ಕಾಂಗ್ರೆಸ್‌ಗೆ ಮುಗಿಯದ ಕ್ರಾಸ್ ವೋಟಿಂಗ್ ಶಾಪ: ರಾಜ್ಯಸಭಾ ಚುನಾವಣೆಗಳೇ ಹಸ್ತ ಪಾಳಯದ ಪಾಲಿನ ಚಕ್ರವ್ಯೂಹ! Congress Cross Voting

ಕಾಗದದ ಮೇಲೆ ಗೆಲ್ಲಲು ಬೇಕಾದಷ್ಟು ಸಂಖ್ಯಾಬಲವಿದ್ದರೂ, ಆಂತರಿಕ ಭಿನ್ನಮತ ಮತ್ತು ಮಿತ್ರಪಕ್ಷಗಳ ದ್ರೋಹದಿಂದಾಗಿ ಕಾಂಗ್ರೆಸ್ ಪದೇ ಪದೇ ಸೋಲೊಪ್ಪಿಕೊಳ್ಳುತ್ತಿರುವುದು ಪಕ್ಷದ ಸಾಂಸ್ಥಿಕ ದೌರ್ಬಲ್ಯಕ್ಕೆ ಹಿಡಿದ ಕನ್ನಡಿಯಾಗಿದೆ.

81 ಸದಸ್ಯರ ಜಾರ್ಖಂಡ್ ವಿಧಾನಸಭೆಯಲ್ಲಿ ಕಾಂಗ್ರೆಸ್, ಜೆಎಂಎಂ ಮತ್ತು ಆರ್‌ಜೆಡಿ ಒಳಗೊಂಡ ಇಂಡಿಯಾ ಮೈತ್ರಿಕೂಟಕ್ಕೆ 56 ಶಾಸಕರ ಭಾರಿ ಬಹುಮತವಿತ್ತು. ನಿಯಮದ ಪ್ರಕಾರ ಮೈತ್ರಿಕೂಟವು ಎರಡೂ ರಾಜ್ಯಸಭಾ ಸ್ಥಾನಗಳನ್ನು ಸುಲಭವಾಗಿ ಗೆಲ್ಲಬೇಕಿತ್ತು. ಆದರೆ, ಎನ್‌ಡಿಎ ಬೆಂಬಲಿತ ಪಕ್ಷೇತರ ಅಭ್ಯರ್ಥಿ ಪರಿಮಳ್ ನಥ್ವಾನಿ 28 ಮತಗಳನ್ನು ಪಡೆದು ಬೀಗಿದರೆ, ಕಾಂಗ್ರೆಸ್‌ನ ಅಧಿಕೃತ ಅಭ್ಯರ್ಥಿ ಪ್ರಣವ್ ಝಾ ಕೇವಲ 19 ಮತಗಳನ್ನು ಪಡೆದು ಮುಖಭಂಗ ಅನುಭವಿಸಿದ್ದಾರೆ.

ಮೈತ್ರಿಕೂಟದಲ್ಲಿದ್ದ ಆರ್‌ಜೆಡಿ ಮತ್ತು ಸಿಪಿಐ(ಎಂಎಲ್) ಶಾಸಕರು ದೊಡ್ಡ ಮಟ್ಟದಲ್ಲಿ ಅಡ್ಡಮತದಾನ ಮಾಡಿರುವುದು ತನಿಖೆಯಿಂದ ಬೆಳಕಿಗೆ ಬಂದಿದೆ. ಮೇಲಾಗಿ, ಹಿರಿಯ ಪಾಲುದಾರ ಪಕ್ಷವಾದ ಜೆಎಂಎಂ ನಾಯಕರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳದೆ ಕಾಂಗ್ರೆಸ್ ಏಕಪಕ್ಷೀಯವಾಗಿ ಅಭ್ಯರ್ಥಿ ಘೋಷಿಸಿದ್ದೇ ಈ ಆಂತರಿಕ ಬಂಡಾಯಕ್ಕೆ ಕಾರಣ ಎನ್ನಲಾಗಿದೆ.

2016ರ ಹರಿಯಾಣ ರಾಜ್ಯಸಭಾ ಚುನಾವಣೆ ಇತಿಹಾಸದಲ್ಲೇ ಅತ್ಯಂತ ವಿವಾದಾತ್ಮಕವಾಗಿ ಉಳಿದಿದೆ. ಕಾಂಗ್ರೆಸ್ ಬೆಂಬಲಿತ ಆರ್.ಕೆ. ಆನಂದ್ ಗೆಲ್ಲುವುದು ಖಚಿತವಾಗಿತ್ತು. ಆದರೆ ಮತ ಎಣಿಕೆ ವೇಳೆ ಕಾಂಗ್ರೆಸ್‌ನ 13 ಶಾಸಕರ ಮತಗಳು ಅಮಾನ್ಯಗೊಂಡವು. ಅಲ್ಲದೆ, ಶಾಸಕರು ಅಧಿಕೃತ ರೇಟಿಂಗ್ ಅಧಿಕಾರ ನೀಡಿದ್ದ ನೇರಳೆ ಬಣ್ಣದ ಸ್ಕೆಚ್ ಪೆನ್ ಬದಲಿಗೆ ಬೇರೆ ಪೆನ್ ಬಳಸಿ ಮತ ಹಾಕಿದ್ದರು. ಮಾಜಿ ಸಿಎಂ ಭೂಪಿಂದರ್ ಸಿಂಗ್ ಹೂಡಾ ಬಣಕ್ಕೆ ಆರ್.ಕೆ. ಆನಂದ್ ಅಭ್ಯರ್ಥಿಯಾಗಿದ್ದು ಇಷ್ಟವಿರಲಿಲ್ಲ ಎಂಬುದು ಇದರ ಹಿಂದಿನ ರಹಸ್ಯವಾಗಿತ್ತು. ಇದರಿಂದಾಗಿ ಬಿಜೆಪಿ ಬೆಂಬಲಿತ ಸುಭಾಷ್ ಚಂದ್ರ ಸುಲಭವಾಗಿ ಗೆದ್ದರು.

ಅದೇ ವರ್ಷ ಉತ್ತರ ಪ್ರದೇಶದಲ್ಲಿ ಹಿರಿಯ ನಾಯಕ ಕಪಿಲ್ ಸಿಬಲ್ ಕಣಕ್ಕಿಳಿದಿದ್ದರು. ಸಮಾಜವಾದಿ ಪಕ್ಷದ ಹೆಚ್ಚುವರಿ ಮತಗಳ ನೆರವೇನೋ ಸಿಬಲ್‌ಗೆ ಸಿಕ್ಕಿತು. ಆದರೆ ಸ್ವಂತ ಪಕ್ಷದ 6 ಕಾಂಗ್ರೆಸ್ ಶಾಸಕರು ಸಿಬಲ್ ವಿರುದ್ಧವೇ ಮತ ಚಲಾಯಿಸಿದ್ದರು. ಅಡ್ಡಮತದಾನ ಮಾಡಿದ ಆರೂ ಶಾಸಕರನ್ನು ಕಾಂಗ್ರೆಸ್ ನಂತರ ಪಕ್ಷದಿಂದ ಉಚ್ಛಾಟಿಸಿತು.

ರಾಜಕೀಯ ಚಾಣಕ್ಯ ಅಹಮದ್ ಪಟೇಲ್ ಅವರನ್ನು ಸೋಲಿಸಲು ಅಮಿತ್ ಷಾ ನೇತೃತ್ವದ ಬಿಜೆಪಿ ಭಾರಿ ತಂತ್ರ ಹೂಡಿತ್ತು. ಮಾಜಿ ಸಿಎಂ ಶಂಕರಸಿಂಗ್ ವಾಗೇಲಾ ದಂಗೆ ಎದ್ದು, 7 ಶಾಸಕರೊಂದಿಗೆ ಬಿಜೆಪಿ ಅಭ್ಯರ್ಥಿ ಪರ ಅಡ್ಡಮತದಾನ ಮಾಡಿದರು. ಕಾಂಗ್ರೆಸ್ ತನ್ನ ಶಾಸಕರನ್ನು ಬೆಂಗಳೂರಿನ ರೆಸಾರ್ಟ್‌ಗೆ ಕರೆತಂದು ಬಚ್ಚಿಟ್ಟರೂ ಸಬೂಬು ಸಿಗಲಿಲ್ಲ. ಆದರೆ, ಇಬ್ಬರು ಬಂಡಾಯ ಶಾಸಕರು ಮತಪತ್ರವನ್ನು ರಹಸ್ಯವಾಗಿಡದೆ ನಿಯಮ ಉಲ್ಲಂಘಿಸಿದ್ದನ್ನು ಕಾಂಗ್ರೆಸ್ ಚುನಾವಣಾ ಆಯೋಗದ ಮುಂದೆ ಸಾಬೀತುಪಡಿಸಿತು. ಮಧ್ಯರಾತ್ರಿ 2 ಗಂಟೆಗೆ ಆ ಇಬ್ಬರ ಮತಗಳನ್ನು ಆಯೋಗ ರದ್ದುಗೊಳಿಸಿದ್ದರಿಂದ ಅಹಮದ್ ಪಟೇಲ್ ಕೇವಲ 44 ಮತಗಳಿಂದ ಕೂದಲೆಳೆಯ ಅಂತರದಲ್ಲಿ ಗೆದ್ದರು.

ಗೆಲ್ಲಲು ಬೇಕಾಗಿದ್ದ 31 ಮತಗಳು ಕಾಂಗ್ರೆಸ್ ಬಳಿ ಭದ್ರವಾಗಿದ್ದವು. ಆದರೆ ಹಿರಿಯ ಶಾಸಕ ಕುಲದೀಪ್ ಬಿಷ್ಣೋಯ್ ಕೊನೆಕ್ಷಣದಲ್ಲಿ ಬಿಜೆಪಿ ಬೆಂಬಲಿತ ಕಾರ್ತಿಕೇಯ ಶರ್ಮಾ ಪರ ಮತ ಚಲಾಯಿಸಿದರು. ಮತ್ತೊಂದು ಕಾಂಗ್ರೆಸ್ ಮತ ಅಮಾನ್ಯವಾಯಿತು. ಪರಿಣಾಮ, ಹೈಕಮಾಂಡ್ ಆಪ್ತ ಅಜಯ್ ಮಾಕನ್ ಘೋರ ಸೋಲು ಕಂಡರು.

ಹಿಮಾಚಲ ಪ್ರದೇಶ (2024): ಪೂರ್ಣ ಬಹುಮತದ ಸರ್ಕಾರವಿದ್ದರೂ ಕಾಂಗ್ರೆಸ್‌ನ ಅಭಿಷೇಕ್ ಮನು ಸಿಂಘ್ವಿ ಸೋತರು. 6 ಜನ ಸ್ವಂತ ಶಾಸಕರೇ ದಂಗೆ ಎದ್ದು ಬಿಜೆಪಿ ಅಭ್ಯರ್ಥಿ ಹರ್ಷ್ ಮಹಾಜನ್ ಪರ ಮತ ಹಾಕಿದರು. ಇಬ್ಬರಿಗೂ ಸಮಾನ 34 ಮತಗಳು ಬಂದಾಗ, ಲಾಟರಿ (ಡ್ರಾ) ಮೂಲಕ ಬಿಜೆಪಿ ಗೆದ್ದಿತು. ಇದು ಸುಖ್ವಿಂದರ್ ಸಿಂಗ್ ಸುಖು ಸರ್ಕಾರ ಉರುಳುವ ಹಂತಕ್ಕೆ ತಲುಪಿತ್ತು.

ಒಡಿಶಾ (ಮಾರ್ಚ್ 2026): ಮೂವರು ಕಾಂಗ್ರೆಸ್ ಶಾಸಕರು (ಸೋಫಿಯಾ ಫಿರ್ದೋಸ್, ರಮೇಶ್ ಜೇನಾ, ದಾಸರಥಿ ಗೋಮಾಂಗೊ) ಬಿಜೆಪಿ ಬೆಂಬಲಿತ ಪಕ್ಷೇತರ ಅಭ್ಯರ್ಥಿ ದಿಲೀಪ್ ರೇ ಪರ ಅಡ್ಡಮತದಾನ ಮಾಡಿ, ಮೂವರೂ ಅಮಾನತುಗೊಂಡರು.

ಹರಿಯಾಣ (ಮಾರ್ಚ್ 2026): ಐದು ಶಾಸಕರು ಬಂಡಾಯ ಎದ್ದರೂ ಕಾಂಗ್ರೆಸ್‌ನ ಕರಂವೀರ್ ಸಿಂಗ್ ಬೌದ್ಧ್ ಕೇವಲ 0.67 ಮತಗಳ ಅಂತರದಿಂದ ಯಮಲೋಕದ ಬಾಗಿಲವರೆಗೆ ಹೋಗಿ ಬದುಕಿ ಬಂದರು.

ಬಿಹಾರ (ಮಾರ್ಚ್ 2026): ಇಲ್ಲೂ ಮೂವರು ಶಾಸಕರು ಅಡ್ಡಮತದಾನ ಮಾಡಿದರು. ಆದರೆ ಬಿಹಾರ ಕಾಂಗ್ರೆಸ್ ಘಟಕ ಅವರ ಮೇಲೆ ಯಾವುದೇ ಶಿಸ್ತು ಕ್ರಮ ಜರುಗಿಸದೆ ಮೌನ ವಹಿಸಿದ್ದು ಹೈಕಮಾಂಡ್ ಅಸಹಾಯಕತೆಯನ್ನು ತೋರಿಸುತ್ತದೆ.

ಈ ಎಲ್ಲಾ ಚುನಾವಣೆಗಳ ಇತಿಹಾಸವನ್ನು ಗಮನಿಸಿದರೆ ಕಾಂಗ್ರೆಸ್‌ಗೆ ಹೊರಗಿನ ಶತ್ರುಗಳಿಗಿಂತ ಒಳಗಿನ ಭಿನ್ನಮತ ಮತ್ತು ನಾಯಕರ ಅಹಂಕಾರವೇ ದೊಡ್ಡ ಹೊಡೆತ ನೀಡುತ್ತಿದೆ. ಪಕ್ಷದ ಆಂತರಿಕ ಜಗಳ, ಹೈಕಮಾಂಡ್‌ನ ಏಕಪಕ್ಷೀಯ ನಿರ್ಧಾರಗಳು ಮತ್ತು ಸ್ಥಳೀಯ ನಾಯಕರ ಅಸಮಾಧಾನವನ್ನು ಶಮನಗೊಳಿಸಲು ವಿಫಲವಾಗುತ್ತಿರುವುದೇ ಇಷ್ಟೆಲ್ಲಾ ಅವಾಂತರಗಳಿಗೆ ಮೂಲ ಕಾರಣ. ರಾಜ್ಯಸಭೆಯ ಚುನಾವಣಾ ರಣರಂಗದಲ್ಲಿ ಬಿಜೆಪಿಯನ್ನು ಸೋಲಿಸುವುದಕ್ಕಿಂತ, ತನ್ನ ಸ್ವಂತ ಶಾಸಕರನ್ನು ವಂಚನೆಯಿಂದ ತಡೆಯುವುದೇ ಕಾಂಗ್ರೆಸ್‌ ಪಾಲಿಗೆ ಇಂದಿಗೂ ಹಿಮಾಲಯದಷ್ಟೇ ದೊಡ್ಡ ಸವಾಲಾಗಿದೆ,(ಏಜೆನ್ಸೀಸ್​).