ಬೆಂಗಳೂರು: ಜಾಗತಿಕ ಮಾರುಕಟ್ಟೆಯಲ್ಲಿ ಸುರಕ್ಷಿತ ಹೂಡಿಕೆಯ ಬೇಡಿಕೆ (Safe-haven demand) ಹೆಚ್ಚಾದ ಬೆನ್ನಲ್ಲೇ, ಚಿನ್ನದ ಬೆಲೆ ಸೋಮವಾರ(ಜ.26) ಹೊಸ ಇತಿಹಾಸ ಬರೆದಿದೆ. ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಪ್ರತಿ ಔನ್ಸ್(31.1 ಗ್ರಾಂ) ಚಿನ್ನದ ಬೆಲೆ ಇದೇ ಮೊದಲ ಬಾರಿಗೆ 5,000 ಡಾಲರ್ (ಅಂದಾಜು 4.15 ಲಕ್ಷ ರೂ.) ಗಡಿಯನ್ನು ದಾಟಿದೆ.
ರಾಯಿಟರ್ಸ್ ವರದಿಯ ಪ್ರಕಾರ, ಸೋಮವಾರ ಬೆಳಗಿನ ವಹಿವಾಟಿನಲ್ಲಿ ಸ್ಪಾಟ್ ಗೋಲ್ಡ್ ಬೆಲೆ ಶೇ. 1.98 ರಷ್ಟು ಏರಿಕೆಯಾಗಿ ಪ್ರತಿ ಔನ್ಸ್ ಗೆ 5,081.18 ಡಾಲರ್ ತಲುಪಿದೆ. ವಹಿವಾಟಿನ ಒಂದು ಹಂತದಲ್ಲಿ ಇದು 5,092.71 ಡಾಲರ್ ವರೆಗೂ ಜಿಗಿದಿತ್ತು. ಅಮೆರಿಕದ ಫೆಬ್ರವರಿ ಗೋಲ್ಡ್ ಫ್ಯೂಚರ್ಸ್ ಕೂಡ ಶೇ. 2.01 ರಷ್ಟು ಏರಿಕೆ ಕಂಡು 5,079.30 ಡಾಲರ್ ತಲುಪಿದೆ.
ಬೆಲೆ ಏರಿಕೆಗೆ ಪ್ರಮುಖ ಕಾರಣಗಳೇನು?
ಟ್ರಂಪ್ ಅವರ ಸುಂಕದ ಬೆದರಿಕೆ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಕೆನಡಾ ಮೇಲೆ ಶೇ. 100 ರಷ್ಟು ಮತ್ತು ಫ್ರೆಂಚ್ ವೈನ್ ಮೇಲೆ ಶೇ. 200 ರಷ್ಟು ಸುಂಕ ಹೇರುವುದಾಗಿ ನೀಡಿರುವ ಎಚ್ಚರಿಕೆ ಮಾರುಕಟ್ಟೆಯಲ್ಲಿ ತಲ್ಲಣ ಮೂಡಿಸಿದೆ.
ಜಾಗತಿಕ ಅಸ್ಥಿರತೆ: ರಷ್ಯಾ-ಉಕ್ರೇನ್ ಸಂಘರ್ಷ, ಇಸ್ರೇಲ್-ಇರಾನ್ ನಡುವಿನ ಉದ್ವಿಗ್ನತೆ ಮತ್ತು ವೆನೆಜುವೆಲಾದಲ್ಲಿನ ಮಿಲಿಟರಿ ಹಸ್ತಕ್ಷೇಪದಂತಹ ವಿದ್ಯಮಾನಗಳು ಹೂಡಿಕೆದಾರರನ್ನು ಸುರಕ್ಷಿತ ಹೂಡಿಕೆಯಾದ ಚಿನ್ನದತ್ತ ಸೆಳೆಯುತ್ತಿವೆ.
ಕುಸಿಯುತ್ತಿರುವ ಡಾಲರ್ ಮೌಲ್ಯ: ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಅಮೆರಿಕದ ಡಾಲರ್ ಮೌಲ್ಯ ಕುಸಿಯುತ್ತಿರುವುದು ಚಿನ್ನದ ಖರೀದಿಗೆ ಮತ್ತಷ್ಟು ಬಲ ನೀಡಿದೆ.
ಕೇಂದ್ರೀಯ ಬ್ಯಾಂಕ್ಗಳ ಖರೀದಿ: ವಿವಿಧ ದೇಶಗಳ ಕೇಂದ್ರೀಯ ಬ್ಯಾಂಕ್ಗಳು ಮತ್ತು ದೊಡ್ಡ ಹೂಡಿಕೆದಾರರು ಚಿನ್ನದ ಮೇಲೆ ಹೆಚ್ಚಿನ ಒತ್ತು ನೀಡುತ್ತಿದ್ದಾರೆ.
ಮುಂಬರುವ ಗುರಿ ಎಷ್ಟು? (Price Target)
ಚಿನ್ನದ ಬೆಲೆ ಮುಂದಿನ ದಿನಗಳಲ್ಲಿ ಮತ್ತಷ್ಟು ಏರಿಕೆಯಾಗಲಿದೆ ಎಂದು ಮಾರುಕಟ್ಟೆ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಈ ಹೂಡಿಕೆ ಸಂಸ್ಥೆಯು 2026ರ ಡಿಸೆಂಬರ್ ವೇಳೆಗೆ ಚಿನ್ನದ ಬೆಲೆ 5,400 ಡಾಲರ್ ತಲುಪಬಹುದು ಎಂದು ಅಂದಾಜಿಸಿದೆ.ಈ ವರ್ಷದ ಅಂತ್ಯದ ವೇಳೆಗೆ ಬೆಲೆ 5,500 ಡಾಲರ್ ತಲುಪುವ ಸಾಧ್ಯತೆಯಿದೆ ಎಂದು ಹೇಳಿದೆ. 'ರಿಚ್ ಡ್ಯಾಡ್ ಪೂರ್ ಡ್ಯಾಡ್' ಖ್ಯಾತಿಯ ಲೇಖಕ ರೋಬರ್ಟ್ ಕಿಯೋಸಾಕಿ ಅವರು ಭವಿಷ್ಯದಲ್ಲಿ ಚಿನ್ನದ ಬೆಲೆ 27,000 ಡಾಲರ್ ಮುಟ್ಟಬಹುದು ಎಂಬ ಅಚ್ಚರಿಯ ಭವಿಷ್ಯ ನುಡಿದಿದ್ದಾರೆ.
ಭಾರತದ ಮೇಲೆ ಪ್ರಭಾವ
ಭಾರತದಲ್ಲಿ ಇಂದು ಗಣರಾಜ್ಯೋತ್ಸವದ ನಿಮಿತ್ತ ಮಾರುಕಟ್ಟೆಗೆ ರಜೆ ಇರುವುದರಿಂದ ಎಂಸಿಎಕ್ಸ್ (MCX) ವಹಿವಾಟು ಸ್ಥಗಿತಗೊಂಡಿದೆ. ಆದರೆ, ಜಾಗತಿಕ ಮಾರುಕಟ್ಟೆಯ ಈ ಭಾರಿ ಏರಿಕೆಯು ನಾಳೆ (ಜನವರಿ 27) ಭಾರತೀಯ ಮಾರುಕಟ್ಟೆ ಆರಂಭವಾದಾಗ ಪ್ರತಿಫಲಿಸಲಿದ್ದು, ಸ್ಥಳೀಯ ಚಿನ್ನದ ಬೆಲೆಯಲ್ಲೂ ಭಾರಿ ಏರಿಕೆಯಾಗುವ ಸಾಧ್ಯತೆಯಿದೆ,(ಏಜೆನ್ಸೀಸ್).