- ಯಾವುದೇ ಶಾರ್ಟ್ಕಟ್ ಇಲ್ಲ: 1.8 ಕೋಟಿ ರೂ.ಗಳ ಆಫರ್ ಪಡೆಯಲು ಲಕ್ ಅಥವಾ 'ಹ್ಯಾಕ್'ಗಳಿಗಿಂತ ಹೆಚ್ಚಾಗಿ 12 ವಾರಗಳ ಶಿಸ್ತುಬದ್ಧ ವ್ಯವಸ್ಥೆ ಕಾರಣ.
- ಸ್ಪಷ್ಟ ಯೋಜನೆ (Execution Plan): ಕಾರ್ತಿಕ್ ಮೋದಿ 10-12 ವಾರಗಳ ಕಾಲ ಕಟ್ಟುನಿಟ್ಟಾದ ವೇಳಾಪಟ್ಟಿಯನ್ನು ಅನುಸರಿಸಿದರು.
- ಕಂಪನಿಗಳ ಆಯ್ಕೆ: ವೀಸಾ ಸ್ಪಾನ್ಸರ್ಶಿಪ್ ನೀಡುವ 25-30 ವಿದೇಶಿ ಕಂಪನಿಗಳನ್ನು ಮಾತ್ರ ಮೊದಲೇ ಶಾರ್ಟ್ಲಿಸ್ಟ್ ಮಾಡಿಕೊಂಡಿದ್ದರು.
ಬೆಂಗಳೂರು: ಇಂದಿನ ಸ್ಪರ್ಧಾತ್ಮಕ ಜಗತ್ತಿನಲ್ಲಿ ಸಾಫ್ಟ್ವೇರ್ ಎಂಜಿನಿಯರ್ಗಳಿಗೆ ವಿದೇಶಿ ಕೆಲಸ ಎನ್ನುವುದು ಒಂದು ಕನಸು. ಆದರೆ, ಯಾವುದೇ ಶಾರ್ಟ್ಕಟ್ ಬಳಸದೆ, ಕೇವಲ 12 ವಾರಗಳ ಶಿಸ್ತುಬದ್ಧ ಯೋಜನೆಯ ಮೂಲಕ ಭಾರತೀಯ ಟೆಕ್ಕಿಯೊಬ್ಬರು 1.8 ಕೋಟಿ ರೂಪಾಯಿಗಳ ಬೃಹತ್ ಮೊತ್ತದ ಅಂತಾರಾಷ್ಟ್ರೀಯ ಉದ್ಯೋಗದ ಆಫರ್ ಪಡೆದು ಎಲ್ಲರ ಗಮನ ಸೆಳೆದಿದ್ದಾರೆ. ಅಮೆಜಾನ್ನಲ್ಲಿ ಸಾಫ್ಟ್ವೇರ್ ಡೆವಲಪ್ಮೆಂಟ್ ಎಂಜಿನಿಯರ್ (SDE) ಆಗಿ ಕೆಲಸ ಮಾಡುತ್ತಿರುವ ಕಾರ್ತಿಕ್ ಮೋದಿ ಎಂಬುವವರೇ ಈ ಸಾಧನೆ(Success Story ) ಮಾಡಿದವರು.
ತಮ್ಮ ಯಶಸ್ಸಿನ ಗುಟ್ಟನ್ನು ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿರುವ ಕಾರ್ತಿಕ್, "ಇದು ಅದೃಷ್ಟವಲ್ಲ ಅಥವಾ ಯಾವುದೇ ಹ್ಯಾಕ್ ಅಲ್ಲ; ಇದು ಕೇವಲ ಶಿಸ್ತುಬದ್ಧ ಪ್ರಯತ್ನ ಮತ್ತು ಸ್ಪಷ್ಟ ಯೋಜನೆಯ ಫಲ" ಎಂದು ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.
12 ವಾರಗಳ ಕಟ್ಟುನಿಟ್ಟಿನ ಯೋಜನೆ
ಕಾರ್ತಿಕ್ ಅವರು ಕೇವಲ 10 ರಿಂದ 12 ವಾರಗಳ ಕಾರ್ಯಗತಗೊಳಿಸುವ ಯೋಜನೆಯನ್ನು ರೂಪಿಸಿಕೊಂಡಿದ್ದರು. ಅವರ ಈ ತಯಾರಿ ಮುಖ್ಯವಾಗಿ ನಾಲ್ಕು ಹಂತಗಳಲ್ಲಿತ್ತು.
ಕಂಪನಿಗಳ ಆಯ್ಕೆ: ಮೊದಲು ವೀಸಾ ಸ್ಪಾನ್ಸರ್ಶಿಪ್ ನೀಡುವ 25-30 ಅಂತಾರಾಷ್ಟ್ರೀಯ ಕಂಪನಿಗಳನ್ನು ಶಾರ್ಟ್ಲಿಸ್ಟ್ ಮಾಡಿಕೊಂಡರು. ಇದಕ್ಕಾಗಿ ಅವರು ಲಿಂಕ್ಡ್ಇನ್ ಜಾಬ್ಸ್ (LinkedIn Jobs), ಇಂಡೀಡ್ (Indeed), ಮತ್ತು ಲೆವೆಲ್ಸ್.ಎಫ್ವೈಐ (Levels.fyi) ಪ್ಲಾಟ್ಫಾರ್ಮ್ಗಳನ್ನು ಬಳಸಿಕೊಂಡರು.
ಜೆಡಿ (Job Description) ವಿಶ್ಲೇಷಣೆ: ಸುಮಾರು 35 ರಿಂದ 40 ಉದ್ಯೋಗ ವಿವರಣೆಗಳನ್ನು ಆಳವಾಗಿ ಅಧ್ಯಯನ ಮಾಡಿದರು. ಅದರಲ್ಲಿ ಪದೇ ಪದೇ ಕೇಳಲಾಗುವ ಕೌಶಲಗಳನ್ನು ಗುರುತಿಸಿದರು. ಶೇಕಡಾ 60ಕ್ಕಿಂತ ಹೆಚ್ಚು ಉದ್ಯೋಗ ವಿವರಣೆಗಳಲ್ಲಿ ಕೇಳಲಾದ ಕೌಶಲಗಳಿಗೆ ತಮ್ಮ ತಯಾರಿಯಲ್ಲಿ ಹೆಚ್ಚಿನ ಆದ್ಯತೆ ನೀಡಿದರು.
ಅಭ್ಯಾಸ ಕ್ರಮ: ಮೊದಲ ಐದು ವಾರಗಳನ್ನು ಡೇಟಾ ಸ್ಟ್ರಕ್ಚರ್ಸ್ ಮತ್ತು ಅಲ್ಗಾರಿದಮ್ಗಳ (DSA) ಅಭ್ಯಾಸಕ್ಕಾಗಿ ಮೀಸಲಿಟ್ಟರು. ಇಲ್ಲಿ ಅವರು ಸಾವಿರಾರು ಸಮಸ್ಯೆಗಳನ್ನು ಬಿಡಿಸುವ ಬದಲು, ಕೇವಲ 100 ಪ್ರಮುಖ ಸಮಸ್ಯೆಗಳನ್ನು ಆಯ್ಕೆ ಮಾಡಿಕೊಂಡು ಅವುಗಳ ಮೂಲತತ್ವವನ್ನು ಅರ್ಥಮಾಡಿಕೊಂಡರು.
ಸಿಸ್ಟಮ್ ಡಿಸೈನ್ ಮತ್ತು ಬಿಹೇವಿಯರಲ್ ರೌಂಡ್: ನಂತರದ ವಾರಗಳಲ್ಲಿ ಸಿಸ್ಟಮ್ ಡಿಸೈನ್, ಡೊಮೇನ್ ಜ್ಞಾನ ಮತ್ತು ಬಿಹೇವಿಯರಲ್ ಇಂಟರ್ವ್ಯೂಗಳ ಬಗ್ಗೆ ಗಮನ ಹರಿಸಿದರು. ಅಥೆಂಟಿಕೇಶನ್, ಪಾವತಿಗಳು, ಸರ್ಚ್ ಮತ್ತು ನೋಟಿಫಿಕೇಶನ್ನಂತಹ ತಾಂತ್ರಿಕ ವಿಷಯಗಳ ಬಗ್ಗೆ ಆಳವಾಗಿ ಅಧ್ಯಯನ ಮಾಡಿದರು.
ಜಾಗತಿಕ ಮಟ್ಟದ ರೆಸ್ಯೂಮ್ ತಯಾರಿ
ಅಂತಾರಾಷ್ಟ್ರೀಯ ಮಾನದಂಡಗಳಿಗೆ ಅನುಗುಣವಾಗಿ ಕಾರ್ತಿಕ್ ಅವರು ಕೇವಲ ಒಂದು ಪುಟದ ರೆಸ್ಯೂಮ್ ಸಿದ್ಧಪಡಿಸಿದರು. ಅದರಲ್ಲಿ ತಮ್ಮ ಸಾಧನೆಗಳನ್ನು ಅಳೆಯಬಹುದಾದ ಅಂಕಿಅಂಶಗಳೊಂದಿಗೆ (Measurable results) ವಿವರಿಸಿದ್ದರು. ತಮ್ಮ ಸಂವಹನ ಕೌಶಲವನ್ನು ಸುಧಾರಿಸಿಕೊಳ್ಳಲು ಹಲವಾರು ಮಾಕ್ ಇಂಟರ್ವ್ಯೂಗಳಲ್ಲಿ (Mock Interviews) ಭಾಗವಹಿಸಿದ್ದರು.
"ವಿದೇಶದಲ್ಲಿ ನನಗೆ ಯಾವುದೇ ದೊಡ್ಡ ನೆಟ್ವರ್ಕ್ ಇರಲಿಲ್ಲ. ನನ್ನ ಮನೆಯ ಕೊಠಡಿಯಲ್ಲೇ ಕುಳಿತು ಈ ಯೋಜನೆಯನ್ನು ಜಾರಿಗೆ ತಂದೆ. ನೀವು ಜಾಗತಿಕ ಮಟ್ಟದ ಕೆಲಸ ಬಯಸುವುದಾದರೆ ಮೊದಲು ಅಲ್ಲಿಗೆ ಹೋಗಬೇಕಿಲ್ಲ, ಬದಲಾಗಿ ಸರಿಯಾದ ತಯಾರಿ ನಡೆಸಬೇಕು," ಎಂದು ಅವರು ಕಿವಿಮಾತು ಹೇಳಿದ್ದಾರೆ. ಮೊದಲು ರಿಮೋಟ್ ಕೆಲಸವಾಗಿ ಆರಂಭವಾದ ಈ ಅವಕಾಶವು ನಂತರ ಯುಕೆ (UK) ಗೆ ಸ್ಥಳಾಂತರಗೊಳ್ಳುವ ಅವಕಾಶವಾಗಿಯೂ ಬದಲಾಯಿತು.
ಮತ್ತೊಬ್ಬ ಟೆಕ್ಕಿಯ ಅನುಭವ: ಕೆನಡಾ ಯಶಸ್ಸಿನ ಹಾದಿ
ಕಾರ್ತಿಕ್ ಅವರ ಈ ಪೋಸ್ಟ್ಗೆ ಪ್ರತಿಕ್ರಿಯಿಸಿದ ಮತ್ತೊಬ್ಬ ಟೆಕ್ಕಿ ಕೂಡ ತಮ್ಮದೇ ಆದ ವಿಭಿನ್ನ ಯಶಸ್ಸಿನ ಹಾದಿಯನ್ನು ಹಂಚಿಕೊಂಡಿದ್ದಾರೆ. ಇವರು ಯುರೋಪ್ ಮತ್ತು ಕೆನಡಾ ಮೂಲದ ಸ್ಟಾರ್ಟ್ಅಪ್ಗಳಿಗೆ ಅರ್ಜಿ ಸಲ್ಲಿಸುವ ಮೂಲಕ ವೃತ್ತಿಜೀವನ ಆರಂಭಿಸಿದ್ದರು.
"ನಾನು ಕೆನಡಾ ಮೂಲದ ಸ್ಟಾರ್ಟ್ಅಪ್ ಒಂದಕ್ಕೆ ಭಾರತದಲ್ಲಿಯೇ ಕುಳಿತು ಕೆಲಸ ಮಾಡಲು ಆರಂಭಿಸಿದೆ. ಅಲ್ಲಿನ ಸಂಬಳ ಪಡೆಯುತ್ತಾ ಭಾರತದಲ್ಲಿಯೇ ಇರುವುದು ಆರ್ಥಿಕವಾಗಿ ಲಾಭದಾಯಕವಾಗಿತ್ತು. ತೆರಿಗೆ ವಿನಾಯಿತಿಗಳೂ ಸಿಗುತ್ತಿದ್ದವು. ಮೂರು ವರ್ಷಗಳ ನಂತರ ಅದೇ ಕಂಪನಿ ನನಗೆ ಸ್ಪಾನ್ಸರ್ಶಿಪ್ ನೀಡಿತು. ಈಗ ನಾನು ಕೆನಡಾದಲ್ಲಿದ್ದೇನೆ ಮತ್ತು ಪಿಆರ್ (PR) ಕೂಡ ಪಡೆದಿದ್ದೇನೆ," ಎಂದು ಅವರು ತಿಳಿಸಿದ್ದಾರೆ. ಟೈಮ್ಜೋನ್ ವ್ಯತ್ಯಾಸಗಳನ್ನು ನಿಭಾಯಿಸುವುದು ಈ ಹಾದಿಯಲ್ಲಿನ ದೊಡ್ಡ ಸವಾಲಾಗಿತ್ತು ಎಂದು ಅವರು ನೆನಪಿಸಿಕೊಂಡಿದ್ದಾರೆ.
ವಿದೇಶಿ ಉದ್ಯೋಗ ಎನ್ನುವುದು ಕೇವಲ ಕನಸಲ್ಲ, ಅದು ಸರಿಯಾದ ಹಾದಿಯಲ್ಲಿ ನಡೆಸುವ ಸತತ ಪ್ರಯತ್ನ. ಗೇಟ್ಕೀಪಿಂಗ್ (ಮಾಹಿತಿ ಮುಚ್ಚಿಡುವುದು) ಮಾಡದೆ ಸಂಪೂರ್ಣ ವಿವರ ನೀಡಿದ ಕಾರ್ತಿಕ್ ಅವರಿಗೆ ನೆಟ್ಟಿಗರು ಧನ್ಯವಾದ ಅರ್ಪಿಸಿದ್ದಾರೆ. ಭಾರತದ ಪ್ರತಿಭೆಗಳಿಗೆ ಜಾಗತಿಕ ಮಟ್ಟದಲ್ಲಿ ಬೇಡಿಕೆ ಇದ್ದು, ಸರಿಯಾದ 'ಸಿಸ್ಟಮ್' ಅನುಸರಿಸಿದರೆ ಕೋಟಿ ರೂಪಾಯಿಗಳ ಆಫರ್ ಪಡೆಯುವುದು ಅಸಾಧ್ಯವಲ್ಲ ಎಂಬುದು ಇವರ ಸಾಧನೆಯಿಂದ ಸಾಬೀತಾಗಿದೆ,(ಏಜೆನ್ಸೀಸ್).