ಎನ್. ಚಂದ್ರಶೇಖರನ್ ಯೂಟರ್ನ್... ಮತ್ತೆ ಒಲಿದ ಟಾಟಾ ಸನ್ಸ್‌ ಅಧ್ಯಕ್ಷ ಗಾದಿ, 5 ವರ್ಷಗಳ ಹೊಸ ಅವಧಿಗೆ ಮಂಡಳಿ ಒಪ್ಪಿಗೆ! Tata Sons

ನವದೆಹಲಿ: ಟಾಟಾ ಸನ್ಸ್‌ ( Tata Sons ) ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದ ಎನ್. ಚಂದ್ರಶೇಖರನ್ ( N Chandrasekaran ) ಇದೀಗ ಯೂಟರ್ನ್​ ಹೊಡೆದಿದ್ದಾರೆ. ಟಾಟಾ ಸನ್ಸ್​ ಮಂಡಳಿಯು ಚಂದ್ರಶೇಖರನ್ ಅವರನ್ನು ಐದು ವರ್ಷದ ಅವಧಿಗೆ ಮತ್ತೊಮ್ಮೆ ಅಧ್ಯಕ್ಷರನ್ನಾಗಿ ನೇಮಕ ಮಾಡಿದೆ. ಕಳೆದ ತಿಂಗಳಷ್ಟೇ ತಾವಾಗಿಯೇ ಮರುನೇಮಕ ಬಯಸುವುದಿಲ್ಲ ಎಂಬ ತಮ್ಮ ನಿರ್ಧಾರವನ್ನು ಇದೀಗ ಸಂಪೂರ್ಣವಾಗಿ ಹಿಂಪಡೆದಿರುವುದು ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.

ಚಂದ್ರಶೇಖರನ್​ ಅವರನ್ನು ಮತ್ತೊಮ್ಮೆ ಅಧ್ಯಕ್ಷರನ್ನಾಗಿ ಮಾಡುವ ಮಂಡಳಿಯ ಮಹತ್ವದ ನಿರ್ಣಯಕ್ಕೆ ಎಲ್ಲಾ ಸದಸ್ಯರು ಬೆಂಬಲ ವ್ಯಕ್ತಪಡಿಸಿ ಪರವಾಗಿ ಮತ ಚಲಾಯಿಸಿದ್ದಾರೆ. ಆದರೆ, ಟಾಟಾ ಕುಟುಂಬದ ಪ್ರಮುಖ ಸದಸ್ಯರಾದ ನೋವೆಲ್ ಟಾಟಾ ಮಾತ್ರ ಈ ಪ್ರಸ್ತಾವನೆಯನ್ನು ವಿರೋಧಿಸಿ ವಿರುದ್ಧವಾಗಿ ಮತ ಚಲಾಯಿಸಿರುವುದು ವಿಶೇಷ ಗಮನ ಸೆಳೆದಿದೆ.

ಮಂಡಳಿಯ ಈ ತೀರ್ಮಾನದಲ್ಲಿ ಸ್ಪಷ್ಟ ಒಮ್ಮತ ಮೂಡಿದ್ದು, ನೋವೆಲ್ ಟಾಟಾರೊಬ್ಬರೇ ಚಂದ್ರಶೇಖರನ್ ಅವರ ಮುಂದುವರಿಕೆಯನ್ನು ವಿರೋಧಿಸಿದ ಏಕೈಕ ನಿರ್ದೇಶಕರಾಗಿದ್ದಾರೆ. ಈ ಒಂದು ಬೆಳವಣಿಗೆಯು ಟಾಟಾ ಸನ್ಸ್‌ ಒಳಗಿನ ಭಿನ್ನಾಭಿಪ್ರಾಯವನ್ನು ಎತ್ತಿ ತೋರಿಸಿದೆ.

2025ರ ಸೆಪ್ಟೆಂಬರ್‌ನಲ್ಲಿಯೇ ಟಾಟಾ ಸನ್ಸ್‌ ಮಂಡಳಿಯು ಚಂದ್ರಶೇಖರನ್​ ಅವರನ್ನು ಐದು ವರ್ಷಗಳ ಮತ್ತೊಂದು ಅವಧಿಗೆ ಮರುನೇಮಕ ಮಾಡಲು ಒಪ್ಪಿಕೊಂಡಿತ್ತು. ಆದರೆ, ಫೆಬ್ರವರಿ 2026ರಲ್ಲಿ ನಡೆದ ಸಭೆಯಲ್ಲಿ ಒಮ್ಮತ ಮೂಡದ ಕಾರಣ ನಿರ್ಣಯವನ್ನು ಮುಂದೂಡಲಾಗಿತ್ತು. ಬಳಿಕ ಮೇ ಮತ್ತು ಜೂನ್ ತಿಂಗಳ ಸಭೆಗಳಲ್ಲೂ ಈ ವಿಷಯ ಚರ್ಚೆಯಾದರೂ ಯಾವುದೇ ಅಂತಿಮ ತೀರ್ಮಾನಕ್ಕೆ ಬರಲು ಸಾಧ್ಯವಾಗಿರಲಿಲ್ಲ.

ಈ ಎಲ್ಲ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ ಆಗಸ್ಟ್ 12ರಂದು ಚಂದ್ರಶೇಖರನ್ ಅವರು ತಮ್ಮ ಪ್ರಸ್ತುತ ಅಧಿಕಾರಾವಧಿಯು ಮುಕ್ತಾಯಗೊಂಡ ಬಳಿಕ ಮರುನೇಮಕಕ್ಕೆ ಒಪ್ಪುವುದಿಲ್ಲ ಎಂದು ತಿಳಿಸಿದ್ದರು. ಆದರೆ, ಸೆಪ್ಟೆಂಬರ್ 3ರಂದು ನಡೆದ ನಾಮಿನೇಷನ್ ರೆಮ್ಯುರೇಷನ್ ಕಮಿಟಿ (NRC) ಸಭೆಯಲ್ಲಿ ಅವರ ಕೊಡುಗೆಯನ್ನು ಪರಿಗಣಿಸಿ, ಟಾಟಾ ಗುಂಪಿನ ಹಿತದೃಷ್ಟಿಯಿಂದ ತಮ್ಮ ನಿರ್ಧಾರವನ್ನು ಮರುಪರಿಶೀಲಿಸುವಂತೆ ಸರ್ವಾನುಮತದಿಂದ ಮನವಿ ಮಾಡಲು ನಿರ್ಧರಿಸಲಾಯಿತು.

ಗುರುವಾರ ನಡೆದ ಮಂಡಳಿಯ ಸಭೆಯಲ್ಲಿ ಚಂದ್ರಶೇಖರನ್ ಅವರು ಮಂಡಳಿಯ ಮನವಿಯನ್ನು ಪುರಸ್ಕರಿಸಿ ತಮ್ಮ ನಿರ್ಧಾರವನ್ನು ಬದಲಿಸಲು ಒಪ್ಪಿಕೊಂಡಿದ್ದಾರೆ. ಇದರ ಬೆನ್ನಲ್ಲೇ ಮಂಡಳಿಯು ಬಹುಮತದ ಮತದಾನದ ಮೂಲಕ ಅವರನ್ನು ಮುಂದಿನ ಐದು ವರ್ಷಗಳ ಅವಧಿಗೆ ಕಾರ್ಯಕಾರಿ ಅಧ್ಯಕ್ಷರಾಗಿ ಮರುನೇಮಕ ಮಾಡಲು ಅಧಿಕೃತವಾಗಿ ಅನುಮೋದಿಸಿದೆ. ಅಲ್ಲದೆ, ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಮಾರ್ಗಸೂಚಿಗಳನ್ನು ಪಾಲಿಸಲು ಮತ್ತು ಸಂಬಂಧಿತ ಷೇರು ಪಾಲುದಾರರ ಮಾರ್ಗದರ್ಶನ ಪಡೆಯಲು ಕ್ರಮಕೈಗೊಳ್ಳುವುದಾಗಿಯೂ ಕಂಪನಿ ತಿಳಿಸಿದೆ, (ಏಜೆನ್ಸೀಸ್​).