ಸಿಎಂ ವಿಜಯ್ ಯು-ಟರ್ನ್​! ವಿಶೇಷ ಅಧಿಕಾರಿ ಸ್ಥಾನದಿಂದ 'ರಾಜಗುರು'ಗೆ ಗೇಟ್​ಪಾಸ್​; ಅಷ್ಟಕ್ಕೂ ಯಾರೀ ರಾಧನ್​ ಪಂಡಿತ್​?

ಚೆನ್ನೈ: ತಮಿಳುನಾಡು ರಾಜಕೀಯದಲ್ಲಿ ಸೃಷ್ಟಿಯಾಗಿರುವ ಹೊಸದೊಂದು ಸಂಚಲನ ಸದ್ಯ ದೇಶದ ರಾಜಕೀಯ ವಲಯದಲ್ಲಿ ಭಾರೀ ಸದ್ದು ಮಾಡುತ್ತಿದೆ. ಸಿ.ಜೋಸೆಫ್​ ವಿಜಯ್​ ಅವರದ್ದು ಸುನಾಮಿ ಜಾತಕ, ಖಂಡಿತ ಈ ಬಾರಿಯ ಚುನಾವಣೆಯಲ್ಲಿ ಅವರಿಗೆ 100ಕ್ಕೂ ಅಧಿಕ ಕ್ಷೇತ್ರಗಳಲ್ಲಿ ಗೆಲುವು ಸಿಗಲಿದೆ ಎಂದು ಸ್ಪೋಟಕ ಭವಿಷ್ಯ ನುಡಿದಿದ್ದ ರಿಕ್ಕಿ ರಾಧನ್​ ಪಂಡಿತ್​ಗೆ ಸಿಎಂ ವಿಜಯ್​ ತಮ್ಮ ಸರ್ಕಾರದಲ್ಲಿ ವಿಶೇಷ ಕರ್ತವ್ಯ ಅಧಿಕಾರಿ ಸ್ಥಾನ ನೀಡಿದ್ದರು. ಇದು ಭಾರೀ ಚರ್ಚೆ ಹಾಗೂ ಟೀಕೆಗಳನ್ನು ಸ್ವೀಕರಿಸುತ್ತಿದ್ದಂತೆ ಇದೀಗ ವಿಜಯ್​ ದಿಢೀರ್​ ಉಲ್ಟಾ ಹೊಡೆದಿದ್ದಾರೆ.

ಚೊಚ್ಚಲ ಚುನಾವಣೆಯಲ್ಲಿ ಅಭೂತಪೂರ್ವ ಗೆಲುವು ದಾಖಲಿಸಿದ ಸಿಎಂ ಸಿ. ಜೋಸೆಫ್ ವಿಜಯ್, ತಮ್ಮ ಪಕ್ಷ ಗೆಲ್ಲುತ್ತದೆ ಎಂದು ಭವಿಷ್ಯ ನುಡಿದ ಖ್ಯಾತ ಜ್ಯೋತಿಷಿ ಮತ್ತು ಸಲಹೆಗಾರ ರಿಕ್ಕಿ ರಾಧನ್ ಪಂಡಿತ್ ವೆಟ್ರಿವೆಲ್ ಅವರಿಗೆ ಸಿಎಂ ಕಚೇರಿಯ ವಿಶೇಷ ಕರ್ತವ್ಯ ಅಧಿಕಾರಿ (OSD) ಹುದ್ದೆಯನ್ನು ನೀಡುವ ಮೂಲಕ ಭಾರೀ ಟೀಕೆಗಳಿಗೆ ಗುರಿಯಾದರು. ಇಂದಿನ (ಮೇ.13) ಸಭೆಯಲ್ಲಿ ವಿಶ್ವಾಸಮತಯಾಚನೆ ವೇಳೆ ಸರ್ಕಾರದ ವಿರುದ್ಧ ಭಾರೀ ವಿರೋಧಗಳು ಕೇಳಿಬರುತ್ತಿದ್ದಂತೆ ವಿಜಯ್​ ತಮ್ಮ ನಿರ್ಧಾರವನ್ನು ಬದಲಿಸಿದ್ದಾರೆ.

ಪ್ರಮುಖ ಮಿತ್ರ ಪಕ್ಷವಾದ ವಿದುತಲೈ ಚಿರುತೈಗಲ್ ಕಚ್ಚಿಯಿಂದ ಪ್ರತಿಭಟನೆ ಜೋರಾದ ಬೆನ್ನಲ್ಲೇ ರಾಧನ್​ ಪಂಡಿತ್​ರನ್ನು ಅಧಿಕಾರಿ ಸ್ಥಾನದಿಂದ ವಿಜಯ್​ ಕೆಳಗಿಳಿಸಿದ್ದಾರೆ. ಇದು ತಕ್ಷಣಕ್ಕೆ ಜಾರಿಗೆ ಬರುವಂತೆ ಹೇಳಿದ್ದಾರೆ. ತಮಗೆ ಆಪ್ತರು ಹಾಗೂ ಸಲಹೆಗಾರರು ಎಂಬ ಒಂದು ಕಾರಣಕ್ಕೆ ಜೋತಿಷಿಯೊಬ್ಬರಿಗೆ ಹೇಗೆ ವಿಜಯ್​ ಅಧಿಕಾರ ಹಂಚಿಕೆ ಮಾಡಿದರು. ಇದನ್ನು ನಾವ್ಯಾರೂ ಒಪ್ಪುವುದಿಲ್ಲ ಎಂದು ಮಿತ್ರ ಪಕ್ಷಗಳು ವಿರೋಧ ವ್ಯಕ್ತಪಡಿಸಿದ ಬೆನ್ನಲ್ಲೇ ಸಿಎಂ ರಾಧನ್​ ಅವರಿಗೆ ನೀಡಿದ್ದ ವಿಶೇಷ ಅಧಿಕಾರವನ್ನು ಹಿಂಪಡೆದಿದ್ದಾರೆ.