ವಾಷಿಂಗ್ಟನ್: ಅಮೆರಿಕಾದ ಬಹುತೇಕ ರಾಜ್ಯಗಳಲ್ಲಿ ಬೀಸುತ್ತಿರುವ ಪ್ರಬಲ ಶೀತಗಾಳಿ ಮತ್ತು ವಿಪರೀತ ಹಿಮಪಾತದಿಂದಾಗಿ ಸಾರಿಗೆ ವ್ಯವಸ್ಥೆ ಸ್ತಬ್ಧಗೊಂಡಿದೆ. ವರದಿಗಳ ಪ್ರಕಾರ, ಶನಿವಾರ ಮತ್ತು ಭಾನುವಾರದ ಅವಧಿಯಲ್ಲಿ ಸುಮಾರು 13,000ಕ್ಕೂ ಹೆಚ್ಚು ವಿಮಾನಗಳ ಹಾರಾಟವನ್ನು (Flights Cancelled) ರದ್ದುಗೊಳಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ನ್ಯೂ ಮೆಕ್ಸಿಕೋದಿಂದ ನ್ಯೂ ಇಂಗ್ಲೆಂಡ್ವರೆಗೆ ವ್ಯಾಪಿಸಿರುವ ಈ ಬಿರುಗಾಳಿಗೆ ಸುಮಾರು 14 ಕೋಟಿ ಜನರು ತತ್ತರಿಸಿದ್ದಾರೆ. ಆದಾಗ್ಯೂ, ಶನಿವಾರದಿಂದ ಸೋಮವಾರದವರೆಗೆ ದಕ್ಷಿಣ ರಾಕಿ ಪರ್ವತಗಳಿಂದ ನ್ಯೂ ಇಂಗ್ಲೆಂಡ್ವರೆಗೆ ಭಾರೀ ಹಿಮಪಾತ ಮತ್ತು ಘನೀಕರಿಸುವ ಮಳೆಯ ಮುನ್ಸೂಚನೆ ನೀಡಿದ್ದು, ಜನರು ಈ ಶೀತ ದಿನಗಳನ್ನು ಎದುರಿಸಲು ಸಿದ್ಧರಾಗಿರಿ ಎಂದು ರಾಷ್ಟ್ರೀಯ ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.
ಹಿಮ ಮತ್ತು ಮಂಜುಗಡ್ಡೆ ಕರಗುವುದು ಬಹಳ ನಿಧಾನವಾಗಿದ್ದು, ಇದು ಬೇಗನೆ ಹೋಗುವುದಿಲ್ಲ. ಇದು ಮೂಲಸೌಕರ್ಯಗಳ ದುರಸ್ತಿ ಮತ್ತು ಯಾವುದೇ ಚೇತರಿಕೆ ಪ್ರಯತ್ನಗಳಿಗೆ ದೊಡ್ಡ ಅಡ್ಡಿಯಾಗಲಿದೆ ಎಂದು ರಾಷ್ಟ್ರೀಯ ಹವಾಮಾನ ಸೇವೆಯ ಹವಾಮಾನಶಾಸ್ತ್ರಜ್ಞ ಆಲಿಸನ್ ಸ್ಯಾಂಟೊರೆಲ್ಲಿ ಎಚ್ಚರಿಸಿದ್ದಾರೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಶನಿವಾರದ ವೇಳೆಗೆ ಕನಿಷ್ಠ ಒಂದು ಡಜನ್ ರಾಜ್ಯಗಳಿಗೆ ತುರ್ತು ಘೋಷಣೆಗಳನ್ನು ಅನುಮೋದಿಸಿದ್ದಾರೆ. ಆದಾಗ್ಯೂ, ಫೆಡರಲ್ ತುರ್ತುಸ್ಥಿತಿ ನಿರ್ವಹಣಾ ಸಂಸ್ಥೆಯು ಕೆಲವೊಂದು ರಾಜ್ಯಗಳಲ್ಲಿ ಸರಕುಗಳು, ಸಿಬ್ಬಂದಿ ಮತ್ತು ಶೋಧ ಮತ್ತು ರಕ್ಷಣಾ ತಂಡವನ್ನು ಇರಿಸಿದೆ. ಈ ಬಿರುಗಾಳಿಯನ್ನು ಎದುರಿಸಲು ಎಲ್ಲರೂ ಬುದ್ಧಿವಂತರಾಗಿರಬೇಕು. ಹಾಗಾಗಿ ಸಾಧ್ಯವಾದರೆ, ಪ್ರತಿಯೊಬ್ಬರೂ ಮನೆಯಲ್ಲಿಯೇ ಇರಿ ಎಂದು ಹೋಮ್ಲ್ಯಾಂಡ್ ಸೆಕ್ಯುರಿಟಿ ಕಾರ್ಯದರ್ಶಿ ಕ್ರಿಸ್ಟಿ ನೋಯೆಮ್ ಹೇಳಿದ್ದಾರೆ.
ಒಂದೆಡೆ ಹಿಮದ ಅಬ್ಬರ ಮುಂದುವರಿದಿದ್ದರೆ, ಇನ್ನೊಂದೆಡೆ ಹಾನಿಗೊಳಗಾದ ಮೂಲಸೌಕರ್ಯಗಳನ್ನು ಸರಿಪಡಿಸುವ ಕೆಲಸ ನಡೆಯುತ್ತಿದೆ. ದಕ್ಷಿಣದ ಕೆಲವು ರಾಜ್ಯಗಳಲ್ಲಿ ತುರ್ತು ಸೇವಾ ಸಿಬ್ಬಂದಿಗಳು ಕಾರ್ಯಾಚರಣೆಗೆ ಇಳಿದಿದ್ದು, ಹಿಮದಿಂದ ಮುರಿದು ಬಿದ್ದಿರುವ ವಿದ್ಯುತ್ ತಂತಿಗಳನ್ನು ಪುನಃಸ್ಥಾಪಿಸಲು ಸಿಬ್ಬಂದಿಗಳು ಮೈಕೊರೆಯುವ ಚಳಿಯನ್ನೂ ಲೆಕ್ಕಿಸದೆ ಶ್ರಮಿಸುತ್ತಿದ್ದಾರೆ.
ಚಂಡಮಾರುತದ ತೀವ್ರತೆಯನ್ನು ಗಮನದಲ್ಲಿಟ್ಟುಕೊಂಡು ನ್ಯೂಜೆರ್ಸಿ ಸರ್ಕಾರವು ಜನಸಾಮಾನ್ಯರ ಸುರಕ್ಷತೆಗಾಗಿ ಕಠಿಣ ಕ್ರಮಗಳನ್ನು ಕೈಗೊಂಡಿದೆ. ಶನಿವಾರ ತುರ್ತು ಪರಿಸ್ಥಿತಿಯ ಕುರಿತು ಮಾತನಾಡಿದ ಗವರ್ನರ್ ಮಿಕಿ ಶೆರಿಲ್, ಪರಿಸ್ಥಿತಿಯ ಗಂಭೀರತೆಯನ್ನು ವಿವರಿಸಿದ್ದು, ನಾವು ಈ ವರ್ಷ ಎಂದಿಗೂ ನೋಡಿರದ ರೀತಿಯ ಭೀಕರ ಚಂಡಮಾರುತವನ್ನು ಎದುರಿಸುತ್ತಿದ್ದೇವೆ. ಹಾಗಾಗಿ ಹೆದ್ದಾರಿಗಳಲ್ಲಿ ಸಂಚರಿಸುವ ವಾಹನಗಳಿಗೆ ಗರಿಷ್ಠ 35 mph (56 kph) ವೇಗದ ಮಿತಿಯನ್ನು ನಿಗದಿಪಡಿಸಲಾಗಿದೆ ಎಂದು ಹೇಳಿದರು (ಏಜೆನ್ಸೀಸ್).