ಲಿವ್​-ಇನ್​ ಸಂಬಂಧಕ್ಕಾಗಿ ಪುತ್ರನನ್ನೇ ತೊರೆದಳು! ಬಾಯ್​ಫ್ರೆಂಡ್​ ನಂಬಿ ಹೋದವಳು ಕಡೆಗೆ ಸೇರಿದ್ದು ಮಸಣ

ಉತ್ತರ ಪ್ರದೇಶ: ಲಿವ್​-ಇನ್​ ಸಂಬಂಧ ಉಳಿಸಿಕೊಳ್ಳಲು ತನ್ನ 13 ವರ್ಷ ಮಗನನ್ನೇ ತೊರೆದ ಮಹಿಳೆ ಇದೀಗ ಬರ್ಬರವಾಗಿ ಪ್ರಿಯಕರನಿಂದ ಹತ್ಯೆಯಾದ ಘಟನೆ ಬೆಳಕಿಗೆ ಬಂದಿದೆ.

ತನ್ನೊಂದಿಗೆ ಲಿವ್​-ಇನ್​ ರಿಲೇಷನ್​ಶಿಪ್​ನಲ್ಲಿದ ಮಹಿಳೆಯ ಶಿರಚ್ಛೇದ ಮಾಡಿದ ಪ್ರಿಯಕರ, ಆಕೆಯ ಶವವನ್ನು ಅರಣ್ಯ ಪ್ರದೇಶದಲ್ಲಿ ಎಸೆದು ಪರಾರಿಯಾಗಿದ್ದ. ಮೃತಳನ್ನು ಉಮಾ (30) ಎಂದು ಗುರುತಿಸಲಾಗಿದ್ದು, ಆರೋಪಿ ಬಿಲಾಲ್​ನನ್ನು ಬಂಧಿಸಲಾಗಿದೆ. ಈತ ವೃತ್ತಿಯಲ್ಲಿ ಟ್ಯಾಕ್ಸಿ ಚಾಲಕ ಎಂದು ಸ್ಥಳೀಯ ಪೊಲೀಸರು ತಿಳಿಸಿದ್ದಾರೆ. ಸದ್ಯ ಆರೋಪಿಯನ್ನು ಬಂಧಿಸಿರುವ ಖಾಕಿ ಪಡೆ, ಆತನಿಂದ ಘಟನೆಯ ಸಂಪೂರ್ಣ ವಿವರವನ್ನು ಕಲೆಹಾಕಿದ್ದಾರೆ.

ಆರೋಪಿ ಮತ್ತೊಂದು ಮದುವೆಗೆ ತಯಾರಿ ನಡೆಸುತ್ತಿದ್ದ. ಈ ವಿಷಯ ಉಮಾಳಿಗೆ ಗೊತ್ತಾಯಿತು. ಈ ವಿಚಾರವನ್ನು ಬಿಲಾಲ್​ ಉಮಾಳಿಗೆ ಹೇಳಿರಲಿಲ್ಲ. ಮತ್ತೊಬ್ಬಳೊಂದಿಗೆ ಮದುವೆ ಆಗಬೇಕು ಎಂಬ ಕಾರಣಕ್ಕೆ, ಉಮಾ ಜತೆಗಿನ ಸಂಬಂಧ ಮುರಿದುಕೊಳ್ಳಲು ಬಿಲಾಲ್​ ಕೊಲೆಗೈಯಲು ಸಂಚು ಹೂಡಿದ್ದ. ಕಾರಿನಲ್ಲಿ ಉಮಾಳನ್ನು ಅರಣ್ಯ ಪ್ರದೇಶಕ್ಕೆ ಕರೆದೊಯ್ದ ಆತ, ಆಕೆಯ ತಲೆಯನ್ನು ಕಡಿದು, ದೇಹವನ್ನು ಹರಿಯಾಣದ ಅರಣ್ಯ ಪ್ರದೇಶದ ಬಳಿ ಎಸೆದು ಹೋಗಿದ್ದಾಗಿ ಪೊಲೀಸರು ತಿಳಿಸಿದ್ದಾರೆ,(ಏಜೆನ್ಸೀಸ್).