ಷರಿಯಾ ನ್ಯಾಯಾಲಯಗಳ ವಿಚ್ಛೇದನ ಅಧಿಕಾರದ ಕುರಿತು ಹೈಕೋರ್ಟ್ ನೀಡಿದ ಆದೇಶವನ್ನು ಸೂಚಿಸುವ ಸಾಂಕೇತಿಕ ಚಿತ್ರ.
ರಾಯ್ಪುರ್: ಷರಿಯಾ ನ್ಯಾಯಾಲಯ (Sharia Court) ದಂತಹ ಖಾಸಗಿ ಧಾರ್ಮಿಕ ಸಂಸ್ಥೆಗಳು ಧಾರ್ಮಿಕ ಸಲಹೆಗಳನ್ನು ನೀಡಬಹುದೇ ಹೊರತು, ವಿಚ್ಛೇದನ ನೀಡುವ ಕಾನೂನುಬದ್ಧ ನ್ಯಾಯಾಲಯದ ಸ್ಥಾನಮಾನವನ್ನು ಹೊಂದಿಲ್ಲವೆಂದು ಇತ್ತೀಚೆಗೆ ಛತ್ತೀಸ್ಗಢ ಹೈಕೋರ್ಟ್ ಆದೇಶಿಸಿದೆ.
ಕೆಲ ದಿನಗಳ ಹಿಂದೆ, ರಾಯ್ಪುರ್ದಲ್ಲಿರುವ ಷರಿಯಾ ನ್ಯಾಯಾಲಯವೊಂದು, ವೈವಾಹಿಕ ಪ್ರಕರಣಕ್ಕೆ ಸಂಬಂಧಿಸಿದಂತೆ ವಿಚ್ಛೇದನಕ್ಕೆ ಅನುಮತಿ ನೀಡಿ ಆದೇಶಿಸಿತ್ತು. ಇದನ್ನು ಪ್ರಶ್ನಿಸಿ ಮಹಿಳೆ ಹೈಕೋರ್ಟ್ ಮೆಟ್ಟಲೇರಿದ್ದಳು.
ಪ್ರಕರಣದ ವಿಚಾರಣೆ ನಡೆಸಿದ ಹೈಕೋರ್ಟ್ ನ್ಯಾಯಪೀಠ, ಧಾರ್ಮಿಕ ನ್ಯಾಯಾಲಗಳು ಧರ್ಮಕ್ಕೆ ಸಂಬಂಧಿಸಿದ ವಿಚಾರಗಳನ್ನು ಹಾಗೂ ಅನಿಸಿಕೆಗಳನ್ನು ತಿಳಿಸಬಹುದೇ ಹೊರತು ಕಾನೂನುಬದ್ಧವಾಗಿ ಸ್ಥಾಪಿತವಾಗಿರುವ ನ್ಯಾಯಾಲಯದಂತೆ ತೀರ್ಪನ್ನು ನೀಡಲು ಅವಕಾಶವಿಲ್ಲ ಎಂದು ಆದೇಶಿಸಿದೆ.
ಪ್ರಕರಣದ ಹಿನ್ನಲೆ!
ಹೈಕೋರ್ಟ್ ಮೆಟ್ಟಿಲೇರಿರುವ 38 ವರ್ಷದ ನಿರೋಶ್ ಅಬ್ಬಾಸಿ ಎಂಬ ಮಹಿಳೆಯ ಮೊದಲ ಪತಿ 2015 ರಲ್ಲಿ ಮರಣ ಹೊಂದಿದ್ದು, ಈಕೆ 2020 ರಲ್ಲಿ ಮೊಹಮ್ಮದ್ ಆಬಿದ್ ಖಾನ್ ಎಂಬಾತನನ್ನು ಮದುವೆಯಾಗಿದ್ದಳು. ಆದರೆ, ಮೊದಲ ಪತಿಯಿಂದ ಪಡೆದ ಮಕ್ಕಳಿಗೆ ಸಂಬಂಧಿಸಿದಂತೆ ಎರಡನೇ ಗಂಡನ ಮನೆಯಲ್ಲಿ ನಿರಂತರ ಜಗಳ, ಮಾನಸಿಕ ಹಾಗೂ ದೈಹಿಕ ಹಲ್ಲೆ ನಡೆಯುತ್ತಿದ್ದವೆಂದು ನಿರೋಶ್ ತಿಳಿಸಿದ್ದಾಳೆ.
2021 ರಲ್ಲಿ ಈಕೆಯ ಪತಿ ಫೋನ್ ಕರೆ ಮೂಲಕ ತ್ರಿವಳಿ ತಲಾಖ್ ಅನ್ನು ನೀಡಿದ್ದಾನೆಂದು ನಿರೋಶ್ ಆರೋಪಿಸಿದ್ದು, ಮನೆಯಲ್ಲಿ ಅತ್ತೆ-ಮಾವ ಮತ್ತು ಪತಿ ಕಿರುಕುಳ ನೀಡುತ್ತಾರೆಂದು 2021 ಅಕ್ಟೋಬರ್ನಲ್ಲಿ ನಿರೋಶ್ ಪೊಲೀಸ್ ದೂರನ್ನು ನೀಡಿದ್ದಾಳೆ.
ನಂತರ ಜನವರಿ 18, 2022 ರಂದು ಷರಿಯಾ ನ್ಯಾಯಾಲಯ ನಿರೋಶ್ ಅಬ್ಬಾಸ್ಗೆ ಮೊಹಮ್ಮದ್ ಆಬಿದ್ ಖಾನ್ ವಿಚ್ಛೇದನ ನೀಡಬೇಕೆಂದು ಆದೇಶಿಸಿತ್ತು. ಈ ಆದೇಶವನ್ನು ಪ್ರಶ್ನಿಸಿ ನಿರೋಶ್ ಅಬ್ಬಾಸ್ ಹೈಕೋರ್ಟ್ ಮೆಟ್ಟೆಲೇರಿದ್ದು, ನ್ಯಾಯಪೀಠ ಷರಿಯಾ ನ್ಯಾಯಾಲಯ ನೀಡಿದ್ದ ತೀರ್ಪು ಅಮಾನ್ಯವೆಂದು, ತೀರ್ಪನ್ನು ನೀಡಲು ಅಧಿಕಾರವೇ ಇಲ್ಲವೆಂದು ಆದೇಶದಲ್ಲಿ ತಿಳಿಸಿದೆ, (ಏಜನ್ಸೀಸ್).