ಡಿಎಂಕೆ ಕೋಟೆಗೆ ಟಿವಿಕೆ ಲಗ್ಗೆ... ವಿಜಯ್​ ಪಾಲಿಗೆ ಒಲಿಯುತ್ತಾ ಮುಖ್ಯಮಂತ್ರಿ ಗದ್ದುಗೆ..? ಶಾಕಿಂಗ್ ಭವಿಷ್ಯ ನುಡಿದ ಆಕ್ಸಿಸ್ ಮೈ ಇಂಡಿಯಾ! | TVK Vijay

ಒಟ್ಟು 234 ಸದಸ್ಯ ಬಲದ ವಿಧಾನಸಭೆಯಲ್ಲಿ ಟಿವಿಕೆ ಪಕ್ಷವು 98–120 ಸ್ಥಾನಗಳನ್ನು ಗೆಲ್ಲುವ ಮೂಲಕ ಡಿಎಂಕೆ ಮೈತ್ರಿಕೂಟಕ್ಕೆ ನೇರ ಪೈಪೋಟಿ ನೀಡಲಿದೆ ಎನ್ನಲಾಗಿದೆ. ಟಿವಿಕೆ ಸುಮಾರು 35% ಮತಗಳನ್ನು ಪಡೆಯುವ ಅಂದಾಜಿದ್ದು, ಇದು ಆಡಳಿತಾರೂಢ ಡಿಎಂಕೆ ಮೈತ್ರಿಕೂಟದ ಮತ ಹಂಚಿಕೆಗೆ (35%) ಸಮನಾಗಿದೆ.

ಡಿಎಂಕೆ ನೇತೃತ್ವದ ಮೈತ್ರಿಕೂಟ 92–110 ಸ್ಥಾನಗಳನ್ನು ಪಡೆಯುವ ನಿರೀಕ್ಷೆಯಿದ್ದರೆ, ಎನ್‌ಡಿಎ ಮೈತ್ರಿಕೂಟ 22–32 ಸ್ಥಾನಗಳಿಗೆ ತೃಪ್ತಿಪಡುವ ಸಾಧ್ಯತೆಯಿದೆ. ಎಐಎಡಿಎಂಕೆ-ಬಿಜೆಪಿ ಮೈತ್ರಿಕೂಟದ ಮತ ಹಂಚಿಕೆ ಸುಮಾರು 23% ಕ್ಕೆ ಕುಸಿಯುವ ಮುನ್ಸೂಚನೆ ಇದೆ. ಟಿವಿಕೆ ಪಕ್ಷದ ಈ ಅಭೂತಪೂರ್ವ ಏಳಿಗೆಗೆ ಯುವ ಮತದಾರರ ಬೆಂಬಲವೇ ಪ್ರಮುಖ ಕಾರಣವಾಗಿದ್ದು, ವರ್ಷದ ಬಾರಿಗೆ ಮತ ಚಲಾಯಿಸಿದವರಲ್ಲಿ ಶೇ. 68 ರಷ್ಟು ಮಂದಿ ವಿಜಯ್ ಪರವಾಗಿ ನಿಂತಿದ್ದಾರೆ ಎನ್ನಲಾಗಿದ್ದು, 20-29 ವರ್ಷದವರು ಶೇ. 59 ಮತ್ತು 30-39 ವರ್ಷದ ಶೇ. 45 ರಷ್ಟು ಮತದಾರರು ಟಿವಿಕೆಯನ್ನು ಬೆಂಬಲಿಸಿದ್ದಾರೆ ಎಂದು ಭವಿಷ್ಯ ನುಡಿದಿದೆ.

ರಾಜ್ಯದ ಮುಂದಿನ ಮುಖ್ಯಮಂತ್ರಿಯಾಗಿ ಜನರ ಮೊದಲ ಆಯ್ಕೆಯಾಗಿ ವಿಜಯ್ ಹೊರಹೊಮ್ಮಿದ್ದು, ಆಕ್ಸಿಸ್ ಮೈ ಇಂಡಿಯಾ ಪ್ರಕಾರ, ವಿಜಯ್​ಗೆ 37% ಬೆಂಬಲ ವ್ಯಕ್ತವಾಗಿದೆ, ಹಾಲಿ ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ (35%) ಅವರಿಗಿಂತ ವಿಜಯ್​ ಸ್ವಲ್ಪ ಮುಂದಿದ್ದಾರೆ.

ಪೋಲ್‌ಸ್ಟರ್ ಪ್ರದೀಪ್ ಗುಪ್ತಾ ವಿಜಯ್​ರ ರಾಜಕೀಯ ಏಳಿಗೆಯನ್ನು ತಮಿಳುನಾಡಿನ ಎಂಜಿಆರ್ ಮತ್ತು ಆಂಧ್ರಪ್ರದೇಶದ ಎನ್.ಟಿ. ರಾಮರಾವ್ ಅವರ ಉದಯಕ್ಕೆ ಹೋಲಿಸಿದ್ದಾರೆ. ಒಂದು ವೇಳೆ ಈ ಮುನ್ಸೂಚನೆಗಳು ನಿಜವಾದರೆ, ಟಿವಿಕೆ ತಮಿಳುನಾಡಿನ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಲಿದ್ದು, ಕಿಂಗ್‌ಮೇಕರ್ ಪಾತ್ರ ನಿರ್ವಹಿಸುವ ಅಥವಾ ಸುದೀರ್ಘ ರಾಜಕೀಯ ಶಕ್ತಿಯಾಗಿ ಸ್ಥಾಪಿತವಾಗುವ ಎಲ್ಲ ಲಕ್ಷಣಗಳು ಕಂಡುಬರುತ್ತಿವೆ(ಏಜೆನ್ಸೀಸ್​​).