ರಾಜ್ಕೋಟ್: ಆಲ್ರೌಂಡರ್ ಡ್ಯಾರಿಲ್ ಮಿಚೆಲ್ ಅದ್ಭುತ ಶತಕ, ವಿಲ್ ಯಂಗ್ ಅರ್ಧಶತಕದ ಬಲದಿಂದ ಇಲ್ಲಿ ನಡೆದ ಭಾರತ ವಿರುದ್ಧದ ಎರಡನೇ ಏಕದಿನ ಪಂದ್ಯದಲ್ಲಿ ನ್ಯೂಜಿಲೆಂಡ್ ತಂಡ ಏಳು ವಿಕೆಟ್ಗಳ ಭರ್ಜರಿ ಜಯ ಸಾಧಿಸುವ ಮೂಲಕ 1-1 ಸರಣಿ ಸಮಬಲ ಸಾಧಿಸಿದೆ.
ಭಾರತ ತಂಡ ನೀಡಿದ್ದ 285 ರನ್ಗಳ ಸ್ಫರ್ಧಾತ್ಮಕ ಬೆನ್ನತ್ತಿದ ನ್ಯೂಜಿಲೆಂಡ್ ತಂಡ 46 ರನ್ ಗಳಿಸುವಷ್ಟರಲ್ಲಿ 2 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿತ್ತು. ಈ ವೇಳೆ ಜೊತೆಯಾದ ಮಿಚೆಲ್ ಮತ್ತು ಯಂಗ್ ಜೋಡಿ 162 ರನ್ಗಳ ಜೊತೆಯಾಟ ನಡೆಸುವ ಮೂಲಕ ಭಾರತದ ಬೌಲರ್ಗಳ ತಾಳ್ಮೆ ಪರೀಕ್ಷಿಸಿದರು. ಅಂತಿಮವಾಗಿ ಯಂಗ್ 87 ರನ್ಗಳಿಗೆ ವಿಕೆಟ್ ಒಪ್ಪಿಸುವ ಮೂಲಕ ಈ ಪಾಲುದಾರಿಕೆಗೆ ತೆರೆಬಿತ್ತು. ಐದನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ಗೆ ಆಗಮಿಸಿದ ಗ್ಲೇನ್ ಪಿಲಿಪ್ಸ್ 25 ಎಸೆತಗಳಲ್ಲಿ 32 ರನ್ ಬಾರಿಸಿ ಸರಣಿ ಸಮಬಲಗೊಳಿಸಿದರು. ಭಾರತ ತಂಡದ ಪರ ಹರ್ಷಿತ್ ರಾಣಾ, ಪ್ರಸಿದ್ಧ ಕೃಷ್ಣ, ಕುಲ್ದೀಪ್ ಯಾದವ್ ತಲಾ ಒಂದೊಂದು ವಿಕೆಟ್ ಪಡೆದರು.
ಭಾರತದ ಇನ್ನಿಂಗ್ಸ್
ಟಾಸ್ ಗೆದ್ದ ಕಿವೀಸ್ ಭಾರತ ತಂಡಕ್ಕೆ ಬ್ಯಾಟಿಂಗ್ಗೆ ಆಹ್ವಾನಿಸಿತು ಆರಂಭಿಕ ಆಟಗಾರರಾದ ರೋಹಿತ್ ಶರ್ಮಾ, ನಾಯಕ ಶುಭಮಾನ್ ಗಿಲ್ ಉತ್ತಮ ಆರಂಭ ನೀಡಿದರೂ ಆ ಜೊತೆಯಾಟವನ್ನು ಮುಂದುವರೆಸಲು ಸಾಧ್ಯವಾಗಲಿಲ್ಲ. ರೋಹಿತ್ 24 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರೆ, ಒನ್ಡೌನ್ ಆಗಿ ಬಂದ ಕಿಂಗ್ ಕೊಹ್ಲಿ ಬಾರಿಸಿದ್ದು 23 ರನ್. ಕಳೆದ ಪಂದ್ಯದ ಕಮ್ ಬ್ಯಾಕ್ ಹೀರೋ ಅಯ್ಯರ್ 8 ರನ್ಗೆ ಪೆವಿಲಿಯನ್ ಸೇರಿಕೊಂಡರು.
ಒಂದೆಡೆ ವಿಕೆಟ್ ಬಿದ್ದರು ಕೂಡ ನಾಯಕ ಗಿಲ್ ಇನ್ನೊಂದು ಬದಿಯಲ್ಲಿ ರನ್ ಗತಿಗೆ ವೇಗ ನೀಡಿದರು, ಇತ್ತ ಕನ್ನಡಿಗ ಕೆ ಎಲ್ ರಾಹುಲ್ ಕೂಡ ಮೊದ ಮೊದಲು ಸ್ಟ್ರೈಕ್ ರೊಟೇಟ್ಗೆ ಆದ್ಯತೆ ನೀಡಿ, ಇನ್ನಿಂಗ್ಸ್ ಕೊನೆಯಲ್ಲಿ ಸ್ಫೋಟಕ ಆಟದ ಮೂಲಕ ಶತಕ ಬಾರಿಸಿ ತಂಡ 285 ರನ್ ಗಳ ಗುರಿ ನೀಡಲು ಕಾರಣರಾದರು. ನ್ಯೂಜಿಲೆಂಡ್ ಪರ ಕ್ಲರ್ಕ್ 3 ವಿಕೆಟ್ ಪಡೆದು ಮಿಂಚಿದರು.