ಕಮಾಲ್ ಆರ್ ಖಾನ್, ಟಾಕ್ಸಿಕ್ ಸಿನಿಮಾ ಪೋಸ್ಟರ್
- ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧ
- ಕದನದ ಕಾರಣ ಟಾಕ್ಸಿಕ್ ಸಿನಿಮಾ ಮುಂದೂಡಿಕೆ
- ಧುರಂಧರ್ ಸಿನಿಮಾಗೆ ಹೆದರಿ ಸಿನಿಮಾ ಮುಂದೂಡಲಾಗಿದೆ ಎಂದ ಕೆಆರ್ಕೆ
ಮುಂಬೈ: ಮಾರ್ಚ್ 19 ರಂದು ತೆರೆ ಕಾಣಬೇಕಿದ್ದ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಟಾಕ್ಸಿಕ್ (Toxic) : ಎ ಫೇರಿ ಟೇಲ್ ಫಾರ್ ಗ್ರೋನ್-ಅಪ್ಸ್ ಸಿನಿಮಾ ಮಧ್ಯಪ್ರಾಚ್ಯದಲ್ಲಿ ಸಂಘರ್ಷ ಮುಂದುವರೆದ ಹಿನ್ನಲೆಯಲ್ಲಿ ಸಿನಿಮಾವವನ್ನು ಮುಂದೂಡಲಾಗಿದೆ ಎಂದು ಅಧಿಕೃತವಾಗಿ ತಿಳಿಸಲಾಗಿದೆ.
ಟಾಕ್ಸಿಕ್ ಸಿನಿಮಾದ ಮುಂದೂಡಿಕೆ ಬಗ್ಗೆ ನಾಲಿಗೆ ಹರಿಬಿಟ್ಟಿರುವ ಸ್ವಯಂ ಘೋಷಿತ ಸಿನಿಮಾ ವಿಮರ್ಶಕ ಕಮಾಲ್ ಆರ್ ಖಾನ್ ಅಲಿಯಾಸ್ ಕೆಆರ್ಕೆ, ಟಾಕ್ಸಿಕ್ ಬಿಡುಗಡೆಗೆ ಮುನ್ನ ಹೆದರಿ ಓಡಿಹೋಗಿದೆ ಎಂಬ ಹೇಳಿಕೆ ನೀಡಿದ್ದಾರೆ.
ಯಶ್ ಒಬ್ಬ ಡ್ರಾಮಾ ಮಾಸ್ಟರ್!
ನಾನು ಇದನ್ನು ಮೊದಲೇ ಹೇಳಿದ್ದೆ, ಯಶ್ ಒಬ್ಬ ನಾಟಕಕಾರ ಅವನು ಕೇವಲ ಪಬ್ಲಿಸಿಟಿ ಪಡೆಯಲು ಮಾರ್ಚ್ 19 ರಂದು ಧುರಂಧರ್ ಜೊತೆಗೆ ಸಿನಿಮಾ ಬಿಡುಗಡೆ ಮಾಡುವುದಾಗಿ ಹೇಳಿದ್ದ, ಈಗ ಓಡಿಹೋಗಿದ್ದಾನೆ ಎಂದು ಕೆಆರ್ಕೆ ತಮ್ಮ ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.
ಧುರಂಧರ್ 2 ಮೊದಲ ದಿನವೇ 100 ಕೋಟಿ ಗಳಿಸಲಿದೆ
ಇತ್ತ ಮಾರ್ಚ್ 19 ರಂದು ಬಿಡುಗಡೆಗೆ ತಯಾರಾಗಿ ನಿಂತಿರುವ ರಣವೀರ್ ಸಿಂಗ್ ಅಭಿನಯದ ಧುರಂಧರ್ 2 ಸಿನಿಮಾ ತನ್ನ ಮೊದಲ ದಿನವೇ 100 ಕೋಟಿ ಗಳಿಸಲಿದೆ ಎಂದು ಕೆಆರ್ಕೆ ಭವಿಷ್ಯ ನುಡಿದಿದ್ದಾರೆ.
ಧುರಂಧರ್ ಸಿನಿಮಾದ ಮೊದಲ ಭಾಗವು ಸುಮಾರು 1000 ಕೋಟಿಯನ್ನು ಗಳಿಸಿ ಆಲ್ ಟೈಮ್ ಬ್ಲಾಕ್ಬಾಸ್ಟರ್ ಆಗಿ ಹೊರಹೊಮ್ಮಿತ್ತು. ಇದೀಗ ಇದರ ಎರಡನೇ ಭಾಗವು ಮಾರ್ಚ್ 19 ರಂದು ತೆರೆ ಕಾಣಲಿದ್ದು, ಪ್ರೇಕ್ಷಕರು ಈ ಸಿನಿಮಾದ ಬಿಡುಗಡೆಗೆ ತುದಿಗಾಲಲ್ಲಿ ಕಾಯುತ್ತಾ ಕುಳಿತ್ತಿದ್ದಾರೆ ಎಂದರೆ ತಪ್ಪಾಗದು.
ಯುದ್ಧದ ಕಾರಣ ಸಿನಿಮಾವನ್ನು ಮುಂದೂಡಿದ್ದೇವೆ
ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಕಾರ್ಮೋಡ ಕವಿದ ಪರಿಣಾಮ ಸಿನಿಮಾದ ಗಳಿಕೆಗೆ ಪೆಟ್ಟು ಬೀಳುವ ಸಾಧ್ಯತೆಯಿರುವ ಕಾರಣ ಸಿನಿಮಾವನ್ನು ಮುಂದೂಡಲಾಗಿದೆ ಎಂದು ಟಾಕ್ಸಿಕ್ ತಂಡ ಹೇಳಿಕೊಂಡಿದೆ. ಈ ಸಿನಿಮಾವನ್ನು ಜಾಗತಿಕ ಪ್ರೇಕ್ಷಕರನ್ನು ಗುರಿಯಾಗಿಸಿ ನಿರ್ಮಿಸಿದ ಸಿನಿಮಾವಾಗಿದ್ದು, ವರ್ಷಗಳ ಕಾಲ ಪಟ್ಟ ಶ್ರಮವನ್ನು ಹಾಳು ಮಾಡುವುದು ಸರಿಯಲ್ಲ. ಹಾಗೆಯೇ ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಕದನದ ಹಿನ್ನಲೆಯಲ್ಲಿ ಈ ಸಿನಿಮಾವನ್ನು ಮಾರ್ಚ್ 19ರ ಬದಲು ಜೂನ್ 4 ರಂದು ಬಿಡುಗಡೆ ಮಾಡಲಾಗುವುದು ಎಂದು ತಿಳಸಲಾಗಿದೆ.
ಮುಂದೂಡಿಕೆ ಬೆನ್ನಲ್ಲೇ ಶುರುವಾದ ಟ್ರೋಲಿಂಗ್!
ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಟಾಕ್ಸಿಕ್ ಸಿನಿಮಾ ಮುಂದೂಡಲಾಗಿದೆ ಎಂಬ ಸುದ್ದಿ ಹೊರ ಬೀಳುತ್ತಿದ್ದಂತೆ,ಇತ್ತ ಸಾಮಾಜಿಕ ಜಾಲತಾಣಗಳಲ್ಲಿ ಟ್ರೋಲಿಂಗ್ ಪ್ರಾರಂಭವಾಗಿದೆ.
ಯುದ್ಧ ಎನ್ನುವುದು ಕೇವಲ ನೆಪ, ಅಸಲಿ ಭಯ ಇರುವುದು ಧುರಂಧರ್ನದ ಎಂದು ಒಬ್ಬರು ಹೇಳಿದರೆ, ಇವರು ಕೇವಲ ಹೈಪ್ ಗೋಸ್ಕರ್ ಧುರಂಧರ್ ಜೊತೆಗೆ ಸಿನಿಮಾ ಬಿಡುಗಡೆ ಮಾಡುವುದಾಗಿ ಹೇಳಿದ್ದು ಎಂದಿದ್ದಾರೆ. ಧುರಂಧರ್ ವಿರುದ್ಧ ಇವರ ಸಿನಿಮಾ ನೆಲಕಚ್ಚಲಿದೆ ಎಂಬ ಕಾರಣಕ್ಕೆ ಬಿಡುಗಡೆಯನ್ನು ಮುಂದೂಡಿದ್ದಾರೆ, ಈಗ ಸುಮ್ಮನೇ ಯುದ್ಧ ಎನ್ನುತ್ತಿದ್ದಾರೆ ಎಂದು ಮತ್ತೊಬ್ಬರು ಕಮೆಂಟ್ ಮಾಡಿದ್ದಾರೆ,(ಏಜನ್ಸೀಸ್).