ವ್ಯಾಟ್ಸ್ಆ್ಯಪ್ ಸ್ಕ್ಯಾಮ್
- ಹೊಸ ವರ್ಷದ ಶುಭಾಶಯ ಹೆಸರಿನಲ್ಲಿ ಸೈಬರ್ ವಂಚನೆ
- ಶುಭಾಶಯ ಮೆಸೇಜ್ ಕ್ಲಿಕ್ ಮಾಡಿದ್ರೆ ಫೋನ್ ಹ್ಯಾಕ್, ಬ್ಯಾಂಕ್ ಅಕೌಂಟ್ ಖಾಲಿ
- ನ್ಯೂ ಇಯರ್ ಹೊಸ್ತಿಲಲ್ಲಿ ಸೈಬರ್ ವಂಚಕರ ಮಾಸ್ಟರ್ಪ್ಲ್ಯಾನ್
ತೆಲಂಗಾಣ: ಇಡೀ ಜಗತ್ತೇ ಹೊಸ ವರ್ಷವನ್ನು ಸ್ವಾಗತಿಸಲು ತುದಿಗಾಲಿನಲ್ಲಿ ನಿಂತಿದೆ. 2026ಕ್ಕೆ ಒಂದೇ ಒಂದು ದಿನ ಬಾಕಿ ಉಳಿದಿದ್ದು, 'ಹ್ಯಾಪಿ ನ್ಯೂ ಇಯರ್' ಎಂಬ ಸಂದೇಶಗಳ ಸುರಿಮಳೆ ಬಹುತೇಕರ ವ್ಯಾಟ್ಸ್ಆ್ಯಪ್ನಲ್ಲಿ ತುಂಬಿ ಹೋಗಲಿದೆ. ಪ್ರತಿಯೊಬ್ಬರ ಶುಭಾಶಯಕ್ಕೂ ಪ್ರತಿಕ್ರಿಯಿಸುವ ನಾವು, ಗೊತ್ತಿಲ್ಲದೆ ಕಳುಹಿಸಿರುವ ಅನಾಮಧೇಯ ವ್ಯಕ್ತಿಗೂ ಮೊದಲು ಶುಭಕೋರಿ, ಆ ನಂತರ ವಾಪಾಸ್ ನೀವು ಯಾರೆಂದು ಕೇಳುವ ಸನ್ನಿವೇಶಗಳು ಹೆಚ್ಚಿವೆ. ಇದನ್ನೇ ಅಸ್ತ್ರವಾಗಿಸಿಕೊಂಡಿರುವ ಕೆಲ ಸೈಬರ್ ವಂಚಕರು, ಇದೀಗ ಜನರ ಹಣವನ್ನು ದೋಚಲು ಮಾಸ್ಟರ್ಪ್ಲ್ಯಾನ್ ಮಾಡಿಕೊಂಡಿದ್ದಾರೆ.
ಇತ್ತೀಚಿನ ವ್ಯಾಟ್ಸ್ಆ್ಯಪ್ ಸ್ಕ್ಯಾಮ್ ಬೆಳಕಿಗೆ ಬಂದಿದ್ದು, ಈ ಒಂದು ಸಣ್ಣ ಹೊಸ ವರ್ಷದ ಶುಭಾಶಯ ಸಂದೇಶವು ನಿಮ್ಮ ಬ್ಯಾಂಕ್ ಖಾತೆಯನ್ನು ಜೀರೋ ಬ್ಯಾಲೆನ್ಸ್ ಮಾಡಿಡುವುದರಲ್ಲಿ ಅನುಮಾನವೇ ಇಲ್ಲ. ಹ್ಯಾಪಿ ನ್ಯೂ ಇಯರ್ ಎಂಬ ಮೆಸೇಜ್ ಕಳುಹಿಸುವ ಸೈಬರ್ ವಂಚಕರು, ಅದರಲ್ಲಿ ಒಂದು ಲಿಂಕ್ ಕೂಡ ಅಟ್ಯಾಚ್ ಮಾಡಿರುತ್ತಾರೆ. ಮಿಸ್ ಆಗಿ ನೀವೇನಾದರೂ ಅದನ್ನು ಕ್ಲಿಕ್ ಮಾಡಿದ್ರೆ, ಒಟಿಪಿ ಕೇಳದೆ ನಿಮ್ಮ ಬ್ಯಾಂಕ್ ಖಾತೆಯಲ್ಲಿರುವ ಹಣ ಕೆಲವೇ ಕ್ಷಣಗಳಲ್ಲಿ ಶೂನ್ಯವಾಗುತ್ತದೆ.
ಏನಿದು ಸೈಬರ್ ವಂಚನೆ? ಹೇಗೆ ಕೆಲಸ?
ನಿಮ್ಮ ಸ್ನೇಹಿತರು ಅಥವಾ ಸಂಬಂಧಿಕರ ಹೆಸರಿನಲ್ಲಿ ಬರುವ ಈ ಫೇಕ್ ಶುಭಾಶಯದ ವ್ಯಾಟ್ಸ್ಆ್ಯಪ್ ಮೆಸೇಜ್ ಅನ್ನು ಯಾವುದೇ ಕಾರಣಕ್ಕೂ ಕ್ಲಿಕ್ ಮಾಡಬೇಡಿ. APK ಫೈಲ್ನಲ್ಲಿರುವ ಆ ಲಿಂಕ್ ಅನ್ನು ಕ್ಲಿಕ್ ಮಾಡಿದಾಗ, ಅದು ನೇರವಾಗಿ ಒಂದು ವೆಬ್ಸೈಟ್ ತಲುಪಿ, ನಿಮಗೆ ಅಪ್ಲಿಕೇಶನ್ ಡೌನ್ಲೋಡ್ ಮಾಡಿಕೊಳ್ಳಲು ಹೇಳುತ್ತದೆ. ಇದರಲ್ಲಿ ವಿಶೇಷ ಗಿಫ್ಟ್ ಕೂಪನ್ ಬರಲಿದೆ ಎಂದು ತಿಳಿಸಿ, ನಿಮ್ಮನ್ನು ವಂಚನೆಯ ಗುಂಡಿಗೆ ತಳ್ಳುತ್ತದೆ.
ಕ್ಷಣಮಾತ್ರದಲ್ಲಿ ಫೋನ್ ಹ್ಯಾಕ್
ಈ ಮೆಸೇಜ್ ಕ್ಲಿಕ್ ಮಾಡಿದ ಕೆಲವೇ ಕ್ಷಣದಲ್ಲಿ ಎಪಿಕೆ ಫೈಲ್ ಡೌನ್ಲೋಡ್ ಆಗಿ, ನಿಮ್ಮ ಫೋನ್ನಲ್ಲಿ ಮಾಲ್ವೇರ್ ಅಥವಾ ಸ್ಪೈವೇರ್ ಅನ್ನು ಇನ್ಸ್ಟಾಲ್ ಮಾಡುತ್ತದೆ. ಇದಾದ ಕೆಲವೇ ಸೆಕೆಂಡ್ಗಳಲ್ಲಿ ಹ್ಯಾಕರ್ಗಳಿಗೆ ನಿಮ್ಮ ಫೋನ್ ಮೇಲೆ ಸಂಪೂರ್ಣ ನಿಯಂತ್ರಣ ಸಿಗುತ್ತದೆ.
ಡೇಟಾ ಲೂಟಿ
ಈ ಮಾಲ್ವೇರ್ ನಿಮ್ಮ ಕಾಲ್ ಹಿಸ್ಟರಿ, ಕಾಂಟ್ಯಾಕ್ಟ್ಗಳು, ಫೋಟೋಸ್, ವಿಡಿಯೋ ಮತ್ತು ವಿಶೇಷವಾಗಿ ನಿಮ್ಮ ಬ್ಯಾಂಕಿಂಗ್ ಆ್ಯಪ್ನಲ್ಲಿರುವ ಮೂಲ ವಿವರಗಳನ್ನು ಸಂಗ್ರಹಿಸುತ್ತದೆ. ಇದಲ್ಲದೆ, ಹ್ಯಾಕರ್ಗಳು ನಿಮಗೆ ಬಂದ ಒಟಿಪಿಯನ್ನು ನಿಮ್ಮ ಅನುಮತಿ ಇಲ್ಲದೆಯೇ ಬಹಳ ಸುಲಭವಾಗಿ ಕದ್ದು, ಬ್ಯಾಂಕ್ ಖಾತೆಯಲ್ಲಿರುವ ಹಣವನ್ನು ಕದಿಯಬಹುದು.
ಮುನ್ನೆಚ್ಚರಿಕೆ ಏನು?
ಗೊತ್ತಿಲ್ಲದ ಲಿಂಕ್ಗಳು, ಅನ್ಯರ ಹೆಸರಿನಲ್ಲಿ ಬರುವ ನಕಲಿ ಸಂದೇಶಗಳ ಮೇಲೆ ಯಾವುದೇ ಕಾರಣಕ್ಕೂ ಕ್ಲಿಕ್ ಮಾಡಬೇಡಿ. ಶುಭಾಶಯದ ನೆಪದಲ್ಲಿ ಬರುವ ಮೆಸೇಜ್ ಲಿಂಕ್ಗಳ ಮೇಲಂತೂ ಮಿಸ್ ಆಗಿಯೂ ಕ್ಲಿಕ್ ಮಾಡಬೇಡಿ. ಅದು ನಿಮಗೆ ಪರಿಚಯವಿರುವ ವ್ಯಕ್ತಿಯೊಬ್ಬರ ಹೆಸರಿನಿಂದ ಬಂದರೂ ಅಷ್ಟೇ! ಗೂಗಲ್ ಪ್ಲೇ ಸ್ಟೋರ್ ಅಥವಾ ಯಾವುದಾದರೂ ವೆಬ್ಸೈಟ್ನಿಂದ ಬಂದ ಎಪಿಕೆ ಫೈಲ್ಗಳನ್ನು ಎಂದಿಗೂ ಡೌನ್ಲೋಡ್ ಮಾಡಿಕೊಳ್ಳಬೇಡಿ,(ಏಜೆನ್ಸೀಸ್).