ದೇಶದಲ್ಲಿ ಹೆಚ್ಚುತ್ತಿರುವ ಡಿಜಿಟಲ್ ಬಂಧನದ ಪ್ರಕರಣಗಳನ್ನು ಗಂಭೀರವಾಗಿ ಪರಿಗಣಿಸಿರುವ ಸುಪ್ರೀಂ ಕೋರ್ಟ್ ತನಿಖೆಯ ಹೊಣೆಯನ್ನು ಕೇಂದ್ರ ತನಿಖಾ ಸಂಸ್ಥೆ (ಸಿಬಿಐ)ಗೆ ವಹಿಸಿರುವುದು ಮಹತ್ವದ ಬೆಳವಣಿಗೆ.
ಸೈಬರ್ ವಂಚಕರ ಬ್ಯಾಂಕ್ ಖಾತೆಗಳನ್ನು ಕೃತಕ ಬುದ್ಧಿಮತ್ತೆ (ಎಐ) ನೆರವಿನಿಂದ ಫ್ರೀಜ್ ಮಾಡಲು ಸಾಧ್ಯವಿದೆಯೇ ಎಂದು ರಿಸರ್ವ್ ಬ್ಯಾಂಕ್ಗೆ (ಆರ್ಬಿಐ) ಕೋರ್ಟ್ ಪ್ರಶ್ನಿಸಿದೆ. ಹೂಡಿಕೆ, ಅರೆಕಾಲಿಕ ಉದ್ಯೋಗದ ಹೆಸರಿನಲ್ಲಿ ನಡೆಯುತ್ತಿರುವ ಅಪರಾಧಗಳ ಬಗ್ಗೆಯೂ ಸುಪ್ರೀಂ ಕೋರ್ಟ್ ಉಲ್ಲೇಖ ಮಾಡಿದೆ. ಇತ್ತೀಚಿನ ದಿನಗಳಲ್ಲಿ ಡಿಜಿಟಲ್ ಬಂಧನ ದೊಡ್ಡ ತಲೆನೋವಾಗಿ ಕಾಡುತ್ತಿದ್ದು, ಬೆದರಿಕೆಯಾಗಿ ಪರಿಣಮಿಸಿದೆ.
ಡಿಜಿಟಲ್ ಬಂಧನದಿಂದ ಭಾರತೀಯರು ಈವರೆಗೆ 3 ಸಾವಿರ ಕೋಟಿ ರೂಪಾಯಿಗಳಿಗಿಂತ ಹೆಚ್ಚಿನ ಮೊತ್ತವನ್ನು ಕಳೆದುಕೊಂಡಿರುವುದು, ಈ ಕರಾಳ ಜಾಲದ ಭೀಕರತೆಗೆ ಸಾ. 2024ರಲ್ಲಿ ಈ ಸಂಬಂಧ 1.24 ಲಕ್ಷ ದೂರುಗಳು ದಾಖಲಾಗಿವೆ. 2025ರ ಮೊದಲ ಎರಡು ತಿಂಗಳಲ್ಲೇ ಡಿಜಿಟಲ್ ಬಂಧನದ 17,718 ಟನೆಗಳು ವರದಿಯಾಗಿವೆ.
ಹೆಚ್ಚಾಗಿ ಹಿರಿಯ ನಾಗರಿಕರನ್ನು ಗುರಿಯಾಗಿಸಲಾಗುತ್ತಿದೆ. 78%ರಿಂದ 82% ಸಂತ್ರಸ್ತರು 60 ವರ್ಷ ಮೇಲ್ಪಟ್ಟವರೇ ಆಗಿದ್ದಾರೆ. ಹೊರದೇಶಗಳಿಂದಲೂ ಈ ಜಾಲಗಳು ಕಾರ್ಯನಿರ್ವಹಿಸುತ್ತಿದ್ದು, ತನಿಖೆಗೆ ಇಂಟರ್ಪೋಲ್ ನೆರವು ಪಡೆಯುವಂತೆ ನ್ಯಾಯಾಲಯ ಸೂಚಿಸಿದೆ. ಕಾಂಬೋಡಿಯಾ, ಲಾವೋಸ್ ಸೇರಿ ಹಲವು ದೇಶಗಳಿಂದ ಇಂಥ ಜಾಲಗಳು ಕಾರ್ಯನಿರ್ವಹಿಸುತ್ತಿದ್ದು, ಭಾರತೀಯ ತನಿಖಾ ಸಂಸ್ಥೆಗಳು ಅಲ್ಲಿಯವರೆಗೆ ತಲುಪುವುದು ಮತ್ತು ಆ ದೇಶಗಳಲ್ಲಿ ತನಿಖೆಗೆ ಸಹಕಾರ ಪಡೆಯುವುದು ಸವಾಲಾಗಿ ಪರಿಣಮಿಸಿದೆ.
ಮೊದಲ ಆದ್ಯತೆಯಾಗಿ ಸಿಬಿಐ ಡಿಜಿಟಲ್ ಬಂಧನದ ಪ್ರಕರಣಗಳನ್ನು ತನಿಖೆಗೆ ಕೈಗೆತ್ತಿಕೊಳ್ಳಲಿದೆ. ಬಳಿಕ, ಸೈಬರ್ ಅಪರಾಧ ಮತ್ತು ಡಿಜಿಟಲ್ ವಂಚನೆಯ ಇತರ ಪ್ರಕರಣಗಳ ಕಡೆಗೆ ಗಮನ ವಹಿಸಲಿದೆ. ಯಾವ ರಾಜ್ಯಗಳಲ್ಲಿ ಸಿಬಿಐ ತನಿಖೆಗೆ ಅನುಮತಿ ನೀಡಿಲ್ಲವೋ ಅಂಥ ಕಡೆಗಳಲ್ಲಿ ಆಯಾ ರಾಜ್ಯ ಸರ್ಕಾರ ತನಿಖೆಗೆ ಅನುಮತಿ ನೀಡುವಂತೆ ನ್ಯಾಯಾಲಯ ಸೂಚಿಸಿದೆ. ಡಿಜಿಟಲ್ ಬಂಧನದ ಪ್ರಕರಣಗಳಿಂದ ಜನರು ಹಣವಷ್ಟೇ ಕಳೆದುಕೊಂಡಿಲ್ಲ, ನೆಮ್ಮದಿಯನ್ನೂ ಕಳೆದುಕೊಂಡು ಖಿನ್ನತೆಯಿಂದ ಬಳಲುತ್ತಿದ್ದಾರೆ. ಡಿಜಟಿಲ್ ಬಂಧನದ ಹೆಚ್ಚು ಪ್ರಕರಣಗಳು ಬಿಹಾರ ಮತ್ತು ಕರ್ನಾಟಕದಲ್ಲಿ ದಾಖಲಾಗಿವೆ. ಡಿಜಿಟಲ್ ಯುಗದ ಈ ನವಪಿಡುಗಿನ ವಿರುದ್ಧ ಈಗ ಪರಿಣಾಮಕಾರಿ ಹೋರಾಟ ಅಗತ್ಯವಾಗಿದೆ. ಜನರು ಕೂಡ ವಂಚಕರ ಕರೆ ಬಂದಾಗ ಆತಂಕಗೊಳ್ಳದೆ, ಸಹಾಯವಾಣಿ (1930)ಯನ್ನು ಸಂಪರ್ಕಿಸಬೇಕು. ಹಿರಿಯ ನಾಗರಿಕರು ಹೆಚ್ಚು ಎಚ್ಚರಿಕೆ ವಹಿಸಬೇಕು. ಸಿಬಿಐನ ತನಿಖೆಯಿಂದ ದುರುಳ ವಂಚಕರು ಕಾನೂನಿನ ಕಟಕಟೆಗೆ ಬರುವಂತಾಗಲಿ.