ನವದೆಹಲಿ: PNG(ಪೈಪ್ಡ್ ನ್ಯಾಚುರಲ್ ಗ್ಯಾಸ್) (Pipeline Gas)ಸೌಲಭ್ಯವಿರುವ ಗ್ರಾಹಕರು ಕಡ್ಡಾಯವಾಗಿ ಅದಕ್ಕೆ ಬದಲಾಗಬೇಕು, ಇಲ್ಲದಿದ್ದರೆ ಸಿಲಿಂಡರ್(LPG) ಪೂರೈಕೆಯನ್ನು ಶಾಶ್ವತವಾಗಿ ನಿಲ್ಲಿಸಲಾಗುವುದು ಎಂದು ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯವು ಮಾರ್ಚ್ 24 ರಂದು ಹೊಸ ಅದೇಶ ಹೊರಡಿಸಿದೆ
ದೇಶದ ಕೋಟ್ಯಂತರ ಮನೆಗಳ ಅಡುಗೆಮನೆಯ ಚಿತ್ರಣವೇ ಇನ್ನು ಮುಂದೆ ಬದಲಾಗಲಿದೆ. ನಿಮ್ಮ ಪ್ರದೇಶದಲ್ಲಿ PNG ಸೌಲಭ್ಯವಿದ್ದು, ನೀವು ಇನ್ನು ಕೂಡ ಎಲ್ಪಿಜಿ ಸಿಲಿಂಡರ್ ಬಳಸುತ್ತಿದ್ದರೆ, ನಿಮ್ಮ ಅಡುಗೆ ಅನಿಲದ ಸಂಪರ್ಕ ಕಡಿತಗೊಳ್ಳುವ ಭೀತಿ ಎದುರಾಗಿದೆ.
ಸರ್ಕಾರದ ಆದೇಶದ ಪ್ರಕಾರ, ಅಧಿಕೃತ ಸಂಸ್ಥೆಯು ನಿಮ್ಮ ಮನೆಗೆ ಪಿಎನ್ಜಿ ಸಂಪರ್ಕ ಲಭ್ಯವಿದೆ ಎಂದು ಮಾಹಿತಿ ನೀಡಿದ ದಿನದಿಂದ ಕೇವಲ ಮೂರು ತಿಂಗಳ ಕಾಲಾವಕಾಶ ಮಾತ್ರ ಇರುತ್ತದೆ. ಈ ಮೂರು ತಿಂಗಳ ಅವಧಿಯೊಳಗೆ ನೀವು ಪೈಪ್ಡ್ ಗ್ಯಾಸ್ ಸಂಪರ್ಕಕ್ಕೆ ಅರ್ಜಿ ಸಲ್ಲಿಸದಿದ್ದರೆ ಅಥವಾ ಬದಲಾಯಿಸಿಕೊಳ್ಳದಿದ್ದರೆ, ನಿಮ್ಮ ವಿಳಾಸಕ್ಕೆ ಬರುವ ಎಲ್ಪಿಜಿ ಪೂರೈಕೆಯನ್ನು ಸ್ಥಗಿತಗೊಳಿಸಲಾಗುತ್ತದೆ.
ಒಂದು ವೇಳೆ ತಾಂತ್ರಿಕ ಕಾರಣಗಳಿಂದಾಗಿ ನಿಮ್ಮ ಮನೆಗೆ ಪಿಎನ್ಜಿ ಸಂಪರ್ಕ ನೀಡಲು ಸಾಧ್ಯವಿಲ್ಲ ಎಂದು ಪೂರೈಕೆದಾರರು 'ನಿರಾಕ್ಷೇಪಣಾ ಪತ್ರ' (NOC) ನೀಡಿದರೆ ಮಾತ್ರ ಎಲ್ಪಿಜಿ ಮುಂದುವರಿಸಲು ಅವಕಾಶ ನೀಡಲಾಗುತ್ತದೆ.
ಈ ನಿರ್ಧಾರಕ್ಕೆ ಕಾರಣವೇನು?
ಪಶ್ಚಿಮ ಏಷ್ಯಾದಲ್ಲಿ (West Asia) ನಡೆಯುತ್ತಿರುವ ಯುದ್ಧದ ಪರಿಣಾಮವಾಗಿ ಜಾಗತಿಕವಾಗಿ ಎಲ್ಪಿಜಿ ಪೂರೈಕೆಯಲ್ಲಿ ಭಾರಿ ವ್ಯತ್ಯಯ ಉಂಟಾಗಿದೆ. ಭಾರತವು ಅಡುಗೆ ಅನಿಲಕ್ಕಾಗಿ ಹೆಚ್ಚಿನ ಪ್ರಮಾಣದಲ್ಲಿ ಆಮದನ್ನು ಅವಲಂಬಿಸಿರುವುದರಿಂದ, ಈ ಬಿಕ್ಕಟ್ಟನ್ನು ಎದುರಿಸಲು ಸರ್ಕಾರವು ಈ ಕಠಿಣ ಕ್ರಮಕ್ಕೆ ಮುಂದಾಗಿದೆ.
ಸಿಲಿಂಡರ್ ತಲುಪಿಸುವ ಜಂಜಾಟವಿಲ್ಲದೆ ನೇರವಾಗಿ ಪೈಪ್ಗಳ ಮೂಲಕ ಅನಿಲ ಪೂರೈಸುವುದು ಹೆಚ್ಚು ಸುಲಭ ಮತ್ತು ನಂಬಿಕಸ್ತ ಮಾರ್ಗವಾಗಿದೆ.
ನಗರ ಪ್ರದೇಶಗಳಲ್ಲಿ ಪಿಎನ್ಜಿ ಬಳಕೆಯನ್ನು ಉತ್ತೇಜಿಸುವ ಮೂಲಕ, ಉಳಿತಾಯವಾಗುವ ಎಲ್ಪಿಜಿಯನ್ನು ಪೈಪ್ಲೈನ್ ಇಲ್ಲದ ಗ್ರಾಮೀಣ ಭಾಗಗಳಿಗೆ ತಲುಪಿಸುವುದು ಸರ್ಕಾರದ ಗುರಿಯಾಗಿದೆ.
ಗ್ಯಾಸ್ ಪೈಪ್ಲೈನ್ಗೆ ವೇಗ: ಹೊಸ ನಿಯಮಗಳೇನು?
ಅಗತ್ಯ ವಸ್ತುಗಳ ಕಾಯ್ದೆಯಡಿ ಈ ಹೊಸ ನಿಯಮಗಳನ್ನು ಜಾರಿಗೊಳಿಸಲಾಗಿದ್ದು, ಪೈಪ್ಲೈನ್ ಅಳವಡಿಕೆಗೆ ಇದ್ದ ಅಡೆತಡೆಗಳನ್ನು ನಿವಾರಿಸಲಾಗಿದೆ:
ನಿಗದಿತ ಸಮಯದ ಅನುಮತಿ: ಪೈಪ್ಲೈನ್ ಹಾಕಲು ಅನುಮತಿಯನ್ನು ನಿಗದಿತ ಅವಧಿಯೊಳಗೆ ನೀಡಲೇಬೇಕು. ವಿಳಂಬವಾದರೆ ಅದನ್ನು 'ಅನುಮೋದಿಸಲಾಗಿದೆ' ಎಂದೇ ಪರಿಗಣಿಸಲಾಗುತ್ತದೆ.
ತ್ವರಿತ ಸಂಪರ್ಕ: ವಸತಿ ಸಮುಚ್ಚಯಗಳಲ್ಲಿ 3 ದಿನದೊಳಗೆ ಪ್ರವೇಶ ನೀಡಬೇಕು ಮತ್ತು ಕೇವಲ 48 ಗಂಟೆಗಳ ಒಳಗೆ ಪಿಎನ್ಜಿ ಸಂಪರ್ಕ ಕಲ್ಪಿಸಬೇಕು.
ಕಠಿಣ ದಂಡ: ಅನುಮೋದನೆ ಸಿಕ್ಕ 4 ತಿಂಗಳೊಳಗೆ ಕೆಲಸ ಆರಂಭಿಸದ ಕಂಪನಿಗಳ ಮೇಲೆ ಭಾರಿ ದಂಡ ವಿಧಿಸಲಾಗುತ್ತದೆ.
ತೈಲ ಕಾರ್ಯದರ್ಶಿಗಳ ಹೇಳಿಕೆ
ತೈಲ ಕಾರ್ಯದರ್ಶಿ ನೀರಜ್ ಮಿತ್ತಲ್ ಅವರು ಈ ನೀತಿಯನ್ನು "ಸಂಕಷ್ಟವನ್ನೇ ಅವಕಾಶವನ್ನಾಗಿ ಪರಿವರ್ತಿಸುವುದು" ಎಂದು ಕರೆದಿದ್ದಾರೆ. ವ್ಯವಹಾರದ ಪ್ರಕ್ರಿಯೆಗಳನ್ನು ಸುಗಮಗೊಳಿಸುವುದು ಮತ್ತು ದೇಶದ ಇಂಧನ ಭದ್ರತೆಯನ್ನು ಬಲಪಡಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ ಎಂದು ಅವರು ತಿಳಿಸಿದ್ದಾರೆ,(ಏಜೆನ್ಸೀಸ್).