Tirupati Donation > ಒಂದೇ ದಿನದಲ್ಲಿ 97 ಕೋಟಿ ದೇಣಿಗೆ ಹರಿದು ಕಾರಣವಾದ ಆ ನಿಯಮ ಏನು ಗೊತ್ತಾ..?
Tirupati Donation: ತಿರುಪತಿಯ ಶ್ರೀ ವೆಂಕಟೇಶ್ವರ ಸ್ವಾಮಿ ದೇವಾಲಯದಲ್ಲಿ ಮಂಗಳವಾರ ದೇಣಿಗೆ ನೀಡಲು ಭಕ್ತರ ನಡುವೆ ತೀವ್ರ ನೂಕುನುಗ್ಗಲು ಉಂಟಾಗಿದ್ದು, ಕೇವಲ 24 ಗಂಟೆಗಳಲ್ಲಿ ದೇವಸ್ಥಾನದ ಮಂಡಳಿಯು ಬರೋಬ್ಬರಿ 96.98 ಕೋಟಿ ರೂಪಾಯಿ ದಾಖಲೆಯ ದೇಣಿಗೆಯನ್ನು ಸಂಗ್ರಹಿಸಿದೆ. ಆದರೆ, ಈ ಹಠಾತ್ ದೇಣಿಗೆಯ ಮಹಾಪೂರವು ಯಾವುದೇ ಆಕಸ್ಮಿಕ ಬೆಳವಣಿಗೆಯಲ್ಲ. ಜುಲೈ 15ರ ಮಧ್ಯರಾತ್ರಿಯಿಂದ ಜಾರಿಗೆ ಬಂದ ನೂತನ ದಾನಿಗಳ ನೀತಿ ಜಾರಿಯಾಗುವ ಮುನ್ನವೇ ತಮ್ಮ ಕಾಣಿಕೆಗಳನ್ನು ಸಲ್ಲಿಸಲು ದಾನಿಗಳು ಹೀಗೆ ಮುಗಿಬಿದ್ದಿದ್ದರು ಎನ್ನಲಾಗಿದೆ.
ಈ ಪರಿಷ್ಕೃತ ನೀತಿಯು ದಾನಿಗಳಿಗೆ ನೀಡಲಾಗುವ ಸೌಲಭ್ಯಗಳು ಮತ್ತು ವಿಐಪಿ ಹಕ್ಕುಗಳನ್ನು ಸಂಪೂರ್ಣವಾಗಿ ಬದಲಾಯಿಸುವುದು ಮಾತ್ರವಲ್ಲದೆ, ದಾನಿಗಳು ಇಲ್ಲಿಯವರೆಗೆ ಅನುಭವಿಸುತ್ತಿದ್ದ ಆಜೀವ ಸೌಲಭ್ಯಗಳನ್ನು ರದ್ದುಗೊಳಿಸಿದೆ. ಆದರೆ ಹಳೆಯ ದಾನಿಗಳಿಗೆ (ಅಂದರೆ ಜುಲೈ 15ರ ಮಧ್ಯರಾತ್ರಿಗೂ ಮುನ್ನ ದೇಣಿಗೆ ನೀಡಿದವರಿಗೆ) ಲೈಫ್ಟೈಮ್ ಸೌಲಭ್ಯಗಳು ಮುಂದುವರಿಯಲಿವೆ. ಮಂಗಳವಾರ ಗಡಿಯಾರದಲ್ಲಿ ರಾತ್ರಿ 12 ಗಂಟೆಯಾಗುವ ಮುನ್ನವೇ ಈ ಪ್ರಮಾಣದ ಅಭೂತಪೂರ್ವ ದೇಣಿಗೆ ಹರಿದುಬರಲು ಇದೇ ಮುಖ್ಯ ಕಾರಣವಾಗಿದೆ.
24 ಗಂಟೆಯಲ್ಲಿ 97 ಕೋಟಿ ರೂ. ದೇಣಿಗೆ!
ಡೆಕ್ಕನ್ ಕ್ರಾನಿಕಲ್ ವರದಿಯ ಪ್ರಕಾರ, ಮಂಗಳವಾರ ಒಂದೇ ದಿನದಲ್ಲಿ 2,460 ದಾನಿಗಳು ದೇಣಿಗೆ ನೀಡಿದ್ದಾರೆ.
1,212 ದಾನಿಗಳು: 1 ಲಕ್ಷದಿಂದ 10 ಲಕ್ಷ ರೂಪಾಯಿವರೆಗೆ ಕಾಣಿಕೆ ನೀಡಿದ್ದಾರೆ.
1,246 ದಾನಿಗಳು: 10 ಲಕ್ಷದಿಂದ 25 ಲಕ್ಷ ರೂಪಾಯಿವರೆಗೆ ದೇಣಿಗೆ ಸಲ್ಲಿಸಿದ್ದಾರೆ.
ಇಬ್ಬರು ಭಕ್ತರು: 1 ಕೋಟಿ ರೂಪಾಯಿಗೂ ಹೆಚ್ಚು ಕಾಣಿಕೆಯನ್ನು ಅರ್ಪಿಸಿದ್ದಾರೆ.
ವಿಶ್ವದ ಅತ್ಯಂತ ಶ್ರೀಮಂತ ದೇವಾಲಯಗಳಲ್ಲಿ ಒಂದಾದ ತಿರುಪತಿಯಲ್ಲಿ ಇತ್ತೀಚಿನ ವರ್ಷಗಳಲ್ಲಿ ದಾನಿಗಳ ಸಂಖ್ಯೆ ನಿರಂತರವಾಗಿ ಏರಿಕೆಯಾಗುತ್ತಿದೆ. ದೇವಸ್ಥಾನದ ಒಟ್ಟು ನಿವ್ವಳ ಮೌಲ್ಯ ಸುಮಾರು 3.38 ಲಕ್ಷ ಕೋಟಿ ರೂಪಾಯಿಗಳಾಗಿದ್ದು, ಇದು ಪ್ರಪಂಚದ ಹಲವು ಸಣ್ಣ ದೇಶಗಳ ಜಿಡಿಪಿಗಿಂತಲೂ (GDP) ಹೆಚ್ಚಾಗಿದೆ. 2025-26ರ ಅವಧಿಯಲ್ಲಿ ದೇವಾಲಯದ ಹುಂಡಿ ಕಾಣಿಕೆಯೇ 1,738 ಕೋಟಿ ರೂಪಾಯಿ ದಾಟಿದ್ದು, ದಿನಕ್ಕೆ ಸರಾಸರಿ 4.75 ಕೋಟಿ ರೂಪಾಯಿ ಸಂಗ್ರಹವಾಗುತ್ತಿದೆ.
ಇತ್ತೀಚಿನ ಅಂಕಿಅಂಶಗಳ ಪ್ರಕಾರ, ತಿರುಪತಿಯಲ್ಲಿ ಪ್ರಸ್ತುತ 1,97,888 ನೋಂದಾಯಿತ ದಾನಿಗಳಿದ್ದಾರೆ. ಅವರಲ್ಲಿ ಸುಮಾರು 1.5 ಲಕ್ಷ ಜನರು 1 ಲಕ್ಷ ಅಥವಾ ಅದಕ್ಕಿಂತ ಹೆಚ್ಚು ಮತ್ತು ಸುಮಾರು 22,000 ಜನರು 10 ಲಕ್ಷಕ್ಕಿಂತ ಹೆಚ್ಚು ದೇಣಿಗೆ ನೀಡಿದ್ದಾರೆ.
ದಾನಿಗಳ ಸಂಖ್ಯೆ ತೀವ್ರವಾಗಿ ಹೆಚ್ಚಾಗಿರುವುದರಿಂದಲೇ ಈ ಪ್ರಿವಿಲೇಜ್ ನೀತಿಯನ್ನು ಪರಿಷ್ಕರಿಸುವುದು ಅನಿವಾರ್ಯವಾಯಿತು ಎಂದು ದೇವಸ್ಥಾನವನ್ನು ನಿರ್ವಹಿಸುವ ತಿರುಮಲ ತಿರುಪತಿ ದೇವಸ್ಥಾನಂ (ಟಿಟಿಡಿ) ಮಂಡಳಿ ತಿಳಿಸಿದೆ. ಈಟಿವಿ ಭಾರತ್ ವರದಿಯ ಪ್ರಕಾರ, ಕಳೆದ ನಾಲ್ಕು ತಿಂಗಳುಗಳಲ್ಲೇ 10 ಲಕ್ಷ ರೂ. ನೀಡುವ ದಾನಿಗಳ ಸಂಖ್ಯೆ ಸುಮಾರು 3,000ದಷ್ಟು ಹೆಚ್ಚಾಗಿದೆ. ದೇಣಿಗೆ ನಿರ್ವಹಣೆಯಲ್ಲಿ ಹೆಚ್ಚಿನ ಪಾರದರ್ಶಕತೆ ಮತ್ತು ಏಕರೂಪತೆಯನ್ನು ತರುವ ಉದ್ದೇಶದಿಂದ ಈ ಬದಲಾವಣೆಗಳನ್ನು ಮಾಡಲಾಗಿದೆ ಎಂದು ಟಿಟಿಡಿ ಅಧ್ಯಕ್ಷ బి.ಆರ್. ನಾಯ್ಡು ತಿಳಿಸಿದ್ದಾರೆ.
ಮಂಗಳವಾರ ಮಧ್ಯರಾತ್ರಿಯಿಂದ ಜಾರಿಗೆ ಬಂದಿರುವ ಈ ಹೊಸ ನೀತಿಯು, ದಾನಿಗಳ ಹಿತಾಸಕ್ತಿಯ ಜೊತೆಗೆ ಸಾಮಾನ್ಯ ಭಕ್ತರ ಹಿತಾಸಕ್ತಿಯನ್ನೂ ಸರಿದೂಗಿಸುತ್ತದೆ. ಸಾಮಾನ್ಯ ಭಕ್ತರಿಗೆ ದರ್ಶನದ ಅವಕಾಶಗಳನ್ನು ಸುಧಾರಿಸಲು ಮತ್ತು ಹೆಚ್ಚಿಸಲು ದಾನಿಗಳ ಕೆಲವು ವಿಶೇಷ ಹಕ್ಕುಗಳನ್ನು ಕಡಿಮೆ ಮಾಡಲಾಗಿದೆ ಎಂದು ಟಿಟಿಡಿ ಸ್ಪಷ್ಟಪಡಿಸಿದೆ.
ಹೊಸ ದೇಣಿಗೆ ನೀತಿಯಲ್ಲಿ ಏನೇನೆಲ್ಲಾ ಬದಲಾಗಿದೆ...?
ನಾಲ್ಕು ಹಂತದ ಶ್ರೇಣಿ (Slabs): ಟಿಟಿಡಿ ಇನ್ಮುಂದೆ ಶ್ರೇಣಿ ಆಧಾರಿತ (Range-based) ದೇಣಿಗೆ ಪದ್ಧತಿಯನ್ನು ರದ್ದುಗೊಳಿಸಿದೆ. ಬದಲಾಗಿ, ನೀಡುವ ದೇಣಿಗೆಯ ಮೊತ್ತದ ಆಧಾರದ ಮೇಲೆ ದಾನಿಗಳನ್ನು 4 ಪ್ರತ್ಯೇಕ ಶ್ರೇಣಿಗಳಾಗಿ ವಿಂಗಡಿಸಲಾಗುತ್ತದೆ. ವ್ಯಕ್ತಿಗತ ದಾನಿಗಳಿಗೆ ಹಾಗೂ ಸಂಸ್ಥೆಗಳು ಅಥವಾ ಟ್ರಸ್ಟ್ಗಳಿಗೆ ಹೊಸ ನೀತಿಯಲ್ಲಿ ಪ್ರತ್ಯೇಕ ನಿಬಂಧನೆಗಳನ್ನು ಸೇರಿಸಲಾಗಿದೆ.
ಸೌಲಭ್ಯಗಳ ಕಾಲಮಿತಿ ರದ್ದು: ಈ ಹಿಂದೆ ದಾನಿಗಳಿಗೆ ಆಜೀವ ಸೌಲಭ್ಯಗಳಿರುತ್ತಿದ್ದವು. ಇದರಲ್ಲಿ ವಿಶೇಷ ಪ್ರವೇಶ ದರ್ಶನ, ಸುಪಥಂ ಪ್ರವೇಶ (ಗರ್ಭಗುಡಿಯ ಸಮೀಪಕ್ಕೆ ಪ್ರವೇಶ), ಬ್ರೇಕ್ ದರ್ಶನ, ಸುಪ್ರಭಾತ ಸೇವೆ, ನಿತ್ಯವೂ ನಡೆಯುವ ಕಲ್ಯಾಣೋತ್ಸವದಲ್ಲಿ ಭಾಗವಹಿಸುವಿಕೆ, ವಸತಿ ಸೌಲಭ್ಯ ಹಾಗೂ ಲಾಡು, ರೇಷ್ಮೆ ವಸ್ತ್ರ, ಚಿನ್ನ ಮತ್ತು ಬೆಳ್ಳಿ ನಾಣ್ಯಗಳಂತಹ ಉಡುಗೊರೆಗಳು ಸೇರಿದ್ದವು.
ಅವಧಿಯ ನಿಗದಿ: ಹೊಸ ನೀತಿಯಡಿ, ಈ ಪ್ರಿವಿಲೇಜ್ಗಳು ವ್ಯಕ್ತಿಗತ ದಾನಿಗಳಿಗೆ 20 ವರ್ಷಗಳವರೆಗೆ ಮತ್ತು ಸಂಸ್ಥೆಗಳು ಅಥವಾ ಟ್ರಸ್ಟ್ಗಳಿಗೆ 15 ವರ್ಷಗಳವರೆಗೆ ಮಾತ್ರ ಮಾನ್ಯವಾಗಿರುತ್ತವೆ.
ಆನ್ಲೈನ್ ವ್ಯವಸ್ಥೆ: ಎಲ್ಲಾ ದಾನಿಗಳ ದರ್ಶನಗಳನ್ನು ಇನ್ಮುಂದೆ ಆನ್ಲೈನ್ ಡೋನರ್ ಮ್ಯಾನೇಜ್ಮೆಂಟ್ ಸಿಸ್ಟಮ್ ಮೂಲಕವೇ ಪ್ರಕ್ರಿಯೆಗೊಳಿಸಲಾಗುತ್ತದೆ. ಇದರಿಂದಾಗಿ ಮಂಡಳಿಗೆ ಬರುತ್ತಿದ್ದ ಮ್ಯಾನುಯಲ್ ಶಿಫಾರಸುಗಳು ಮತ್ತು ವಿಶೇಷ ಮನವಿಗಳಿಗೆ ಮುಕ್ತಿ ಸಿಗಲಿದೆ.
ಜುಲೈ 15ರ ಮಧ್ಯರಾತ್ರಿಗಿಂತ ಮುಂಚಿತವಾಗಿಯೇ ನೋಂದಾಯಿಸಿಕೊಂಡಿರುವ ಹಾಲಿ ದಾನಿಗಳಿಗೆ ನೀಡಲಾದ ಲೈಫ್ಟೈಮ್ ಸೌಲಭ್ಯಗಳಿಗೆ ಇದರಿಂದ ಯಾವುದೇ ಧಕ್ಕೆ ಇಲ್ಲ. ಇದೇ ಕಾರಣಕ್ಕೆ ಜುಲೈ 15ರ ಮಧ್ಯರಾತ್ರಿ 12 ಗಂಟೆಯಾಗುವ ಮುನ್ನ ತಿರುಪತಿ ದೇವಸ್ಥಾನದಲ್ಲಿ ದಾಖಲೆ ಮಟ್ಟದ ದೇಣಿಗೆ ಹರಿದುಬಂದಿದೆ(ಏಜೆನ್ಸೀಸ್).