ಅಜಿತ್ ದಾದಾ ಸಾವಿನ ಕುರಿತಾಗಿ ಅನುಮಾನಗಳಿವೆ..ಮಹಾರಾಷ್ಟ್ರದಲ್ಲಿ ಸಂಚಲನ ಸೃಷ್ಟಿಸಿದ ರೋಹಿತ್ ಪವಾರ್ ಹೇಳಿಕೆ! | Rohit Pawar

ಬಾರಾಮತಿಯಲ್ಲಿ ನಡೆದ ಜಿಲ್ಲಾ ಪರಿಷತ್ ಚುನಾವಣೆಯಲ್ಲಿ ಮತ ಚಲಾಯಿಸಿದ ಬಳಿಕ ಮಾಧ್ಯಮದವರೊಂದಿಗೆ ಮಾತನಾಡಿದ ಶಾಸಕ ರೋಹಿತ್​​ ಪವಾರ್​, ಎನ್‌ಸಿಪಿ ಬಣಗಳು ಒಂದಾಗಬೇಕೆಂದು ಎನ್ನುವುದು ಅಜಿತ್ ಪವಾರ್ ಬಯಕೆಯಾಗಿತ್ತು, ಅವರ ಆಸೆಯಂತೆ ವಿಲೀನದ ಪ್ರಯತ್ನಗಳು ಮುಂದುವರಿಯುತ್ತವೆ ಎಂದು ತಿಳಿಸಿದರು.

ಎಲ್ಲರೂ ಒಂದೇ ಕುಟುಂಬವಾಗಿ ಒಟ್ಟಿಗೆ ಸೇರಬೇಕೆಂದು ಅಜಿತ್ ದಾದಾ ಪ್ರಾಮಾಣಿಕವಾಗಿ ಹಾರೈಸಿದರು, ಅದೇ ರೀತಿಯಲ್ಲಿ ಇಂದು ಎಲ್ಲರೂ ಒಟ್ಟಿಗೆ ಬಂದಿದ್ದಾರೆ. ದಾದಾ ಪ್ರಯತ್ನಗಳನ್ನು ಮಾಡಿದ್ದರು. ನಾವು ಅದನ್ನು ಮುಂದುವರಿಸುತ್ತೇವೆ ಎಂದು ರೋಹಿತ್​ ಹೇಳಿದರು.

ವಿಲೀನ ಏಕೆ ಆಗಬೇಕಿತ್ತು..? ಅಜಿತ್ ದಾದಾ ನಿಜವಾದ ಉದ್ದೇಶವೇನು..? ಅದು ರಾಜಕೀಯ ಆಯಾಮವನ್ನು ಹೊಂದಿತ್ತೋ ಅಥವಾ ಭಾವನಾತ್ಮಕ ಆಯಾಮವನ್ನು ಹೊಂದಿತ್ತೋ? ಎನ್ನುವುದನ್ನು ಫೆಬ್ರವರಿ 12 ರಂದು ವಿವರಿಸುವುದಾಗಿ ಶರದ್​ ಪವಾರ್​ ಮೊಮ್ಮಗನೂ ಆಗಿರುವ ಶಾಸಕ ರೋಹಿತ್ ತಿಳಿಸಿದ್ದಾರೆ.

ಅಪಘಾತದ ಬಗ್ಗೆ ಪ್ರತಿಯೊಬ್ಬರ ಮನಸ್ಸಿನಲ್ಲಿಯೂ ಪ್ರಶ್ನೆಗಳು ಮತ್ತು ಅನುಮಾನಗಳಿವೆ. ಫೆಬ್ರವರಿ 10 ರಂದು ಮುಂಬೈನಲ್ಲಿ ನಾನು ಪ್ರಸ್ತುತಿ ನೀಡುತ್ತೇನೆ. ಅಪಘಾತ ಏಕೆ ಸಂಭವಿಸಿತು ಮತ್ತು ಹೇಗೆ ಸಂಭವಿಸಿರಬಹುದು ಎನ್ನುವ ವಿಷಯಗಳ ಬಗ್ಗೆ ಚರ್ಚಿಸುವುದಾಗಿ ರೋಹಿತ್​ ಪವಾರ್​ ಹೇಳಿದ್ದಾರೆ.

ಅಹಲ್ಯಾನಗರ ಜಿಲ್ಲೆಯ ಕರ್ಜತ್-ಜಮಖೇಡ್ ವಿಧಾನಸಭಾ ಕ್ಷೇತ್ರವನ್ನು ಪ್ರತಿನಿಧಿಸುವ ರೋಹಿತ್ ಪವಾರ್, ಅಜಿತ್ ಪವಾರ್ ಯಾವಾಗಲೂ ಪಕ್ಷದ ಕಾರ್ಯಕರ್ತರ ಒಳಿತನ್ನು ಬಯಸುತ್ತಿದ್ದರು ಮತ್ತು ಅವರ ಸಿದ್ಧಾಂತವನ್ನು ಹಂಚಿಕೊಂಡವರು ಆಯ್ಕೆಯಾಗಬೇಕೆಂದು ಬಯಸುತ್ತಿದ್ದರು ಎಂದು ಹೇಳಿದರು.