ನವದೆಹಲಿ: ಭಾರತೀಯ ರೈಲ್ವೆಯ ಮತ್ತೊಂದು ಮೈಲುಗಲ್ಲು ಸಾಧನೆಯಾಗಿ, ವಂದೇ ಭಾರತ್ ಸ್ಲೀಪರ್ ರೈಲು ಇತ್ತೀಚಿನ ಪರೀಕ್ಷೆಯಲ್ಲಿ ಗಂಟೆಗೆ 180 ಕಿಲೋಮೀಟರ್ ವೇಗವನ್ನು ತಲುಪಿದೆ. ಕೋಟಾ-ನಾಗ್ಡಾ ವಿಭಾಗದಲ್ಲಿ ನಡೆದ ಈ ಹೈ-ಸ್ಪೀಡ್ ಟ್ರಯಲ್ನಲ್ಲಿ ರೈಲು ಸಂಪೂರ್ಣ ಸ್ಥಿರತೆಯನ್ನು ತೋರಿಸಿದ್ದು, ವೀಡಿಯೊದಲ್ಲಿ ಕಾಣಿಸಿಕೊಂಡ 'ವಾಟರ್ ಟೆಸ್ಟ್' ಎಲ್ಲರ ಗಮನ ಸೆಳೆದಿದೆ.
ಹೌದು, ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಅವರು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡ ವೀಡಿಯೊದಲ್ಲಿ, ರೈಲು 180 ಕಿ.ಮೀ. ವೇಗದಲ್ಲಿರುವಾಗ ನೀರಿನಿಂದ ತುಂಬಿದ ಗ್ಲಾಸ್ಗಳನ್ನು ಒಂದರ ಮೇಲೊಂದು ಇರಿಸಿ ಪರೀಕ್ಷಿಸಲಾಗಿದೆ. ಆದರೂ ಒಂದು ಹನಿ ನೀರು ಕೂಡ ಚೆಲ್ಲದೇ ಸಂಪೂರ್ಣ ಸ್ಥಿರವಾಗಿ ಉಳಿದಿರುವುದು ರೈಲಿನ ಅತ್ಯಾಧುನಿಕ ತಂತ್ರಜ್ಞಾನ ಮತ್ತು ಸಸ್ಪೆನ್ಷನ್ ವ್ಯವಸ್ಥೆಯನ್ನು ಪ್ರತಿಬಿಂಬಿಸುತ್ತದೆ. "ರೈಲ್ವೆ ಸುರಕ್ಷತಾ ಆಯುಕ್ತರ ಮೇಲ್ವಿಚಾರಣೆಯಲ್ಲಿ ವಂದೇ ಭಾರತ್ ಸ್ಲೀಪರ್ ಪರೀಕ್ಷೆ ನಡೆಸಲಾಗಿದೆ. ಇದು ಕೋಟಾ-ನಾಗ್ಡಾ ವಿಭಾಗದಲ್ಲಿ 180 ಕಿ.ಮೀ. ವೇಗ ತಲುಪಿತು. ನಮ್ಮ ಸ್ವಂತ ವಾಟರ್ ಟೆಸ್ಟ್ ಈ ಹೊಸ ಪೀಳಿಗೆಯ ರೈಲಿನ ತಾಂತ್ರಿಕ ವೈಶಿಷ್ಟ್ಯಗಳನ್ನು ತೋರಿಸಿದೆ" ಎಂದು ಸಚಿವರು ಪೋಸ್ಟ್ನಲ್ಲಿ ಉಲ್ಲೇಖಿಸಿದ್ದಾರೆ.
ವಂದೇ ಭಾರತ್ನಲ್ಲಿ ಏನೆಲ್ಲಾ ಸೌಲಭ್ಯ..!
ವಂದೇ ಭಾರತ್ ಸ್ಲೀಪರ್ ರೈಲು ದೀರ್ಘದೂರ ರಾತ್ರಿ ಪ್ರಯಾಣಕ್ಕಾಗಿ ವಿನ್ಯಾಸಗೊಳಿಸಲಾಗಿದ್ದು, ಸಂಪೂರ್ಣ ವಾತಾನುಕೂಲಿತ ಕೋಚ್ಗಳು, ಅಲ್ಟ್ರಾ-ಕಂಫರ್ಟಬಲ್ ಬರ್ತ್ಗಳು, ಆಟೋಮ್ಯಾಟಿಕ್ ಬಾಗಿಲುಗಳು, ಆನ್ಬೋರ್ಡ್ ವೈಫೈ ಮತ್ತು ವಿಮಾನದಂತಹ ಡಿಸೈನ್ ಹೊಂದಿದೆ. ಬಿಇಎಂಎಲ್ ನಿಂದ ತಯಾರಿಸಲಾದ ಈ ರೈಲಿನ ಪ್ರೋಟೋಟೈಪ್ಗಳು 16 ಕೋಚ್ಗಳನ್ನು ಹೊಂದಿದ್ದು, ಎಸಿ ಫಸ್ಟ್ ಕ್ಲಾಸ್, ಎಸಿ 2-ಟೈಯರ್ ಮತ್ತು ಎಸಿ 3-ಟೈಯರ್ ಸೌಲಭ್ಯಗಳನ್ನು ಒದಗಿಸುತ್ತವೆ.
ಕಾರ್ಯಾಚರಣೆಯಲ್ಲಿ 160 ಕಿ.ಮೀ. ವೇಗಕ್ಕೆ ಸೀಮಿತವಾಗಿರುವುದಾದರೂ, ಪರೀಕ್ಷೆಯಲ್ಲಿ 180 ಕಿ.ಮೀ. ತಲುಪುವುದು ಸುರಕ್ಷತೆ ಮತ್ತು ಸ್ಥಿರತೆಯನ್ನು ಖಾತರಿಪಡಿಸುತ್ತದೆ.ಈ ಯಶಸ್ವಿ ಪರೀಕ್ಷೆಯೊಂದಿಗೆ ವಂದೇ ಭಾರತ್ ಸ್ಲೀಪರ್ ರೈಲು ಶೀಘ್ರದಲ್ಲೇ ಪ್ರಯಾಣಿಕ ಸೇವೆಗೆ ಸಿದ್ಧವಾಗಲಿದೆ. ಭಾರತೀಯ ರೈಲ್ವೆ ದೀರ್ಘದೂರ ಪ್ರಯಾಣವನ್ನು ಕ್ರಾಂತಿಗೊಳಿಸುವ ನಿಟ್ಟಿನಲ್ಲಿ 200ಕ್ಕೂ ಹೆಚ್ಚು ಅಂತಹ ರೈಲುಗಳನ್ನು ಪರಿಚಯಿಸಲು ಯೋಜಿಸಿದೆ,(ಏಜೆನ್ಸೀಸ್).