ರಾಮಮಂದಿರ ಚಂದಾ ಹಗರಣ: ಮಸಾಲೆ ಡಬ್ಬಿಯ ಹಣಕ್ಕೂ ದ್ರೋಹ ಎಂದ ಪ್ರಿಯಾಂಕಾ! ಎಸ್‌ಐಟಿ ವರದಿ ಬೆನ್ನಲ್ಲೇ ಒಗ್ಗಟ್ಟಾದ ವಿಪಕ್ಷಗಳು; ಬಿಜೆಪಿ ತಿರುಗೇಟು! Ram Temple donation row

ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ವಾದ್ರಾ ಅವರು ಈ ಹಗರಣವನ್ನು ದುರಂತ ಮತ್ತು ನಾಚಿಕೆಗೇಡು ಎಂದು ಬಣ್ಣಿಸಿದ್ದಾರೆ. ದೇಶದ ಮೂಲೆ ಮೂಲೆಗಳಿಂದ ಸಾಮಾನ್ಯ ಜನರು, ಬಡವರು ಮತ್ತು ತಾಯಂದಿರು ತಮ್ಮ ಉಳಿತಾಯದ ಹಣದಿಂದ ಮಂದಿರಕ್ಕೆ ಕಾಣಿಕೆ ನೀಡಿದ್ದಾರೆ. ಕಾರ್ಪೊರೇಟ್ ಸಂಸ್ಥೆಗಳು ಮಾತ್ರವಲ್ಲ, ಸಾಮಾನ್ಯ ಸಾರ್ವಜನಿಕರು ಶ್ರದ್ಧೆಯಿಂದ ನೀಡಿದ ಹಣವಿದು. ಇದನ್ನು ರಕ್ಷಿಸಬೇಕಾದ ಜವಾಬ್ದಾರಿ ಟ್ರಸ್ಟ್ ಮತ್ತು ಸರ್ಕಾರದ ಮೇಲಿತ್ತು ಎಂದು ಹೇಳಿದ್ದಾರೆ.

ವಿಶೇಷ ತನಿಖಾ ದಳದ (SIT) ಪ್ರಾಥಮಿಕ ವರದಿಯ ಪ್ರಕಾರ, ಕಾಣಿಕೆ ಎಣಿಕೆ ಕೇಂದ್ರದಲ್ಲಿ ಕಡ್ಡಾಯವಾಗಿ ಪಾಲಿಸಬೇಕಾಗಿದ್ದ ನಿಯಮಾವಳಿಗಳನ್ನು ಸಂಪೂರ್ಣವಾಗಿ ಗಾಳಿಗೆ ತೂರಲಾಗಿದೆ.

ನಿಯಮಗಳ ಉಲ್ಲಂಘನೆ: ಹಣ ಎಣಿಸುವ ಸಿಬ್ಬಂದಿಗೆ ಜೇಬುಗಳಿಲ್ಲದ ಉಡುಪು, ಭದ್ರತಾ ಸಿಬ್ಬಂದಿಯ ನಿಯೋಜನೆ ಮತ್ತು ಎಣಿಕೆ ಕೇಂದ್ರಕ್ಕೆ ಬಂದು ಹೋಗುವವರ ತಪಾಸಣೆಯನ್ನು ಮಾಡಲಾಗಿರಲಿಲ್ಲ.

ಖಾಸಗಿ ಚಾಲಕನ ಕೈಗೆ ಕೀಲಿ ಕೈ: ಟ್ರಸ್ಟ್‌ನ ಪ್ರಧಾನ ಕಾರ್ಯದರ್ಶಿ ಚಂಪತ್ ರಾಯ್ ಅವರ ಮಾಜಿ ಚಾಲಕ ರಾಮಶಂಕರ್ ಯಾದವ್ ಅಲಿಯಾಸ್ ತಿನ್ನು ಯಾದವ್ ನಿಯಮ ಬಾಹಿರವಾಗಿ ಹಲವು ಕಾಣಿಕೆ ಪೆಟ್ಟಿಗೆಗಳ ಕೀಲಿ ಕೈಗಳನ್ನು ಹೊಂದಿದ್ದ ಮತ್ತು ಈತನೇ ಹಣ ಲೂಟಿ ಮಾಡಲು ಮುಖ್ಯ ಕಾರಣ ಎಂದು ವರದಿ ಹೇಳಿದೆ.

ಜೂನ್ 25 ರಂದು ಎಫ್‌ಐಆರ್ ದಾಖಲಾದ ನಂತರ 8 ಜನರನ್ನು ಬಂಧಿಸಲಾಗಿದ್ದು, ಇವರಿಂದ ಸುಮಾರು 80 ಲಕ್ಷ ರೂಪಾಯಿ ನಗದು ಮತ್ತು ವಿದೇಶಿ ಕರೆನ್ಸಿಯನ್ನು ವಶಪಡಿಸಿಕೊಳ್ಳಲಾಗಿದೆ.

ವಿಪಕ್ಷಗಳ ಆರೋಪಗಳನ್ನು ತೀವ್ರವಾಗಿ ಖಂಡಿಸಿರುವ ಉತ್ತರ ಪ್ರದೇಶದ ಡಿಸಿಎಂ ಕೇಶವ್ ಪ್ರಸಾದ್ ಮೌರ್ಯ, ಕಾಂಗ್ರೆಸ್ ಮತ್ತು ಸಮಾಜವಾದಿ ಪಕ್ಷಕ್ಕೆ ಮೊದಲಿನಿಂದಲೂ ರಾಮಮಂದಿರದ ಮೇಲೆ ನೈಸರ್ಗಿಕವಾಗಿಯೇ ದ್ವೇಷವಿದೆ ಎಂದು ಕಿಡಿಕಾರಿದ್ದಾರೆ.

ತನಿಖೆ ಪೂರ್ಣಗೊಳ್ಳುವ ಮುನ್ನವೇ ಅಖಿಲೇಶ್ ಮತ್ತು ಅವರ ಗ್ಯಾಂಗ್ ಕಾಣಿಕೆ ಹಣದ ವಿಚಾರದಲ್ಲಿ ಅಗ್ಗದ ರಾಜಕೀಯ ಮಾಡುತ್ತಿದೆ. ನಮ್ಮ ಸರ್ಕಾರ ಈಗಾಗಲೇ ಎಸ್‌ಐಟಿ ವರದಿ ಆಧರಿಸಿ ಕಠಿಣ ಕ್ರಮ ಕೈಗೊಂಡಿದೆ, ಎಫ್‌ಐಆರ್ ದಾಖಲಿಸಿ ಎಂಟು ಜನರನ್ನು ಜೈಲಿಗೆ ಅಟ್ಟಲಾಗಿದೆ. ತಪ್ಪು ಮಾಡಿದವರು ಯಾರೇ ಆಗಿದ್ದರೂ ಶಿಕ್ಷೆ ಗ್ಯಾರಂಟಿ. ಆದರೆ ಸನಾತನ ವಿರೋಧಿ ಶಕ್ತಿಗಳು ತಮ್ಮ ವಿಕೃತ ಮನಸ್ಥಿತಿಯನ್ನು ಪ್ರದರ್ಶಿಸುತ್ತಿವೆ. ಇವರೆಲ್ಲರಿಗೂ ಜನರೇ ಪಾಠ ಕಲಿಸಲಿದ್ದಾರೆ ಮತ್ತು 2027ರ ಚುನಾವಣೆಯಲ್ಲಿ ಉತ್ತರ ಪ್ರದೇಶದಲ್ಲಿ ಮತ್ತೆ ಕಮಲ ಅರಳಲಿದೆ ಎಂದು ಮೌರ್ಯ ಗುಡುಗಿದ್ದಾರೆ. ಸಿಎಂ ಯೋಗಿ ಆದಿತ್ಯನಾಥ್ ಅವರು ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ್ದು, ತಪ್ಪಿತಸ್ಥರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳುವಂತೆ ಕಟ್ಟುನಿಟ್ಟಿನ ಆದೇಶ ನೀಡಿದ್ದಾರೆ,(ಏಜೆನ್ಸೀಸ್​).