ ಇಮಾಮ್ ಅವರು ಸರ್ಕಾರದ ನಿರ್ಧಾರಕ್ಕೆ ಬೆಂಬಲ ಸೂಚಿಸಿ, ಸಂಘರ್ಷದ ಹಾದಿ ಬೇಡ ಎಂದು ಕರೆ ನೀಡಿರುವುದು ಮುಸ್ಲಿಂ ಸಮುದಾಯದ ಮನಸ್ಥಿತಿಯಲ್ಲಿ ಬದಲಾವಣೆ ತಂದಿದೆ.

ಯೋಗಿ ಅವರಂತೆಯೇ ಸುವೇಂದು ಅಧಿಕಾರಿ ಕೂಡ ಧಾರ್ಮಿಕ ಸ್ಥಳಗಳಲ್ಲಿ ಅನುಮತಿಯಿಲ್ಲದ ಪ್ರಖರ ಧ್ವನಿವರ್ಧಕಗಳನ್ನು ತೆರವುಗೊಳಿಸಲು ಆದೇಶಿಸಿದ್ದಾರೆ. ಸಾರ್ವಜನಿಕ ರಸ್ತೆಗಳನ್ನು ಅತಿಕ್ರಮಿಸಿ ನಮಾಜ್ ಮಾಡುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಪ್ರಾರ್ಥನೆಗಳನ್ನು ಮಸೀದಿಗಳ ಒಳಗೆ ಅಥವಾ ಶಿಫ್ಟ್ ಆಧಾರದ ಮೇಲೆ ಮಾಡಬೇಕೇ ಹೊರತು ಸಾರ್ವಜನಿಕ ರಸ್ತೆಗಳನ್ನಲ್ಲ ಎಂಬ ಯೋಗಿ ಅವರ ನಿಲುವನ್ನೇ ಬಂಗಾಳದಲ್ಲೂ ಕಟ್ಟುನಿಟ್ಟಾಗಿ ಜಾರಿಗೊಳಿಸಲಾಗಿದೆ. ಮುಸ್ಲಿಮರು ಇದಕ್ಕೆ ಆರಂಭದಲ್ಲಿ ಪ್ರತಿಭಟಿಸಿದರೂ, ಈಗ ಅನಿವಾರ್ಯವಾಗಿ ಒಪ್ಪಿಕೊಳ್ಳುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಅಕ್ರಮ ನುಸುಳುಕೋರರ ವಿಷಯದಲ್ಲಿ ಸಿಎಂ ಸುವೇಂದು ಅಧಿಕಾರಿ ಅತ್ಯಂತ ಆಘಾತಕಾರಿ ಮತ್ತು ಐತಿಹಾಸಿಕ ತೀರ್ಮಾನ ಕೈಗೊಂಡಿದ್ದಾರೆ. ರಾಜ್ಯ ಪೊಲೀಸ್ ಮತ್ತು ಆರ್‌ಪಿಎಫ್ ಪಡೆಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿರುವ ಸಿಎಂ, ಅಕ್ರಮ ನುಸುಳುಕೋರರನ್ನು ಭಾರತದ ಜೈಲುಗಳಲ್ಲಿ ಇಟ್ಟು ತೆರಿಗೆದಾರರ ಹಣವನ್ನು ಪೋಲು ಮಾಡುವ ಅಗತ್ಯವಿಲ್ಲ. ಸಿಕ್ಕಿಬಿದ್ದ ತಕ್ಷಣ ಅವರನ್ನು ನೇರವಾಗಿ ಗಡಿ ಭದ್ರತಾ ಪಡೆಗೆ (BSF) ಒಪ್ಪಿಸಿ ಅವರ ದೇಶಕ್ಕೆ ವಾಪಸ್ ಕಳುಹಿಸಿ ಎಂದು ಆದೇಶಿಸಿದ್ದಾರೆ. ಈ ಹಿಂದೆ ಬಂಗಾಳದಲ್ಲಿ ಲಕ್ಷಾಂತರ ನುಸುಳುಕೋರರಿದ್ದಾರೆ ಎಂದು ಒಪ್ಪಿಕೊಳ್ಳುತ್ತಿದ್ದ ಮಮತಾ ಬ್ಯಾನರ್ಜಿ, ಈಗ ಅಧಿಕಾರ ಹೋದ ತಕ್ಷಣ ತನ್ನ ನಿಲುವನ್ನು ಬದಲಿಸಿ ನುಸುಳುಕೋರರೇ ಇಲ್ಲ ಎಂದು ವಾದಿಸುತ್ತಿದ್ದಾರೆ.

ಸುವೇಂದು ಅಧಿಕಾರಿ ಮತ್ತು ಯೋಗಿ ಆದಿತ್ಯನಾಥ್ ಇಬ್ಬರೂ ಬಹುಮತದ ಸರ್ಕಾರ ಮುನ್ನಡೆಸುತ್ತಿರುವುದರಿಂದ ಇಂತಹ ಕಠಿಣ ನಿರ್ಧಾರಗಳನ್ನು ತೆಗೆದುಕೊಳ್ಳುವುದು ಸುಲಭವಾಗಿದೆ. ಯುಪಿಯಲ್ಲಿ ಯೋಗಿ ಸರ್ಕಾರ ಕೇವಲ ಮುಸ್ಲಿಂ ಅಪರಾಧಿಗಳಾದ ಅತೀಕ್ ಅನ್ಸಾರಿ ಅಥವಾ ಅಜಂ ಖಾನ್ ವಿರುದ್ಧ ಮಾತ್ರವಲ್ಲದೆ, ರಜಪೂತ ಮತ್ತು ಬ್ರಾಹ್ಮಣ ಸಮುದಾಯದ ಪ್ರಮುಖ ಅಪರಾಧಿಗಳ ಮೇಲೂ ತಾರತಮ್ಯವಿಲ್ಲದೆ ಎನ್‌ಕೌಂಟರ್ ನಡೆಸಿ ಕಾನೂನಿನ ದಕ್ಷತೆಯನ್ನು ಸಾಬೀತುಪಡಿಸಿತ್ತು.

ಬಂಗಾಳದ ಈ ಹೊಸ ಆಡಳಿತ ಶೈಲಿಯು ದೇಶಾದ್ಯಂತ ಇರುವ ಹಿಂದೂ ಮತದಾರರಲ್ಲಿ ಹೊಸ ಜಾಗೃತಿ ಮೂಡಿಸುತ್ತಿದ್ದು, ಇದರ ನೇರ ಲಾಭವು ಮುಂಬರುವ 2027ರ ಉತ್ತರ ಪ್ರದೇಶದ ವಿಧಾನಸಭಾ ಚುನಾವಣೆಯಲ್ಲಿ ಯೋಗಿ ಆದಿತ್ಯನಾಥ್ ಅವರಿಗೆ ಸಿಗಲಿದೆ ಎಂದು ರಾಜಕೀಯ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಮಮತಾ ಸರ್ಕಾರದ ನಿರ್ಧಾರಗಳ ವಿರುದ್ಧ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಲು ಸಿದ್ಧತೆ ನಡೆಸುತ್ತಿದ್ದರೂ, ಬಂಗಾಳದ ಸಾಮಾನ್ಯ ಮುಸ್ಲಿಂ ಜನತೆ ಮಾತ್ರ ಸರ್ಕಾರದೊಂದಿಗೆ ಸಂಘರ್ಷಕ್ಕೆ ಇಳಿಯಲು ಸಿದ್ಧರಿಲ್ಲ ಎಂಬುದು ಸ್ಪಷ್ಟವಾಗಿದೆ,(ಏಜೆನ್ಸೀಸ್​).