ತೂತುಕುಡಿ: ತಮಿಳುನಾಡಿನ ತೂತುಕುಡಿ ಜಿಲ್ಲೆಯ ಸೆಯ್ಯೆದುಂಗನಲ್ಲೂರು ರೈಲ್ವೆ ಗೇಟ್ ಪ್ರದೇಶದಲ್ಲಿ, ಕೌಟುಂಬಿಕ ಪ್ರತಿಷ್ಠೆಯ ಹೆಸರಿನಲ್ಲಿ ಸಹೋದರನೊಬ್ಬ ತನ್ನ ಸ್ವಂತ ಸಹೋದರಿಯನ್ನು ಕೊಲೆಗೈದಿರುವ(Murder) ಘಟನೆ ಬೆಳಕಿಗೆ ಬಂದಿದೆ.
ಮೃತ ಮಹಿಳೆಯನ್ನು 35 ವರ್ಷದ ಷಣ್ಮುಗತೈ ಅಲಿಯಾಸ್ ಸುಮಿತ್ರಾ ಎಂದು ಗುರುತಿಸಲಾಗಿದೆ. ಈಕೆ ಕಳೆದ ಒಂದು ವರ್ಷದಿಂದ ಪತಿಯಿಂದ ಭಿನ್ನಾಭಿಪ್ರಾಯಗಳ ಕಾರಣಕ್ಕಾಗಿ ಪ್ರತ್ಯೇಕವಾಗಿ ವಾಸಿಸುತ್ತಿದ್ದರು. ಸುಮಿತ್ರಾಳ ಸಹೋದರ, ಪುಲಿಯಂಗುಲಂನ ನಿವಾಸಿ ಮುತ್ತುರಾಜ, ತನ್ನ ಸಹೋದರಿಯ ಅಕ್ರಮ ಸಂಬಂಧದ ಬಗ್ಗೆ ತಿಳಿದುಕೊಂಡಿದ್ದನು. ಇದಕ್ಕಾಗಿ ಅವನು ತನ್ನ ಸಹೋದರಿಯನ್ನು ಆಗಾಗ್ಗೆ ಗದರಿಸುತ್ತಿದ್ದ ಮತ್ತು ಈ ವಿಷಯವಾಗಿ ಇಬ್ಬರ ನಡುವೆ ನಿರಂತರವಾಗಿ ಜಗಳಗಳು ನಡೆಯುತ್ತಿದ್ದವು.
ಈ ಅಕ್ರಮ ಸಂಬಂಧ ಕುಟುಂಬಕ್ಕೆ ದೊಡ್ಡ ಅವಮಾನ ಎಂದು ಭಾವಿಸಿದ ಮುತ್ತುರಾಜ, ತನ್ನ ಸಹೋದರಿಯನ್ನು ಕೊಲ್ಲಲು ನಿರ್ಧರಿಸಿದನು. ಕೊಲೆ ನಡೆದ ರಾತ್ರಿ, ಮುತ್ತುರಾಜ ತನ್ನ ಸ್ನೇಹಿತ ವಸಂತ್ ಜೊತೆ ಬೈಕ್ನಲ್ಲಿ ಸುಮಿತ್ರಾಳ ಮನೆಗೆ ಬಂದನು. ಯೋಜನೆಯಂತೆ ವಸಂತ್ ಮನೆಯ ಹೊರಗೆ ಕಾವಲು ಕಾಯುತ್ತಿದ್ದರೆ, ಮುತ್ತುರಾಜ ಒಳಗೆ ಹೋಗಿ ಸುಮಿತ್ರಾಳ ಜೊತೆ ಮತ್ತೊಮ್ಮೆ ಜಗಳವಾಡಿದನು. ಜಗಳ ತೀವ್ರಗೊಳ್ಳುತ್ತಿದ್ದಂತೆ, ಕೋಪಗೊಂಡ ಮುತ್ತುರಾಜ ತಾನು ಅಡಗಿಸಿ ತಂದಿದ್ದ ಕುಡುಗೋಲಿನಿಂದ ಸಹೋದರಿಯ ಮೇಲೆ ನಿರ್ದಯವಾಗಿ ಹಲ್ಲೆ ನಡೆಸಿದ್ದಾನೆ. ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಸುಮಿತ್ರಾ ಸ್ಥಳದಲ್ಲೇ ಸಾವನ್ನಪ್ಪಿದರು. ಕೊಲೆಯ ನಂತರ ಮುತ್ತುರಾಜ ಮತ್ತು ವಸಂತ್ ಸ್ಥಳದಿಂದ ಪರಾರಿಯಾಗಿದ್ದರು.
ಬಂಧನ
ಸೆಯ್ಯೆದುಂಗನಲ್ಲೂರು ಪೊಲೀಸ್ ಠಾಣೆಯ ಪೊಲೀಸರು ಸ್ಥಳಕ್ಕೆ ಧಾವಿಸಿ, ಸುಮಿತ್ರಾ ಅವರ ದೇಹವನ್ನು ಮರಣೋತ್ತರ ಪರೀಕ್ಷೆಗಾಗಿ ಸರ್ಕಾರಿ ಆಸ್ಪತ್ರೆಗೆ ಕಳುಹಿಸಿದರು. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು, ತಲೆಮರೆಸಿಕೊಂಡಿದ್ದ ಮುತ್ತುರಾಜ ಮತ್ತು ವಸಂತ್ ಇಬ್ಬರನ್ನೂ ಕೆಲವೇ ಗಂಟೆಗಳಲ್ಲಿ ಬಂಧಿಸಿದ್ದಾರೆ. ಸದ್ಯ ಇಬ್ಬರ ವಿಚಾರಣೆ ನಡೆಯುತ್ತಿದೆ,(ಏಜೆನ್ಸೀಸ್).