'ಹಳೇ ತಪ್ಪುಗಳಿಂದ NTA ಇನ್ನೂ ಪಾಠ ಕಲಿತಿಲ್ಲ'; NEET ಪೇಪರ್ ಲೀಕ್ ಸಂಬಂಧ ಸುಪ್ರೀಂ ಕೋರ್ಟ್ ಬೇಸರ

National Testing Agency ಬದಲಾಯಿಸಬೇಕು. ನ್ಯಾಯಾಂಗದ ಉಸ್ತುವಾರಿಯಲ್ಲಿ ಮರುಪರೀಕ್ಷೆ ನಡೆಸಬೇಕು ಎಂದು ಕೋರಿ ಸಲ್ಲಿಕೆಯಾಗಿದ್ದ ಅರ್ಜಿಯ ವಿಚಾರಣೆ ವೇಳೆ ಕೋರ್ಟ್​ ಈ ಆದೇಶ ಹೊರಡಿಸಿದೆ ಅಖಿಲ ಭಾರತ ವೈದ್ಯಕೀಯ ಸಂಘಗಳ ಒಕ್ಕೂಟ (FAIMA) ಈ ಅರ್ಜಿಯನ್ನು ಸಲ್ಲಿಸಿದ್ದು, ನೀಟ್ ಪರೀಕ್ಷೆ ನಡೆಸುವಲ್ಲಿ ಎನ್‌ಟಿಎ ಸಂಸ್ಥೆಯು ವ್ಯವಸ್ಥಿತವಾಗಿ ವಿಫಲವಾಗಿದೆ ಎಂದಿದೆ.

 ದೇಶದ ಅತ್ಯಂತ ಪ್ರಮುಖ ವೈದ್ಯಕೀಯ ಪ್ರವೇಶ ಪರೀಕ್ಷೆಯ ವಿಶ್ವಾಸಾರ್ಹತೆಯನ್ನು ಉಳಿಸಲು ಎನ್‌ಟಿಎ ಸಂಸ್ಥೆಯನ್ನು ಬದಲಾಯಿಸಬೇಕು ಅಥವಾ ಮೂಲಭೂತವಾಗಿ ಪುನರ್​ರಚನೆ ಮಾಡಬೇಕು. ಉಸ್ತುವಾರಿಯಲ್ಲೇ ಪಾರದರ್ಶಕವಾಗಿ ಹೊಸ ಪರೀಕ್ಷೆಯನ್ನು ನಡೆಸಬೇಕು ಎಂದು ಅಡ್ವೊಕೇಟ್ ತನ್ವಿ ದುಬೆ ಅವರ ಮೂಲಕ ಅರ್ಜಿ ಸಲ್ಲಿಸಲಾಗಿತ್ತು.

ವೈದ್ಯಕೀಯ ಪ್ರವೇಶಾತಿಗಾಗಿ ನಡೆಯುವ ನೀಟ್​  ಪರೀಕ್ಷೆಯ ಪೇಪರ್​ ಪದೇ ಪದೇ ಲೀಕ್ ಹಗರಣಗಳಿಂದಾಗಿ ಧಕ್ಕೆಯಾಗುತ್ತಿರುವುದನ್ನು  ಕೋರ್ಟ್​ ಗಂಭೀರವಾಗಿ ಪರಿಗಣಿಸಿದೆ. ಮುಂದಿನ ಭವಿಷ್ಯದ  ವೈದ್ಯರನ್ನು ನಿರ್ಣಯಿಸುವ ಇಂತಹ ಪರೀಕ್ಷೆಗಳಲ್ಲಿ ವ್ಯವಸ್ಥಿತ ಅಕ್ರಮಗಳು ನಡೆಯುತ್ತಿರುವುದು ಇಡೀ ಶಿಕ್ಷಣ ಮತ್ತು ಪರೀಕ್ಷಾ ಮಂಡಳಿಯ ವೈಫಲ್ಯವನ್ನು ಎತ್ತಿ ತೋರಿಸುತ್ತದೆ.

ಲಕ್ಷಕ್ಕೂ ಹೆಚ್ಚು ಆಕಾಂಕ್ಷಿಗಳು ಹಗಲು-ಇರುಳು ಎನ್ನದೆ ಪರೀಕ್ಷೆಗೆ ಶ್ರಮಪಟ್ಟು ಸಿದ್ಧರಾಗುತ್ತಾರೆ. ಆದರೆ ಈ ರೀತಿಯ ಪೇಪರ್ ಲೀಕ್ ಪ್ರಕರಣಗಳಿಂದ ಅವರ ಭವಿಷ್ಯದ ಮೇಲೆ ಭರವಸೆಯನ್ನಿಟ್ಟುಕೊಳ್ಳುವ ಸಂಬಂಧ ಅವರು ಕುಗ್ಗುತ್ತಾರೆ. ವ್ಯವಸ್ಥೆಯು ಕಟ್ಟುನಿಟ್ಟಿನ ಸುರಕ್ಷತಾ ಕ್ರಮಗಳನ್ನು ತೆಗೆದುಕೊಳ್ಳುವಲ್ಲಿ ವಿಫಲವಾಗಿರುವುದು ಅತ್ಯಂತ ಕಳವಳಕಾರಿ. 

ನಿವೃತ್ತ ಸುಪ್ರೀಂ ಕೋರ್ಟ್ ನ್ಯಾಯಾಧೀಶರ ನೇತೃತ್ವದಲ್ಲಿ ಸೈಬರ್ ಭದ್ರತಾ ತಜ್ಞರು ಮತ್ತು ವಿಧಿವಿಜ್ಞಾನ ವಿಜ್ಞಾನಿಗಳನ್ನು ಒಳಗೊಂಡ ಉನ್ನತಾಧಿಕಾರ ಉಸ್ತುವಾರಿ ಸಮಿತಿಯನ್ನು ರಚಿಸಬೇಕು. ಹೊಸ ಸ್ವಾಯತ್ತ ಸಂಸ್ಥೆ ರಚನೆಯಾಗುವವರೆಗೆ ಈ ಸಮಿತಿಯೇ ಮರುಪರೀಕ್ಷೆಯ ಉಸ್ತುವಾರಿ ವಹಿಸಬೇಕು.

ನ್ಯಾಯಾಲಯದಿಂದ ನೇಮಕಗೊಂಡ ಈ ಉನ್ನತಾಧಿಕಾರ ಸಮಿತಿಯು ಮರುಪರೀಕ್ಷೆಯ ಭದ್ರತಾ ಪ್ರಕ್ರಿಯೆಯನ್ನು ಸಂಪೂರ್ಣವಾಗಿ ಪರಿಶೀಲಿಸಿ, ಪ್ರಮಾಣೀಕರಿಸಿದ ನಂತರವೇ ಪರೀಕ್ಷೆ ನಡೆಸಬೇಕು. ಪ್ರಶ್ನೆಪತ್ರಿಕೆಗಳನ್ನು ಸಾಗಿಸುವಾಗ ಎದುರಾಗುವ ಭೌತಿಕ ಭದ್ರತಾ ಲೋಪಗಳನ್ನು ತಡೆಗಟ್ಟಲು, ಪ್ರಶ್ನೆಪತ್ರಿಕೆಗಳಿಗೆ 'ಡಿಜಿಟಲ್ ಲಾಕಿಂಗ್' ವ್ಯವಸ್ಥೆ ತರಬೇಕು ಹಾಗೂ ಪರೀಕ್ಷೆಯನ್ನು ಕಂಪ್ಯೂಟರ್ ಆಧಾರಿತ ಪರೀಕ್ಷೆ ಮಾದರಿಗೆ ಬದಲಾಯಿಸಬೇಕು ಎನ್ನುವುದು ಬೇಡಿಕೆಯಾಗಿದೆ, (ಏಜೆನ್ಸೀಸ್).