ಕೋಲ್ಕತ್ತಾ: ಶತ್ರು ದೇಶ ಪಾಕಿಸ್ಥಾನ ಕೋಲ್ಕತ್ತಾ ಮೇಲೆ ದಾಳಿ ಮಾಡುವ ಬೆದರಿಕೆಯ ಹಾಕಿದ್ರೂ ಪ್ರಧಾನಿ ನರೇಂದ್ರ ಮೋದಿಯವರು ಏನೂ ಮಾತನಾಡ್ತಿಲ್ಲ ಮೌನವಾಗಿದ್ದಾರೆ, ಕೂಡಲೇ ಅವರು ರಾಜೀನಾಮೆ ನೀಡಲಿ ಎಂದು ಸಿಎಂ ಮಮತಾ ಬ್ಯಾನರ್ಜಿ ವಾಗ್ದಾಳಿ ನಡೆಸಿದ್ದಾರೆ.
ನಾಡಿಯಾದಲ್ಲಿ ನಡೆದ ಚುನಾವಣಾ ಪ್ರಚಾರದಲ್ಲಿ ಮಾತನಾಡಿರುವ ಅವರು, ಪಾಕಿಸ್ತಾನದ ರಕ್ಷಣಾ ಸಚಿವ ಖವಾಜಾ ಆಸಿಫ್ ಕೋಲ್ಕತ್ತಾದ ಮೇಲೆ ಮಿಲಿಟರಿ ದಾಳಿ ನಡೆಸುವುದಾಗಿ ಬಹಿರಂಗವಾಗಿ ಬೆದರಿಕೆ ಹಾಕಿದ್ದಾರೆ. ವಿದೇಶಿ ಶತ್ರುವೊಂದು ಭಾರತೀಯ ನಗರ ಮತ್ತು ಭಾರತೀಯರ ಜೀವಗಳಿಗೆ ಬೆದರಿಕೆ ಹಾಕಿದ್ದರೂ ಪ್ರಧಾನಿ ಮೋದಿ, ಅಮಿತ್ ಶಾ ಹಾಗೂ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಮೌನವಾಗಿದ್ದಾರೆ.
ಒಂದೇ ಒಂದು ಖಂಡನೆಯ ಶಬ್ದವೂ ಇಲ್ಲ. ಒಂದೇ ಒಂದು ದೃಢಸಂಕಲ್ಪದ ಹೇಳಿಕೆಯೂ ಇಲ್ಲ. ಈ ನಾಚಿಕೆಗೇಡಿನ ಕಾರ್ಯತಂತ್ರದ ಮೌನ ಏಕೆ? ಅವರು ಮತಗಳಿಗಾಗಿ ಎಷ್ಟು ಹತಾಶರಾಗಿದ್ದಾರೆಂದರೆ, ನಂತರ ಅದನ್ನು ಬಳಸಿಕೊಳ್ಳಲು ಬಂಗಾಳದ ಮಣ್ಣಿಗೆ ಅಪಾಯವನ್ನು ಆಹ್ವಾನಿಸಲು ಸಿದ್ಧರಿದ್ದಾರೆಯೇ? ಇದಕ್ಕೆ ಬಂಗಾಳ ಉತ್ತರ ಬಯಸುತ್ತದೆ ಎಂದು ಹೇಳಿದ್ದಾರೆ.
ಮುಂದುವರೆದು, ಕೋಲ್ಕತ್ತಾದಲ್ಲಿ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರ ರ್ಯಾಲಿಯ ಸಂದರ್ಭದಲ್ಲಿ ನಡೆದ ಅಶಾಂತಿಯನ್ನು ಭಾರತೀಯ ಜನತಾ ಪಕ್ಷದ (ಬಿಜೆಪಿ) ಪಾವತಿಸಿದ ಗೂಂಡಾಗಳು ಸೃಷ್ಟಿಸಿದ್ದಾರೆ ಎಂದು ಆರೋಪಿಸಿದ್ದು, ಭಬಾನಿಪುರದ ಬಿಜೆಪಿ ಬೆಂಬಲಿಗರು ರ್ಯಾಲಿಯಲ್ಲಿ ಅಷ್ಟೇನೂ ಇರಲಿಲ್ಲ. ಮಿಡ್ನಾಪುರದ ಜನರನ್ನು 500 ರೂ. ಕೊಟ್ಟು ರ್ಯಾಲಿಗೆ ಕರೆತರಲಾಗಿದೆ ಎಂದು ನಾನು ಕೇಳಿದ್ದೇನೆ. ನನ್ನ ಕ್ಷೇತ್ರದಲ್ಲಿ 40000 ಮತದಾರರ ಹೆಸರನ್ನು ಅಳಿಸಲಾಗಿದೆ. ಅದರ ಬಗ್ಗೆ ಚಿಂತೆ ಇಲ್ಲ, ನಾನು ಗೆಲ್ಲುತ್ತೇನೆ ಎಂದಿದ್ದಾರೆ (ಏಜೆನ್ಸೀಸ್).