ಬಾಳೆಹಣ್ಣು ಯಾವಾಗಲೂ ಬಾಗಿಯೇ ಇರುವುದು ಏಕೆ? ಇದರ ಹಿಂದಿದೆ ಬೆಳಕು ಮತ್ತು ವಿಜ್ಞಾನದ ರಹಸ್ಯ!

ಬಾಳೆಹಣ್ಣುಗಳು ಯಾವಾಗಲೂ ಬಾಗಿದ ಆಕಾರದಲ್ಲೇ ಕಾಣಿಸಿಕೊಳ್ಳುವುದಕ್ಕೆ ಕಾರಣ ಸೂರ್ಯನ ಬೆಳಕು ಮತ್ತು ಸಸ್ಯಗಳ ಬೆಳವಣಿಗೆಗೆ ನೆರವಾಗುವ ಹಾರ್ಮೋನ್‌ಗಳ ಪ್ರಭಾವವಾಗಿದೆ. ಆರಂಭದಲ್ಲಿ ಬಾಳೆಹಣ್ಣುಗಳು ಇತರ ಹಣ್ಣುಗಳಂತೆ ನೇರವಾಗಿ ಕೆಳಮುಖವಾಗಿ ಬೆಳೆಯುತ್ತವೆ. ಆದರೆ ಬೆಳೆಯುತ್ತಾ ಹೋದಂತೆ ಗುರುತ್ವಾಕರ್ಷಣೆಗೆ ವಿರುದ್ಧವಾಗಿ ಸೂರ್ಯನ ಬೆಳಕಿನ ಕಡೆಗೆ ತಿರುಗುತ್ತವೆ. ಈ ಪ್ರಕ್ರಿಯೆಯನ್ನು ವಿಜ್ಞಾನದಲ್ಲಿ 'ನೆಗೆಟಿವ್ ಜಿಯೋಟ್ರೋಪಿಸಂ' (Negative Geotropism) ಅಥವಾ 'ಫೋಟೋಟ್ರೋಪಿಸಂ' (Phototropism) ಎಂದು ಕರೆಯಲಾಗುತ್ತದೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.

ಸೂರ್ಯನ ಬೆಳಕನ್ನು ಹೆಚ್ಚು ಪಡೆಯುವ ಉದ್ದೇಶದಿಂದ ಬಾಳೆಹಣ್ಣು ತನ್ನ ಬೆಳವಣಿಗೆಯ ದಿಕ್ಕನ್ನು ಬದಲಿಸಿಕೊಳ್ಳುತ್ತದೆ. ಇದರಿಂದ ಹಣ್ಣು ನಿಧಾನವಾಗಿ ಮೇಲ್ಮುಖವಾಗಿ ಬಾಗುತ್ತಾ ಅದರ ವಿಶಿಷ್ಟ ವಕ್ರ ಆಕಾರವನ್ನು ಪಡೆಯುತ್ತದೆ ಎಂದು ವೈಜ್ಞಾನಿಕ ಮಾಹಿತಿ ತಿಳಿಸಿದೆ.

ಬಾಳೆಹಣ್ಣು ಹೂವಿನಿಂದ ರೂಪುಗೊಳ್ಳುವ ಆರಂಭಿಕ ಹಂತದಲ್ಲಿ ಅದು ಸಂಪೂರ್ಣವಾಗಿ ನೇರವಾಗಿ ಕೆಳಮುಖವಾಗಿ ಬೆಳೆಯುತ್ತದೆ. ಈ ಹಂತದಲ್ಲಿ ಅದರ ಆಕಾರದಲ್ಲಿ ಯಾವುದೇ ವಕ್ರತೆ ಇರುವುದಿಲ್ಲ.

ಆದರೆ ಬೆಳವಣಿಗೆ ಮುಂದುವರಿದಂತೆ ಸೂರ್ಯನ ಬೆಳಕಿನತ್ತ ಬೆಳೆಯುವ ಪ್ರಕ್ರಿಯೆ ಆರಂಭವಾಗುತ್ತದೆ. ಇದೇ ಕಾರಣದಿಂದ ಹಣ್ಣಿನ ಆಕಾರದಲ್ಲಿ ಬದಲಾವಣೆ ಕಂಡುಬರುತ್ತದೆ.

ಸಸ್ಯಗಳಲ್ಲಿ 'ಆಕ್ಸಿನ್' (Auxin) ಎಂಬ ಬೆಳವಣಿಗೆಯ ಹಾರ್ಮೋನ್ ಇರುತ್ತದೆ. ಬಾಳೆಹಣ್ಣು ಸೂರ್ಯನ ಬೆಳಕಿನತ್ತ ಬೆಳೆಯಲು ಈ ಹಾರ್ಮೋನ್ ಪ್ರಮುಖ ಪಾತ್ರ ವಹಿಸುತ್ತದೆ.

ಹಣ್ಣಿನ ಮೇಲ್ಭಾಗದಲ್ಲಿ ಬೆಳಕು ಕಡಿಮೆ ಬೀಳುವ ಭಾಗದ ಕೋಶಗಳು ಆಕ್ಸಿನ್ ಪ್ರಭಾವದಿಂದ ವೇಗವಾಗಿ ಬೆಳೆಯುತ್ತವೆ ಮತ್ತು ಉದ್ದವಾಗುತ್ತವೆ. ಕೆಳಭಾಗದ ಕೋಶಗಳಿಗಿಂತ ಮೇಲ್ಭಾಗದ ಕೋಶಗಳ ಬೆಳವಣಿಗೆ ಹೆಚ್ಚು ಆಗುವುದರಿಂದ ಬಾಳೆಹಣ್ಣು ನಿಧಾನವಾಗಿ ಮೇಲ್ಮುಖವಾಗಿ ಬಾಗಲು ಆರಂಭಿಸುತ್ತದೆ ಎಂದು ವಿಜ್ಞಾನಿಗಳು ವಿವರಿಸಿದ್ದಾರೆ.

ಸಾಮಾನ್ಯವಾಗಿ ಹಣ್ಣುಗಳು ಗುರುತ್ವಾಕರ್ಷಣೆಯ ದಿಕ್ಕಿನಲ್ಲಿಯೇ ಬೆಳೆಯುತ್ತವೆ. ಆದರೆ ಬಾಳೆಹಣ್ಣು ಮಾತ್ರ ಸೂರ್ಯನ ಬೆಳಕನ್ನು ಹೆಚ್ಚು ಪಡೆಯುವ ಉದ್ದೇಶದಿಂದ ಗುರುತ್ವಾಕರ್ಷಣೆಯ ವಿರುದ್ಧ ದಿಕ್ಕಿನಲ್ಲಿ ಬೆಳೆಯುತ್ತದೆ.

ಈ ಪ್ರಕ್ರಿಯೆಯನ್ನೇ 'ನೆಗೆಟಿವ್ ಜಿಯೋಟ್ರೋಪಿಸಂ' ಎಂದು ಕರೆಯಲಾಗುತ್ತದೆ. ಇದರ ಪರಿಣಾಮವಾಗಿ ಬಾಳೆಹಣ್ಣು ತನ್ನ ವಿಶಿಷ್ಟ ವಕ್ರ ಆಕಾರವನ್ನು ಪಡೆದುಕೊಳ್ಳುತ್ತದೆ.

ಸಸ್ಯಶಾಸ್ತ್ರದ ಪ್ರಕಾರ ಬಾಳೆಹಣ್ಣು ವಾಸ್ತವವಾಗಿ 'ಬೆರ್ರಿ' (Berry) ವರ್ಗಕ್ಕೆ ಸೇರಿದೆ. ಪೌಷ್ಟಿಕಾಂಶಗಳ ದೃಷ್ಟಿಯಿಂದ ಇದು ಪೊಟ್ಯಾಸಿಯಂ, ವಿಟಮಿನ್ B6 ಮತ್ತು ವಿಟಮಿನ್ C ಸಮೃದ್ಧವಾಗಿರುವ ಹಣ್ಣಾಗಿದೆ.

ಮಾರುಕಟ್ಟೆಯಲ್ಲಿ ಸಾಮಾನ್ಯವಾಗಿ ಕ್ಯಾವೆಂಡಿಷ್ (Cavendish) ತಳಿಯ ಬಾಳೆಹಣ್ಣು ಹೆಚ್ಚು ಕಂಡುಬರುತ್ತದೆ. ಆದರೆ ವಿಶ್ವದಾದ್ಯಂತ ಸಾವಿರಾರು ಬಗೆಯ ಬಾಳೆ ತಳಿಗಳು ಅಸ್ತಿತ್ವದಲ್ಲಿವೆ. ಉತ್ತಮ ಉತ್ಪಾದನೆ ಮತ್ತು ಸಾಗಣೆಯ ಅನುಕೂಲಕ್ಕಾಗಿ ಹಲವು ತಳಿಗಳನ್ನು ಆಯ್ದು ಅಭಿವೃದ್ಧಿಪಡಿಸಲಾಗಿದೆ.

ಬಾಳೆಹಣ್ಣು 'ಎಥಿಲಿನ್' (Ethylene) ಎಂಬ ನೈಸರ್ಗಿಕ ಸಸ್ಯ ಹಾರ್ಮೋನ್ ಅನಿಲವನ್ನು ಹೊರಸೂಸುತ್ತದೆ. ಈ ಅನಿಲದ ಪರಿಣಾಮದಿಂದ ಸೇಬು, ಅವಕಾಡೊ ಸೇರಿದಂತೆ ಇತರ ಹಣ್ಣುಗಳು ಕೂಡ ಬೇಗ ಹಣ್ಣಾಗುತ್ತವೆ ಎಂದು ಅಧ್ಯಯನಗಳು ತಿಳಿಸಿವೆ,(ಏಜೆನ್ಸೀಸ್​​).