ಭವಾನಿಪುರದಲ್ಲಿ ಭಾರೀ ಅಂತರದ ಸೋಲು! ಮಮತಾ ದರ್ಬಾರ್ ಅಂತ್ಯಕ್ಕೆ ಈ ಎಡವಟ್ಟುಗಳೇ ಪ್ರಮುಖ ಕಾರಣ

ಕೋಲ್ಕತ: ಸತತ ಮೂರು ಬಾರಿ ಪಶ್ಚಿಮ ಬಂಗಾಳದಲ್ಲಿ ಮುಖ್ಯಮಂತ್ರಿ ಗದ್ದುಗೆ ಏರಿದ್ದ ಮಮತಾ ಬ್ಯಾನರ್ಜಿ, ನಾಲ್ಕನೇ ಬಾರಿಯೂ ನಾನೇ ಸಿಎಂ ಎಂಬ ಆಸೆಗೆ ಬಿಜೆಪಿ ತಣ್ಣೀರೆರಚಿದೆ. ಬಂಗಾಳದಲ್ಲಿ ಕೇಸರಿ ಬಾವುಟ ಹಾರಿಸುವ ದಶಕಗಳ ಕಾಲದ ಬಿಜೆಪಿ ಕನಸು 2026ರಲ್ಲಿ ನನಸಾಗಿದ್ದು, ಕಳೆದ 15 ವರ್ಷಗಳಿಂದ ಆಡಳಿತ ನಡೆಸಿದ್ದ ಮಮತಾ ಬ್ಯಾನರ್ಜಿ ನೇತೃತ್ವದ ಟಿಎಂಸಿ ಸರ್ಕಾರದ ಅಧಿಕಾರ ಅಂತ್ಯಗೊಂಡಿದೆ.

ಭವಾನಿಪುರ ಕ್ಷೇತ್ರದಲ್ಲಿ ಬಿಜೆಪಿ ನಾಯಕ ಸುವೇಂದು ಅಧಿಕಾರಿ ವಿರುದ್ಧ ಕಣಕ್ಕೆ ಇಳಿದಿದ್ದ ಸಿಎಂ ಮಮತಾ ಬ್ಯಾನರ್ಜಿ 15,105 ಮತಗಳ ಅಂತದಿಂದ ಸೋಲು ಕಂಡಿದ್ದು, ಭಾರಿ ಮುಖಭಂಗ ಅನುಭವಿಸಿದ್ದಾರೆ. 294 ಕ್ಷೇತ್ರಗಳ ಪೈಕಿ 200ಕ್ಕೂ ಅಧಿಕ ಕ್ಷೇತ್ರಗಳನ್ನು ಗೆದ್ದಿರುವ ಬಿಜೆಪಿ, ಸ್ಪಷ್ಟ ಬಹುಮತದೊಂದಿಗೆ ಸರ್ಕಾರ ರಚಿಸಲು ಮುಂದಾಗಿದೆ. ಚುನಾವಣೆಗೂ ಮೊದಲೇ ಗಟ್ಟಿಯಾಗಿ ನುಡಿದಿದ್ದ ಕಮಲ ಪಡೆ, ಬಂಗಾಳದಲ್ಲಿ ದೀದಿ ಅಧಿಕಾರದ ಯುಗಾಂತ್ಯ ಖಚಿತ ಎಂದಿತ್ತು. ಇದಕ್ಕೆ ತಿರುಗೇಟು ನೀಡಿದ್ದ ಬ್ಯಾನರ್ಜಿ ತಮ್ಮ ಸರ್ಕಾರವನ್ನು ಅಲುಗಾಡಿಸಲು ಸಾಧ್ಯವಿಲ್ಲ ಎಂದು ಗುಡುಗಿದ್ದು ಈಗ ನೆನಪಿಸಿಕೊಳ್ಳಬಹುದು. 

ಚುನಾವಣೆಗೆ ಬಿಜೆಪಿ ಒಂದು ವರ್ಷ ಮುಂಚಿತವಾಗಿಯೇ ಪೂರ್ವತಯಾರಿ ನಡೆಸಿತ್ತು. ಕಳೆದ ಚುನಾವಣೆಯಲ್ಲಿ 77 ಕ್ಷೇತ್ರಗಳನ್ನು ಗೆಲ್ಲುವ ಮೂಲಕ ವಿರೋಧ ಪಕ್ಷದ ಸ್ಥಾನದಲ್ಲಿದ್ದ ಕೇಸರಿ ಪಡೆ, ಈ ಬಾರಿ ಟಿಎಂಸಿ ಸರ್ಕಾರದ ನೂನ್ಯತೆಗಳನ್ನು ಜನರ ಮುಂದೆ ಬಹಿರಂಗಪಡಿಸಿದ್ದಲ್ಲದೆ, ಸೋನಾ ಬಾಂಗ್ಲಾ (ಬಂಗಾರದ ಬಂಗಾಳ) ಎಂಬ ಪರಿಕಲ್ಪನೆಯನ್ನು ಜನರ ಮುಂದಿಟ್ಟು, ಕಾನೂನು ಸುವ್ಯವಸ್ಥೆ ಕಾಪಾಡುವುದು, ಮಹಿಳೆಯರ ರಕ್ಷಣೆ, ಅಭಿವೃದ್ಧಿ ಹಾಗೂ ನಿರುದ್ಯೋಗಿ ಯುವಕರಿಗೆ, ಮಹಿಳೆಯರಿಗೆ ಮಾಸಿಕವಾಗಿ 3000 ರೂ. ನೀಡುವ ಭರವಸೆ ಕೊಟ್ಟಿತ್ತು. ರಾಜ್ಯದಲ್ಲಿ ಬಿಜೆಪಿ ಅಧಿಕಾರಕ್ಕೆ ಬಂದರೆ, ಟಿಎಂಸಿ ಗೂಂಡಾಗಳು ಜೈಲು ಸೇರಲಿದ್ದಾರೆ. ಜನರು ನೆಮ್ಮದಿಯ ನಿಟ್ಟುಸಿರು ಬಿಡಬಹುದು. ಅಭಿವೃದ್ಧಿಯೂ ಆಗಲಿದೆ ಎಂಬ ಆಶ್ವಾಸನೆ ನೀಡಿತ್ತು.