ಬಿಸಿಲ ಬೇಗೆಯಲ್ಲಿ ಪ್ರಯಾಣಿಸುವವರಿಗೆ ಭಗೀರಥನಾದ ಅಜ್ಜ; ಬಾಯಾರಿದ ಪ್ರಯಾಣಿಕರಿಗೆ ನೀರು ಕೊಡೋದೆ ಕರ್ತವ್ಯ..Rajasthan

ಹೌದು, 77 ವರ್ಷದ ಥಾಣಾ ರಾಮ್ ಕಡ್ವಾಸ್ರಾ ಎಂಬ ವೃದ್ಧ ಬಾರ್ಮರ್-ಬಟಾಡು ಮಾರ್ಗದಲ್ಲಿ ಸಂಚರಿಸುವ ಬಸ್​ ಪ್ರಯಾಣಿಕರಿಗೆ ಉಚಿತವಾಗಿ ಕುಡಿಯುವ ನೀರಿನ ವ್ಯವಸ್ಥೆಯನ್ನು ತಮ್ಮ ಕರ್ತವ್ಯವನ್ನಾಗಿ ಮಾಡಿಕೊಂಡಿದ್ದಾರೆ. ಅವರ ಈ ಮಹತ್ವದ ಕಾರ್ಯವನ್ನು ಮೋಹನ್ ಬಲಿಯಾರ ಎಂಬ ವ್ಯಕ್ತಿ ವಿಡಿಯೋ ಮಾಡಿ, ಇನ್​​ಸ್ಟಾಗ್ರಾಮ್​ನಲ್ಲಿ ಹಂಚಿಕೊಂಡಿರುವುದು ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ.

ಮರುಭೂಮಿಯ ಮಾರ್ಗದಲ್ಲಿ ಬಿಳಿ ಬಣ್ಣದ ಬಸ್​ವೊಂದು ನಿಂತಿದೆ. ಇಲ್ಲಿಗೆ ಬಕೆಟ್​ನಲ್ಲಿ ನೀರಿದ್ದ ಪ್ಲಾಸ್ಟಿಕ್​ ಬಾಟಲಿ ಹೊತ್ತು ತಂದ ಬಿಳಿ ಪಂಚೆ, ಶರ್ಟ್​ನ ಬಡಕಲು ದೇಹದ ವೃದ್ಧ ಅದನ್ನು ಪ್ರಯಾಣಿಕರಿಗೆ ಹಂಚುತ್ತಿದ್ದಾರೆ. ಪ್ರಯಾಣಿಕರು ನೀರು ಕುಡಿದು ಖಾಲಿ ಮಾಡಿದ ಪ್ಲಾಸ್ಟಿಕ್​ ವಾಪಸ್​ ವೃದ್ಧನಿಗೆ ನೀಡುತ್ತಿದ್ದಾರೆ. ದಣಿದವರಿಗೆ ನೀರುಣಿಸುವ ವೃದ್ಧನ ಈ ನಿಸ್ವಾರ್ಥ ಸೇವೆ ಇಂದು ನಿನ್ನೆಯದಲ್ಲ. ಕಳೆದ 21 ವರ್ಷದಿಂದ ಯಾವುದೇ ಪ್ರಚಾರವಿಲ್ಲದೆ ನಡೆಸುತ್ತಿದ್ದಾರೆ ಎಂದು ಹಲವರು ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.

ಥಾಣಾ ರಾಮ್ ಕಡ್ವಾಸ್ರಾ ಅವರು ಕಳೆದ 21 ವರ್ಷಗಳಿಂದ ಬಾರ್ಮರ್‌ನ ಜನನಿಬಿಡ ರಸ್ತೆಯ ಉದ್ದಕ್ಕೂ ಮರುಭೂಮಿ ದಾಟುವ ಪ್ರಯಾಣಿಕರಿಗೆ, ಪ್ಲಾಸ್ಟಿಕ್​ ಬಾಟಲ್​ಗಳನ್ನು ಬಕೆಟ್​ನಲ್ಲಿ ಹೊತ್ತು ತಂದು, ಒಬ್ಬೊಬ್ಬ ಪ್ರಯಾಣಿಕರಿಗೂ ನೀರನ್ನು ಕೆಲಸ ಮಾಡುತ್ತಾರೆ ಈ ವೃದ್ಧ . ಬೇಸಿಗೆಯಲ್ಲಿ ಇಲ್ಲಿನ ತಾಪಮಾನ 45 ರಿಂದ 47 ಡಿಗ್ರಿ ಸೆಲ್ಸಿಯಸ್​​ಗೆ ಏರಿಕೆಯಾಗುತ್ತದೆ. ಅಂತಹ ಸುಡುವ ಬಿಸಿಲಿನಲ್ಲೂ ಅವರ ದೈನಂದಿನದ ಕೆಲಸವನ್ನು ಮರೆಯದೇ, ಜನರನ್ನು ತಂಪಾಗಿಡುವ ಕೆಲಸ ಮಾಡುತ್ತಾರೆ ಎಂದು ಬರೆದುಕೊಂಡಿದ್ದಾರೆ.

ಈ ವೃದ್ಧನ ಈ ಕಾರ್ಯಕ್ಕೆ ಯಾರೂ ಹಣ ನೀಡೋದಿಲ್ಲ, ನೀರು ಕೊಡುತ್ತೇನೆ ಎನ್ನುವ ಬ್ಯಾನರ್​ ಸಹ ಹಾಕಿಕೊಂಡಿಲ್ಲ. ಪ್ರಚಾರ ಮಾಡಲು ಸೋಶಿಯಲ್​ ಮೀಡಿಯಾ ಇಲ್ಲ. ಆದರೂ ಸಹ ದಣಿದು, ಬಾಯಾರಿ ಬಂದ ಪ್ರಯಾಣಿಕರಿಗೆ, ದಾರಿ ಹೋಕರಿಗೆ ನೀರು ಕೊಡೋದನ್ನು ಮಾತ್ರ ಇವರು ಮರೆಯೋದಿಲ್ಲ. ಕಳೆದ 21 ವರ್ಷದಿಂದ ನಿಸ್ವಾರ್ಥದಿಂದ ಕೆಲಸ ಮಾಡುತ್ತಿದ್ದಾರೆ. ಇದು ನಿಜಕ್ಕೂ ಶ್ಲಾಘನೀಯ ಎಂದು ಹಲವರು ಕಾಮೆಂಟ್​ ಮಾಡಿದ್ದಾರೆ, (ಏಜೆನ್ಸೀಸ್).