ಚೆನ್ನೈ: ತಮಿಳು ಚಿತ್ರರಂಗದ ತೆನಿಸೈ ತೆಂದ್ರಲ್ ಎಂದೇ ಖ್ಯಾತರಾಗಿದ್ದ ಹಿರಿಯ ಸಂಗೀತ ನಿರ್ದೇಶಕ ಮತ್ತು ಗಾಯಕ ದೇವಾ ಅವರು ಶನಿವಾರ(ಅ. 17) ಚೆನ್ನೈನಲ್ಲಿ ನಿಧನರಾಗಿದ್ದಾರೆ ಎಂದು ವರದಿಯಾಗಿದೆ. ಅವರಿಗೆ 75 ವರ್ಷ ವಯಸ್ಸಾಗಿತ್ತು.
ವರದಿಗಳ ಪ್ರಕಾರ, ದೇವಾ ಅವರು ತಕ್ಷಣದ ಅನಾರೋಗ್ಯದ ಕಾರಣದಿಂದ ಇಂದು ಬೆಳಿಗ್ಗೆ ಸುಮಾರು 8:30ರ ಸುಮಾರಿಗೆ ಚೆನ್ನೈನ ಸೂರ್ಯ ಆಸ್ಪತ್ರೆಗೆ ದಾಖಲಾಗಿದ್ದರು. ಮತ್ತು ಅಲ್ಲಿಯೇ ಇದ್ದಕ್ಕಿದ್ದಂತೆ ಕೊನೆಯುಸಿರೆಳೆದಿದ್ದಾರೆ. ಸಾವಿಗೆ ಸಂಬಂಧಿಸಿದ ಹೆಚ್ಚಿನ ವಿವರಗಳು ಇನ್ನಷ್ಟೇ ತಿಳಿಯಬೇಕಿದೆ.
1950 ನವೆಂಬರ್ 20ರಂದು ದೇವನೇಸನ್ ಚೊಕ್ಕಲಿಂಗಂ ಆಗಿ ಜನಿಸಿದ ದೇವ, ತಮಿಳು ಚಿತ್ರರಂಗದ ಪ್ರಮುಖ ಸಂಗೀತ ನಿರ್ದೇಶಕರಲ್ಲಿ ಒಬ್ಬರು. ವಿಶಿಷ್ಟ ಮಧುರ ರಾಗಗಳು, ಜಾನಪದ ಶೈಲಿಯ ಸಂಯೋಜನೆ ಮತ್ತು ಚಲನಚಿತ್ರಗಳಲ್ಲಿ 'ಗಾನಾ' ಸಂಗೀತವನ್ನು ಜನಪ್ರಿಯತೆಗೆ ನೀಡಿದ ಕೊಡುಗೆಗಾಗಿ ಹೆಸರುವಾಸಿಯಾಗಿದ್ದಾರೆ.
ಮೂರು ದಶಕಗಳಿಗೂ ಹೆಚ್ಚು ಕಾಲದ ತಮ್ಮ ವೃತ್ತಿಜೀವನದಲ್ಲಿ, ಅವರು ತಮಿಳು, ತೆಲುಗು, ಕನ್ನಡ ಮತ್ತು ಮಲಯಾಳಂ ಭಾಷೆಗಳ ನೂರಾರು ಚಲನಚಿತ್ರಗಳಿಗೆ ಸಂಗೀತ ಸಂಯೋಜಿಸಿದ್ದಾರೆ. 1980 ರ ದಶಕದ ಅಂತ್ಯ ಮತ್ತು 1990ರ ದಶಕದ ಆರಂಭದಲ್ಲಿ ದೇವ ತಮಿಳು ಚಿತ್ರರಂಗದಲ್ಲಿ ಖ್ಯಾತಿ ಪಡೆದರು. 'ಅಣ್ಣಾಮಲೈ', 'ಬಾಷಾ', 'ಆಸೈ', 'ಕಾದಲ್ ಕೊಟ್ಟೈ', 'ನೆರುಕ್ಕು ನೇರ್', 'ನಿನೈತ್ತೇನ್ ವಂದೈ', 'ಪ್ರಿಯಮುದನ್', 'ವಾಲಿ' ಮತ್ತು 'ಕುಶಿ' ಮುಂತಾದವು ಅವರ ಗಮನಾರ್ಹ ಚಿತ್ರಗಳಾಗಿವೆ.
1990ರ ದಶಕದಲ್ಲಿ ಯಶಸ್ವಿಯಾದ ಅನೇಕ ಚಲನಚಿತ್ರಗಳ ಸಂಗೀತವನ್ನು ರೂಪಿಸುವಲ್ಲಿ ಅವರ ಕೊಡುಗೆ ಮಹತ್ವದ್ದಾಗಿತ್ತು. ಚೆನ್ನೈನ 'ಗಾನಾ' ಸಂಪ್ರದಾಯದ ಶಬ್ದಗಳು ಮತ್ತು ಲಯಗಳನ್ನು ಮುಖ್ಯವಾಹಿನಿಯ ತಮಿಳು ಚಲನಚಿತ್ರ ಸಂಗೀತಕ್ಕೆ ಪರಿಚಯಿಸಿದ್ದಕ್ಕಾಗಿ ಅವರು ವಿಶೇಷ ಮನ್ನಣೆ ಪಡೆದಿದ್ದಾರೆ.
ಶಕ್ತಿಯುತವಾದ, ಜಾನಪದ ಪ್ರಭಾವವುಳ್ಳ ಹಾಡುಗಳು ಅವರ ಗುರುತಾಗಿದ್ದರೂ, ಪ್ರಣಯಭರಿತ ಮಧುರ ಗೀತೆಗಳು ಮತ್ತು ಭಕ್ತಿಗೀತೆಗಳನ್ನು ಸಹ ಸಂಯೋಜಿಸುವಲ್ಲೂ ತಮ್ಮ ಯಶಸ್ವಿಯಾಗಿದ್ದರು. ಸಂಗೀತ ಕ್ಷೇತ್ರಕ್ಕೆ ಅವರು ನೀಡಿದ ಕೊಡುಗೆಗಾಗಿ ತಮಿಳುನಾಡು ಸರ್ಕಾರದ 'ಕಲೈಮಾಮಣಿ' ಪ್ರಶಸ್ತಿ ಸೇರಿದಂತೆ ಅನೇಕ ಗೌರವಗಳನ್ನು ಪಡೆದಿದ್ದಾರೆ (ಏಜೆನ್ಸೀಸ್).