ಪುಟ್ಟ ದ್ವೀಪದ ಅಚ್ಚರಿಗಳು

ಜನಸಂಖ್ಯೆ ಮತ್ತು ವಿಸ್ತೀರ್ಣ ಎರಡರ ದೃಷ್ಟಿಯಿಂದಲೂ ಸೀಶೆಲ್ಸ್​ ಆಫ್ರಿಕಾ ಖಂಡದ ಅತ್ಯಂತ ಚಿಕ್ಕ ಸಾರ್ವಭೌಮ ದೇಶವಾಗಿದೆ.

ಹಿಂದೂ ಮಹಾಸಾಗರದಲ್ಲಿರುವ ಸಣ್ಣ ದ್ವೀಪ ಸೀಶೆಲ್ಸ್​ ರಾಷ್ಟ್ರದೊಂದಿಗೆ ಭಾರತದ ಸಂಬಂಧವು ಕೇವಲ ವ್ಯೂಹಾತ್ಮಕವಾಗಿರದೆ, 256 ವರ್ಷಗಳಷ್ಟು ಹಳೆಯದಾಗಿದೆ. 1770ರಲ್ಲಿ ಇಲ್ಲಿ ಮೊದಲ ಶಾಶ್ವತ ವಸಾಹತು ಸ್ಥಾಪನೆಯಾದಾಗ, ಅಲ್ಲಿಗೆ ತಲುಪಿದ 27 ಜನರಲ್ಲಿ 5 ಮಂದಿ ಭಾರತೀಯರಾಗಿದ್ದರು. ಪ್ರಸಕ್ತ, ಸೀಶೆಲ್ಸ್​ನ 1.30 ಲಕ್ಷ ಜನಸಂಖ್ಯೆಯಲ್ಲಿ ಪ್ರತಿ ಎಂಟನೇ ಪ್ರಜೆಯೂ ಭಾರತೀಯ ಮೂಲದವರಾಗಿದ್ದಾರೆ. ಹಿಂದೂ ಮಹಾಸಾಗರದಲ್ಲಿ ಪ್ರಮುಖ ಜಾಗತಿಕ ವ್ಯಾಪಾರ ನೌಕಾ ಮಾರ್ಗಗಳು ಹಾದುಹೋಗುವ ಆಯಕಟ್ಟಿನ ಜಾಗದಲ್ಲಿ ಸೀಶೆಲ್ಸ್​ ನೆಲೆಸಿದೆ. ಈ ಕಾರಣದಿಂದಾಗಿ ಭಾರತ, ಅಮೆರಿಕ, ಫ್ರಾನ್ಸ್​ ಮತ್ತು ಚೀನಾ ಸೇರಿದಂತೆ ವಿಶ್ವದ ಪ್ರಮುಖ ದೇಶಗಳಿಗೆ ಇದು ಕಾರ್ಯತಂತ್ರದ ದೃಷ್ಟಿಯಿಂದ ಮಹತ್ವದ ದೇಶವಾಗಿದೆ.

ವಿಶೇಷಗಳು: ವಿಶಿಷ್ಟ ಪ್ರಾಕೃತಿಕ ಸೌಂದರ್ಯ ಮತ್ತು ಭೌಗೋಳಿಕ ಪ್ರಾಮುಖ್ಯತೆಯಿಂದ ಗಮನ ಸೆಳೆಯುವ ದೇಶ ಸೀಶೆಲ್ಸ್​. ಹಿಂದೂ ಮಹಾಸಾಗರದಲ್ಲಿ ನೆಲೆಸಿರುವ ಈ ಪುಟ್ಟದ್ವೀಪ ಕುರಿತಾದ ಆಸಕ್ತಿದಾಯಕ ಸಂಗತಿಗಳು ಇಲ್ಲಿವೆ.

115 ದ್ವೀಪಗಳ ಸಮ್ಮಿಲನ: ಸೀಶೆಲ್ಸ್​ ಒಟ್ಟು 115 ಸಣ್ಣ ಮತ್ತು ದೊಡ್ಡ ದ್ವೀಪಗಳನ್ನು ಒಳಗೊಂಡಿದೆ. ಆಶ್ಚರ್ಯಕರ ಸಂಗತಿಯೆಂದರೆ, ಇವುಗಳಲ್ಲಿ 33 ದ್ವೀಪಗಳಲ್ಲಿ ಮಾತ್ರ ಜನರು ವಾಸಿಸುತ್ತಿದ್ದಾರೆ.

ಸುಂದರವಾದ ಕಡಲತೀರಗಳು: ಇಲ್ಲಿನ ಆನ್ಸ್​ ಸೋರ್ಸ್​ ಡಿ ಅರ್ಜೆಂಟ್​ ಬೀಚ್​ ವಿಶ್ವದ ಸುಂದರವಾದ ಕಡಲತೀರಗಳಲ್ಲಿ ಒಂದಾಗಿದೆ. ಗುಲಾಬಿ ಬಣ್ಣದ ಗ್ರಾನೈಟ್​ ಬಂಡೆಗಳು ಮತ್ತು ತಿಳಿನೀಲಿ ಬಣ್ಣದ ಸಮುದ್ರವು ಪ್ರವಾಸಿಗರನ್ನು ಮಂತ್ರಮುಗ್ಧರನ್ನಾಗಿಸುತ್ತದೆ.

ಕಿರಿದಾದ ರಾಜಧಾನಿ: ಸೀಶೆಲ್ಸ್​ನ ರಾಜಧಾನಿಯಾದ ವಿಕ್ಟೋರಿಯಾ ವಿಶ್ವದ ಅತ್ಯಂತ ಚಿಕ್ಕ ರಾಜಧಾನಿಗಳಲ್ಲಿ ಒಂದೆಂದು ಗುರುತಿಸಲ್ಪಟ್ಟಿದೆ. ಈ ನಗರದ ಒಟ್ಟು ಜನಸಂಖ್ಯೆ ಕೇವಲ 40-45 ಸಾವಿರದ ಆಸುಪಾಸಿನಲ್ಲಿದೆ. ವಿಕ್ಟೋರಿಯಾದಲ್ಲಿ ಈ ಹಿಂದೆ ಕೇವಲ ಒಂದೇ ಒಂದು ಟ್ರಾಫಿಕ್​ ಸಿಗ್ನಲ್​ ಇತ್ತು! ಪ್ರಸ್ತುತ ದಿನಗಳಲ್ಲಿ ವಾಹನ ದಟ್ಟಣೆ ನಿಯಂತ್ರಿಸಲು ಇನ್ನೂ ಕೆಲವು ಸಿಗ್ನಲ್​ಗಳನ್ನು ಅಳವಡಿಸಲಾಗಿದ್ದರೂ, ಈ ಹಳೆಯ ರೋಚಕ ಸಂಗತಿ ಇಂದಿಗೂ ಈ ನಗರದ ವಿಶಿಷ್ಟ ಗುರುತಾಗಿ ಉಳಿದಿದೆ.

ಈ ದೇಶಕ್ಕೆ ಸ್ವಂತ ಸೈನ್ಯವಿಲ್ಲ!: ಸೀಶೆಲ್ಸ್​ ದೇಶಕ್ಕೆ ಯಾವುದೇ ಕಾಯಂ ಆದ ಸೇನಾಪಡೆ ಇಲ್ಲ. ದೇಶದ ಆಂತರಿಕ ಮತ್ತು ಬಾಹ್ಯ ಭದ್ರತೆಯ ಸಂಪೂರ್ಣ ಜವಾಬ್ದಾರಿಯನ್ನು ಇಲ್ಲಿನ ಕೋಸ್ಟ್​ ಗಾರ್ಡ್​ ಮತ್ತು ಪೊಲೀಸ್​ ಪಡೆಗಳು ನಿರ್ವಹಿಸುತ್ತವೆ.

ಪ್ರವಾಸೋದ್ಯಮ: ಈ ದೇಶದ ಆರ್ಥಿಕತೆಯು ಸಂಪೂರ್ಣವಾಗಿ ಪ್ರವಾಸೋದ್ಯಮದ ಮೇಲೆ ಅವಲಂಬಿತವಾಗಿದೆ. ಪ್ರತಿವರ್ಷ ಇಲ್ಲಿಗೆ ಭೇಟಿ ನೀಡುವ ವಿದೇಶಿ ಪ್ರವಾಸಿಗರ ಸಂಖ್ಯೆ, ಈ ದೇಶದ ಒಟ್ಟು ಜನಸಂಖ್ಯೆಗಿಂತಲೂ ಹಲವು ಪಟ್ಟು ಹೆಚ್ಚಾಗಿರುತ್ತದೆ. ಇಲ್ಲಿನ ಸಮುದ್ರದ ನೀರು ವಿಶ್ವದಲ್ಲೆ ಸ್ವಚ್ಛ ಹಾಗೂ ಪಾರದರ್ಶಕ ಎಂದು ಪರಿಗಣಿಸಲಾಗಿದೆ. ನೀರಿನ ಒಳಗೆ 30ರಿಂದ 40 ಮೀ. ಆಳದವರೆಗಿನ ದೃಶ್ಯಗಳು ಸಹ ಸ್ಪಷ್ಟವಾಗಿ ಗೋಚರಿಸುತ್ತವೆ.

ಸೀಶೆಲ್ಸ್​ನ ಕರಾವಳಿ ಭದ್ರತೆಗಾಗಿ ಭಾರತವು ಎರಡನೇ ಡೋರ್ನಿಯರ್​ ಕಡಲ ಕಾವಲು ವಿಮಾನವನ್ನು ಉಡುಗೊರೆಯಾಗಿ ನೀಡಿದೆ.

ಭಾರತದ ನೆರವಿನಿಂದ ನಿರ್ಮಿಸಲಾದ ಕರಾವಳಿ ಕಾವಲು ರೇಡಾರ್​ ವ್ಯವಸ್ಥೆಯನ್ನು ಪ್ರಧಾನಿ ನರೇಂದ್ರ ಮೋದಿ ಉದ್ಘಾಟಿಸಿದ್ದಾರೆ. ಇದು ಹಿಂದೂ ಮಹಾಸಾಗರದಲ್ಲಿ ಸಂಚರಿಸುವ ಹಡಗುಗಳ ಮೇಲ್ವಿಚಾರಣೆಗೆ ದೊಡ್ಡ ಶಕ್ತಿಯಾಗಲಿದೆ.

ಇಲ್ಲಿನ ಅಲ್ಡಾಬ್ರಾ ಅಟಾಲ್​ ದ್ವೀಪದಲ್ಲಿ ಜಗತ್ತಿನಲ್ಲೆ ಅತಿ ದೊಡ್ಡದಾದ ದೈತ್ಯ ಆಮೆಗಳು ಕಂಡುಬರುತ್ತವೆ. ಈ ಪ್ರದೇಶದಲ್ಲಿ ಇವುಗಳ ಸಂಖ್ಯೆ ಒಂದು ಲಕ್ಷಕ್ಕೂ ಅಧಿಕವಾಗಿದೆ ಎಂದು ಅಂದಾಜಿಸಲಾಗಿದೆ.

ಪೋರ್ಚುಗೀಸ್​ ನಾವಿಕ ವಾಸ್ಕೋ ಡಿ ಗಾಮಾ 1502ರಲ್ಲಿ ಮೊದಲ ಬಾರಿಗೆ ಸೀಶೆಲ್ಸ್​ ದ್ವೀಪವನ್ನು ಪತ್ತೆಹಚ್ಚಿದ್ದರೂ, ಹಲವು ಶತಮಾನಗಳವರೆಗೆ ಅಲ್ಲಿ ಯಾವುದೇ ಕಾಯಂ ಜನವಸತಿ ಇರಲಿಲ್ಲ. ಆದರೆ, 1770 ರಲ್ಲಿ ಫ್ರಾನ್ಸ್​ ಮೊದಲ ಬಾರಿಗೆ ಇಲ್ಲಿ ವಸಾಹತು ಸ್ಥಾಪಿಸಿದಾಗ, ಆ ಗುಂಪಿನಲ್ಲಿದ್ದ 15 ಫ್ರೆಂಚರು ಮತ್ತು 7 ಆಫ್ರಿಕನ್​ರ ಜೊತೆಗೆ ಐವರು ಭಾರತೀಯರೂ ಸೇರಿದ್ದರು. ಇವರೇ ಸೀಶೆಲ್ಸ್​ ಇತಿಹಾಸದ ಮೊದಲ ಅಧಿಕೃತ ನಿವಾಸಿಗಳಾಗಿದ್ದಾರೆ. ನಂತರದ ದಿನಗಳಲ್ಲಿ ಬಿಹಾರದ ಭೋಜಪುರಿ ಭಾಷಿಕರು, ತಮಿಳುನಾಡು ಮತ್ತು ಗುಜರಾತ್​ನ ವರ್ತಕರು ಹಾಗೂ ಕಾರ್ಮಿಕರು ದೊಡ್ಡ ಸಂಖ್ಯೆಯಲ್ಲಿ ಇಲ್ಲಿಗೆ ವಲಸೆ ಬಂದರು. ಪ್ರಸ್ತುತ 1.30 ಲಕ್ಷ ಜನಸಂಖ್ಯೆ ಹೊಂದಿರುವ ಸೀಶೆಲ್ಸ್​ ನಲ್ಲಿ ಶೇ.8ರಷ್ಟು ಭಾರತೀಯ ಮೂಲದವರಿದ್ದಾರೆ.

ಅಲ್ಲದೆ, 2020ರಿಂದ 2025ರವರೆಗೆ ಸೀಶೆಲ್ಸ್​ ಅಧ್ಯಕ್ಷರಾಗಿದ್ದ ವೇವೆಲ್​ ರಾಮಕಲಾವನ್​ ಅವರ ಪೂರ್ವಜರು ಬಿಹಾರದ ಗೋಪಾಲಗಂಜ್​ ಜಿಲ್ಲೆಯ ಪರಸೌನಿ ಗ್ರಾಮದವರಾಗಿದ್ದಾರೆ. 138 ವರ್ಷಗಳ ಹಿಂದೆ ಇವರ ಮುತ್ತಜ್ಜ ಕಬ್ಬಿನ ಗದ್ದೆಗಳಲ್ಲಿ ಕೆಲಸ ಮಾಡಲು ಮಾರಿಷಸ್​ಗೆ ತೆರಳಿ, ನಂತರ ಅವರ ಕುಟುಂಬ ಸೀಶೆಲ್ಸ್​ನಲ್ಲಿ ನೆಲೆಸಿತ್ತು. ರಾಮಕಲಾವನ್​ 2018ರಲ್ಲಿ ಭಾರತಕ್ಕೆ ಬಂದಿದ್ದಾಗ ತಮ್ಮ ಪೂರ್ವಜರ ಗ್ರಾಮಕ್ಕೂ ಭೇಟಿ ನೀಡಿದ್ದರು.

ಈ ವರ್ಷ ಭಾರತ ಮತ್ತು ಸೀಶೆಲ್ಸ್​ ನಡುವಿನ ರಾಜತಾಂತ್ರಿಕ ಸಂಬಂಧಗಳು ಸ್ಥಾಪನೆಯಾಗಿ 50 ವರ್ಷಗಳು ಪೂರೈಸುತ್ತಿವೆ. ಸೀಶೆಲ್ಸ್​ ಭಾರತದ ಪ್ರಮುಖ ಕರಾವಳಿ ನೆರೆಯ ರಾಷ್ಟ್ರವಾಗಿದ್ದು, ಭಾರತದ 'ಮಹಾಸಾಗರ' ದೂರದೃಷ್ಟಿಯ ಪ್ರಮುಖ ಪಾಲುದಾರವಾಗಿದೆ. 2026ರ ಫೆಬ್ರವರಿಯಲ್ಲಿ ಸೀಶೆಲ್ಸ್​ ಅಧ್ಯಕ್ಷ ಪ್ಯಾಟ್ರಿಕ್​ ಹರ್ಮಿನಿ ಭಾರತಕ್ಕೆ ಭೇಟಿ ನೀಡಿದ ಬೆನ್ನಲ್ಲೆ ಈ ಉನ್ನತ ಮಟ್ಟದ ದ್ವಿಪಕ್ಷೀಯ ಸಭೆಗಳು ನಡೆದಿವೆ.

ಸಮುದ್ರ ಆರ್ಥಿಕ ವಲಯ: ಸೀಶೆಲ್ಸ್​ನ ಒಟ್ಟು ಭೂ ವಿಸ್ತೀರ್ಣ ಕೇವಲ 459 ಚದರ ಕಿಲೋಮೀಟರ್​ ಆಗಿದೆ. ಆದರೆ ಇದರ ಸಮುದ್ರ ಆರ್ಥಿಕ ವಲಯ (Exclusive Economic Zone) 13.7 ಲಕ್ಷ ಚದರ ಕಿಲೋಮೀಟರ್​ಗಳಷ್ಟು ವಿಶಾಲವಾಗಿ ಹರಡಿಕೊಂಡಿದೆ.

ಸಾಗರ ಜೀವಿಗಳ ಸ್ವರ್ಗ: ಇಲ್ಲಿನ ಸಮುದ್ರ ಗರ್ಭದಲ್ಲಿ 900ಕ್ಕೂ ಹೆಚ್ಚು ಜಾತಿಯ ಮೀನುಗಳು, ನೂರಾರು ಬಗೆಯ ಅಪೂರ್ವ ಹವಳದ ಬಂಡೆಗಳು ಮತ್ತು ವಿಶಿಷ್ಟ ಸಾಗರ ಜೀವಿಗಳು ವಾಸಿಸುತ್ತವೆ. ಇದೇ ಕಾರಣಕ್ಕಾಗಿ ಸೀಶೆಲ್ಸ್​ ಅನ್ನು ಸ್ಕೂಬಾ ಡೈವಿಂಗ್​ ಮಾಡಲು ವಿಶ್ವದ ಅತ್ಯುತ್ತಮ ತಾಣಗಳ ಪಟ್ಟಿಯಲ್ಲಿ ಮುಂಚೂಣಿಯಲ್ಲಿ ಗುರುತಿಸಲಾಗುತ್ತದೆ.